ທ່ານ ສອນໄຊ ສີພັນດອນ ສືບຕໍ່ຊຸກຍູ້ ການຊ່ວຍເຫຼືອປະຊາຊົນຜູ້ປະສົບເຄາະຮ້າຍ


...

02.08.2018 10:06     

   ໃນຕອນແລງຂອງວັນທີ 31 ກໍລະກົດ ຜ່ານມາ, ທ່ານ ສອນໄຊ ສີພັນດອນ ຮອງນາຍົກ ລັດຖະມົນຕີ ປະທານຄະນະ ກຳມະການສະເພາະກິດແກ້ ໄຂໄພພິບັດລະດັບຊາດ ພ້ອມ ດ້ວຍຄະນະໄດ້ໄປສຳຫຼວດຕິດ ຕາມເບິ່ງສະພາບການແກ້ໄຂ ອຸທົກກະໄພນ້ຳຖ້ວມ ທີ່ເມືອງ ສະໜາມໄຊ ແຂວງອັດຕະປື. ໃນໂອກາດນີ້, ທ່ານໄດ້ ໄປພົບປະກັບຄະນະຮັບຜິດ ຊອບແກ້ໄຂໄພພິບັດ ທີ່ປະຈຳ ຢູ່ພາກສະໜາມ ໂດຍໄດ້ຮັບ ຟັງການລາຍງານຄວາມຄືບ ໜ້າ ໃນການແກ້ໄຂໄພພິບັດ ໃນຄັ້ງນີ້ເຫັນວ່າ: ໃນຈຳນວນ 6 ບ້ານທີ່ໄດ້ຮັບຜົນກະທົບໜັກ (ບ້ານ ໃໝ່, ບ້ານທ່າຫີນ, ບ້ານທ່າ ແສງຈັນ, ບ້ານສະໜອງ, ບ້ານ ຫີນລາດ ແລະ ບ້ານແທໃຫຍ່) ມີຈຳນວນ 1.617 ຄອບຄົວ, ມີພົນລະເມືອງ 7.095 ຄົນ ແມ່ນໄດ້ຮັບການຊ່ວຍເຫຼືອ ແລະ ປະຈຳຢູ່ສູນອົບພະຍົບຊົ່ວ ຄາວ ຈຳນວນ 5 ຈຸດ ຄື: ຈຸດ ເທດສະບານເມືອງສະໜາມ ໄຊ ຈຳນວນ 3.731 ຄົນ, ຈຸດ ບ້ານດອນບົກ ຈຳນວນ 1.086 ຄົນ, ຈຸດບ້ານປິນດົງ ຈຳນວນ 500 ຄົນ, ຈຸດບ້ານຕຳມໍຢອດ ຈຳນວນ 600 ຄົນ ແລະ ຈຸດ ເທດສະບານແຂວງ ທີ່ຍົກຍ້າຍ ມາຈາກເມືອງປາກຊ່ອງຈຳ ນວນ 138 ຄົນ. ສຳລັບຜູ້ສູນ ຫາຍ ຈຳນວນ 131 ຄົນ (ຕາມ ການບອກເລົ່າຂອງປະຊາຊົນ ໃນເວລາເກີດເຫດນ້ຳຖ້ວມ), ມາຮອດປັດຈຸບັນແມ່ນໄດ້ພົບ ເຫັນ ແລະ ເກັບກູ້ອອກມາໄດ້ ແລ້ວ ຈຳນວນ 11 ສົບ ຊຶ່ງ ໜ່ວຍ ງານກູ້ໄພ ແລະ ເຈົ້າໜ້າທີ່ທີ່ ກ່ຽວຂ້ອງຍັງສືບຕໍ່ດຳເນີນການ ຄົ້ນຫາຢ່າງເຄັ່ງຮ້ອນ ໃນນັ້ນ ໜ່ວຍກູ້ໄພທີ່ເຂົ້າມາຊ່ວຍເຫຼືອ ແມ່ນມາຈາກຫຼາຍພາກສ່ວນ ທັງພາຍໃນ ແລະ ຕ່າງປະ ເທດ ລວມທັງໝົດ 25 ຄະນະ, ລວມມີຈຳນວນ 100 ກວ່າຄົນ ຄື: ໜ່ວຍກູ້ໄພພາຍໃນປະເທດ, ຈາກ ສປ ຈີນ, ສສ ຫວຽດ ນາມ, ຣາຊະອານາຈັກໄທ ແລະ ອື່ນໆ. ສ່ວນການຊ່ວຍເຫຼືອດ້ານອື່ນໆ ເປັນຕົ້ນເຄື່ອງອຸປະໂພກ-ບໍລິ ໂພກ, ເຄື່ອງໃຊ້ຂອງສອຍທີ່ ຈຳເປັນ, ການບໍລິການສາທາ ລະນະສຸກ, ເງິນ...ໃຫ້ແກ່ປະ ຊາຊົນຜູ້ປະສົບເຄາະຮ້າຍກໍ ໄດ້ຮັບການແກ້ໄຂໃນຂັ້ນພື້ນ ຖານ ແລະ ຍັງສືບຕໍ່ດຳເນີນ ໄປຢ່າງຕໍ່ເນື່ອງ. ນອກນີ້ຍັງໄດ້ ເລີ່ມລົງມືກໍ່ສ້າງທີ່ພັກຊົ່ວຄາວ ໃຫ້ແກ່ປະຊາຊົນແລ້ວ ໂດຍ ກຳນົດເອົາ 3 ຈຸດຄື: ຈຸດດົງ ບາກ, ຈຸດໂຮງຮຽນບ້ານຫາດ ຍາວ ແລະ ຈຸດບ້ານຕຳມໍປອດ ເມືອງສະໜາມໄຊ. ໃນໂອກາດ ດຽວກັນ ທ່ານຮອງນາຍົກລັດ ຖະມົນຕີ ພ້ອມດ້້ວຍຄະນະ ກໍ່ໄດ້ໄປສຳຫຼວດຕິດຕາມເບິ່ງ ສະຖານທີ່ຕ່າງໆທີ່ໄດ້ຮັບ ຜົນກະທົບນ້ຳຖ້ວມຫຼາຍຈຸດ. ພ້ອມທັງໄດ້ພົບປະໂອ້ລົມກັບ ປະຊາຊົນ ແລະ ມອບເຄື່ອງ ຊ່ວຍເຫຼືອຈຳນວນໜຶ່ງໃຫ້ແກ່ ເຂົາເຈົ້າ. (ຂ່າວ+ພາບ: ອະນິຄົມ ສນຍ)