ລັດຖະມົນຕີກະຊວງ ຖວທ ຕ້ອນຮັບປະທານສະມາຄົມຊັບສິນທີ່ເປັນມໍລະດົກໂລກຂອງຝຣັ່ງ


...

09.11.2018 17:21     

   ທ່ານ ບໍ່ແສງຄໍາ ວົງດາລາ ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ຕ້ອນຮັບການຢ້ຽມຂໍ່ານັບຂອງທ່ານ ອິວ ດົສ (Yves DAUGE) ປະທານສະມາຄົມຊັບສິນທີ່ເປັນມໍລະດົກໂລກຂອງຝຣັ່ງ ພ້ອມດ້ວຍຄະນະ ໃນວັນທີ 7 ພະຈິກນີ້, ທີ່ກະຊວງ ຖວທ ໃນໂອກາດທີ່ທ່ານເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ລະຫວ່າງວັນທີ 7 -9 ພະຈິກ 2018 ນີ້. ໃນໂອກາດດັ່ງກ່າວ ທ່ານລັດຖະມົນຕີ ກໍໄດ້ສະແດງການຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມ ແລະ ມາເຮັດວຽກຢູ່ ສປປ ລາວ ຂອງທ່ານ ອິວດົສ ພ້ອມດ້ວຍຄະນະໃນຄັ້ງນີ້; ຈຸດປະສົງຂອງການມາເຮັດວຽກຂອງຄະນະດັ່ງກ່າວແມ່ນເພື່ອເປັນການທົບທວນ ແລະ ຕີລາຄາວຽກງານຄຸ້ມຄອງມໍລະດົກໂລກ ຂອງ ສປປ ລາວ ໂດຍຜ່ານການຊ່ວຍເຫຼືອ ແລະ ສະໜັບສະໜູນຈາກປະເທດຝຣັ່ງ ໃນໄລຍະຜ່ານມາ ແລະໄດ້ຮ່ວມກັນປຶກສາຫາລືຄວາມເປັນໄປໄດ້ໃນການລົງເລິກວຽກງານຄຸ້ມຄອງດ້ານມໍລະດົກວັດທະນະທໍາ ໂດຍສະເພາະເພື່ອການຊຸກຍູ້ວຽກງານການຄຸ້ມຄອງມໍລະດົກໂລກ ຂອງ ສປປ ລາວ ໃຫ້ມີບາດກ້າວຂະຫຍາຍຕົວ ແລະ ເຂັ້ມແຂງຍິ່ງຂຶ້ນ. ທ່ານປະທານສະມາຄົມຊັບສິນທີ່ເປັນມໍລະດົກຂອງຝຣັ່ງ ກໍໄດ້ສະແດງຄວາມຂອບໃຈເປັນຢ່າງສູງໃນການຕ້ອນຮັບອັນອົບອຸ່ນ ໃນການເດີນທາງມາຄັ້ງນີ້ດ້ວຍ. (ຂ່າວ: ຍຸພິນທອງ)