ປີໜ້າ ຈະມີນັກທ່ອງທ່ຽວຈີນ ເຂົ້າປະເທດເຮົາ ປະມານ 1 ລ້ານເທື່ອຄົນ


...

28.11.2018 9:02     

   ປີ 2019 ຈະເປີດປີທ່ອງທ່ຽວ ລາວ-ຈີນ ຄາດຄະເນວ່າ ຈະມີນັກທ່ອງທ່ຽວຈີນເຂົ້າມາທ່ຽວລາວບໍ່ຕາໍ່ກວ່າ 1 ລ້ານເທື່ອຄົນ, ຂະນະທີ່ໂຕເລກນັກທ່ອງທ່ຽວເຂົ້າມາລາວ ປີ 2018 ນີ້ ຈະບັນລຸພຽງແຕ່ 4 ລ້ານກວ່າເທື່ອຄົນ ຊຶ່ງຕາໍ່ກວ່າເປົ້າໝາຍທີ່ວາງໄວ້. ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ລາຍງານຕໍ່ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ VIII ເມື່ອວັນທີ 27 ພະຈິກ ພາຍ ໃຕ້ການເປັນປະທານຂອງທ່ານ ສົມພັນ ແພງຄຳມີ ຮອງປະທານສະພາແຫ່ງຊາດ ໃຫ້ຮູ້ວ່າ: ໃນປີ 2018 ຈຳນວນນັກທ່ອງທ່ຽວ ທີ່ເຂົ້າມາທ່ຽວລາວ ອາດຈະບັນລຸ 4 ລ້ານກວ່າເທື່ອຄົນ ຊຶ່ງຕາໍ່ກວ່າເປົ້າໝາຍທີ່ຕັ້ງໄວ້ຄື 5 ລ້ານເທື່ອຄົນ. ໃນຂະນະທີ່ 6 ເດືອນຕົ້ນປີ 2018 ມີນັກທ່ອງທ່ຽວເຂົ້າມາລາວ 2,1 ລ້ານກວ່າເທື່ອຄົນ ແຕ່ມາໃນໄລຍະໜຶ່ງ ໄດ້ເກີດມີໄພພິບັດທາງທຳມະຊາດ ຢ່າງຮຸນແຮງຢູ່ຫຼາຍແຂວງ ຊຶ່ງໄດ້ສົ່ງຜົນກະທົບຕໍ່ການທ່ອງທ່ຽວ, ມາຮອດເດືອນ ກັນຍາ ປີ 2018 ມີນັກທ່ອງທ່ຽວເຂົ້າມາລາວ 2,9 ລ້ານກວ່າເທື່ອຄົນ ແລະ ອີກ 3 ເດືອນທ້າຍ ປີ ຄາດວ່າຈະມີນັກທ່ອງທ່ຽວ ຈຳນວນເພີ່ມຂຶ້ນ ລວມໝົດປີ ຄາດວ່າຈະບໍ່ຕາໍ່ກວ່າ 4 ລ້ານເທື່ອຄົນ. ສຳລັບສາເຫດເຮັດໃຫ້ຈຳນວນນັກທ່ອງທ່ຽວຫຼຸດລົງ ແລະ ບໍ່ບັນລຸຕາມແຜນການນັ້ນ, ທ່ານລັດຖະມົນຕີ ໄດ້ຍົກໃຫ້ເຫັນເຖິງສາເຫດນອກຕົວ ແລະ ໃນຕົວ, ໂດຍສະເພາະ ແມ່ນເກີດມີໄພພິບັດທາງທຳມະຊາດທີ່ຮ້າຍແຮງ, ບັນດາຂອດອຳນວຍຄວາມສະດວກ ໃນການພັດທະນາການທ່ອງທ່ຽວຍັງບໍ່ທັນແກ້ໄຂໄດ້ດີເທົ່າທີ່ຄວນ, ການພັດທະນາພື້ນຖານໂຄງລ່າງ ຖະໜົນຫົນທາງໄປສູ່ ແຫຼ່ງທ່ອງທ່ຽວ ຍັງມີລັກສະນະຊັກຊ້າ ຍ້ອນງົບປະມານບໍ່ພຽງ ພໍ, ການບໍລິການຂົນສົ່ງນັກທ່ອງທ່ຽວທາງອາກາດກໍມີຈຳ ນວນຈຳກັດ ເພາະບໍ່ສາມາດຂະຫຍາຍສາຍການບິນຕາມຄວາມຮຽກຮ້ອງຕ້ອງການ, ການປັບປຸງແຫຼ່ງທ່ອງທ່ຽວຕ່າງໆ ຢູ່ບັນດາແຂວງຍັງຊັກຊ້າ ແລະ ການບໍລິການອຳນວຍຄວາມສະດວກຢູ່ປະເທດເຮົາໃນການ ເຂົ້າ-ອອກເມືອງ ລວມທັງການອຳນວຍຄວາມສະດວກໄປທ່ຽວຈຸດຕ່າງໆ ເຫັນວ່າມີຄວາມຊັກຊ້າຫຼາຍ ເຖິງວ່າໄລຍະຜ່ານມາຈະມີການປັບປຸງແລ້ວກໍຕາມ. ທ່ານ ລັດຖະມົນຕີ ຖວທ ກ່າວອີກວ່າ: ປີ 2019 ຈະເປີດປີທ່ອງທ່ຽວລາວ-ຈີນ ຊຶ່ງຈະເຮັດໃຫ້ນັກທ່ອງທ່ຽວຈີນເຂົ້າມາທ່ຽວລາວເພີ່ມຂຶ້ນຈາກ 4 ແສນກວ່າເທື່ອຄົນໃນປີນີ້ ເພີ່ມຂຶ້ນເປັນ 1 ລ້ານເທື່ອຄົນ ຊຶ່ງຈະເຮັດໃຫ້ໂຕເລກນັກທ່ອງທ່ຽວເຂົ້າມາທ່ຽວລາວທັງໝົດບໍ່ຕ່ຳກວ່າ 5 ລ້ານເທື່ອຄົນ. (ຂ່າວ: ຄຳເຮືອງ-ພາບ: ສຸກສາຄອນ)