ສານສະແດງຄວາມຂອບໃຈ


16.08.2018 9:37     

   ສົມເດັດພະເຈົ້າຢູ່ຫົວມະຫາວະຊິຣາລົງກອນ ບໍດິນທຣະ ເທບພະຍະວະຣາງກູນ ແຫ່ງ ລາຊະອານາຈັກໄທ ໄດ້ສົ່ງສານ ສະແດງຄວາມຂອບໃຈຕໍ່ທ່ານ ບຸນຍັງ ວໍລະຈິດ ປະທານປະ ເທດ ແຫ່ງ ສປປ ລາວ ເນື້ອໃນສານມີດັ່ງນີ້: ຕາມທີ່ເກີດເຫດ ການນັກເຕະບານເຍົາວະຊົນ ແລະ ຜູ້ຝຶກສອນທີມໝູປ່າອະ ຄາເດມີ ລວມ 13 ຄົນ ສູນຫາຍໃນຖ້ຳຫຼວງວະນະອຸທະຍານ ຖ້ຳຫຼວງ-ຂຸນນ້ຳນາງນອນ ຈັງຫວັດຊຽງຣາຍ ເມື່ອວັນທີ 23 ມິຖຸນາ 2018 ຈົນເມື່ອວັນທີ 2 ກໍລະກົດ 2018. ເຈົ້າໜ້າທີ່ກູ້ ໄພໄດ້ພົບຜູ້ສູນຫາຍ ໂດຍທຸກຄົນປອດໄພດີນັ້ນ. ປະຕິບັດການຄົ້ນຫາໃນຄັ້ງນີ້ ຄົງບໍ່ອາດສຳເລັດລຸລ່ວງໄດ້ ຫາກປາສະຈາກນ້ຳໃຈ ແລະ ແລະ ຄວາມເອື້ອອາທອນ ຂອງ ປະຊາຊົນ ອີກທັງການຮ່ວມມືອັນສຳຄັນຈາກປະເທດຂອງທ່ານ ໂດຍສະເພາະຢ່າງຍິ່ງ ໃນການທີ່ໜ່ວຍກູ້ໄພມູນນິທິ ຊ່ວຍເຫຼືອຄົນທຸກຍາກແຫ່ງ ສປປ ລາວ ໄດ້ສົ່ງເຈົ້າໜ້າທີ່ເຂົ້າ ຮ່ວມວາງແຜນ ແລະ ລຳລຽງອຸປະກອນກູ້ໄພກັບເຈົ້າໜ້າທີ່ກູ້ໄພຂອງໄທ ຢ່າງເຕັມກຳລັງຄວາມສາມາດ ຂ້າພະເຈົ້າ ຈຶ່ງຂໍ ຂອບໃຈ ເປັນຢ່າງຍິ່ງໃນການຊ່ວຍເຫຼືອຂອງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນຄວາມຫ່ວງໄຍ ແລະ ກຳລັງໃຈຂອງປະຊາຊົນຊາວລາວທີ່ມີຕໍ່ເຫດການດັ່ງກ່າວ.