ລັດຖະບານ ຈະນຳໃຊ້ເງິນບໍລິຈາກໃຫ້ເກີດ ຜົນປະໂຫຍດສູງສຸດ


...

16.08.2018 9:33     

   (ຂປລ). ທ່ານ ຄຳແພງ ໄຊສົມແພງ ລັດຖະມົນຕີ ກະ ຊວງແຮງງານ ແລະ ສະຫວັດ ດີການສັງຄົມ ໄດ້ຝາກເຖິງ ສັງ ຄົມ, ໂດຍສະເພາະ ບັນດາຜູ້ ທີ່ມາບໍລິຈາກ ນັບທັງພາຍໃນ ແລະ ຕ່າງປະເທດຂໍໃຫ້ມີຄວາມ ເຊື່ອໝັ້ນວ່າ ລັດຖະບານລາວ ຈະນຳໃຊ້ເງິນທຸກກີບ, ທຸກບາດ, ທຸກໂດລາ ລວມທັງເຄື່ອງຊ່ວຍ ເຫຼືອຕ່າງໆ ໃຫ້ເກີດຜົນປະ ໂຫຍດສູງສຸດ, ໃຫ້ສົມກັບຄວາມ ຕັ້ງໃຈ ແລະ ນ້ຳໃຈຂອງຜູ້ຊ່ວຍ ເຫຼືອທີ່ສຸດ. ມາຮອດວັນທີ 10 ສິງຫາ 2018, ຍອດເງິນບໍລິຈາກຜ່ານ ກະຊວງແຮງງານ ແລະ ສະ ຫວັດດີການສັງຄົມ ມີເງິນກີບ 17 ຕື້ກວ່າກີບ, ສະກຸນເງິນໄທ 27,3 ລ້ານກວ່າບາດ ແລະ ສະກຸນເງິນໂດລາ 12 ລ້ານກວ່າ ໂດລາ ແລະ ຍອດບໍລິຈາກ ຜ່ານແຂວງອັດຕະປື ທັງໝົດ ແມ່ນ 29,7 ຕື້ກວ່າກີບ. ທ່ານລັດຖະມົນຕີກະຊວງ ແຮງງານ ແລະ ສະຫວັດດີການ ສັງຄົມ ໄດ້ໃຫ້ສຳພາດ ໃນວັນ ທີ 13 ສິງຫາ 2018 ນີ້ວ່າ: ມາ ຮອດປັດຈຸບັນ, ເງິນບໍລິຈາກ ທຸກກີບຍັງບໍ່ທັນໄດ້ຖືກນຳໃຊ້ ໂດຍ ຍັງເກັບໄວ້ຢູ່ທະນາຄານ ຊຶ່ງໃນຂະນະນີ້ ພາກສ່ວນທີ່ ກ່ຽວຂ້ອງຕ່າງໆ ກຳລັງຂຸ້ນຂ້ຽວ ປຶກສາຫາລື ແລະ ວາງແຜນໃນ ການຟື້ນຟູ, ຊຶ່ງເປັນວຽກທີ່ສຳ ຄັນທີ່ສຸດ ເພື່ອເຮັດໃຫ້ຊີວິດ ການເປັນຢູ່ຂອງພໍ່ແມ່ປະຊາ ຊົນ ຄ່ອຍກັບຄືນມາສູ່ສະພາບ ປົກກະຕິ ລວມທັງການສ້າງອາ ຊີບທີ່ໝັ້ນຄົງໃຫ້ກັບເຂົາເຈົ້າ. ພ້ອມດຽວກັນ, ກໍໄດ້ຮຽກ ຮ້ອງມາຍັງ ພໍ່ແມ່ພີ່ນ້ອງທີ່ປະ ສົບໄພຄັ້ງນີ້, ໂດຍສະເພາະ ຢູ່ ເມືອງສະໜາມໄຊ ແຂວງອັດ ຕະປື ໃຫ້ມີຄວາມອຸ່ນອ່ຽງທຸ່ນ ທ່ຽງ ແລະ ເຊື່ອໝັ້ນ ພັກ-ລັດ, ເພາະວ່າ ພັກ-ລັດ ຈະບໍ່ປະບໍ່ ຖິ້ມປະຊາຊົນ ແລະ ໃຫ້ຄຳໝັ້ນ ສັນຍາວ່າ ຈະນຳໃຊ້ເງິນ ພ້ອມ ດ້ວຍເຄື່ອງບໍລິຈາກຕ່າງໆ ໃຫ້ ຖືກຕ້ອງຕາມເປົ້າໝາຍ ແລະ ຮັບປະກັນບໍ່ໃຫ້ມີການຮົ່ວໄຫຼ. (ຂ່າວ: ສິງຄຳ+ພາບ: ເພັດສະໄໝ)