ກະຊວງ ຍທຂ ມອບເຄື່ອງໃຫ້ກອງພົນທີ 1


...

11.01.2019 9:02     

   ທ່ານ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ) ໄດ້ນຳພາຄະນະ ເດີນທາງໄປຢ້ຽມຢາມ ແລະ ມອບເຄື່ອງ ໃຫ້ກອງພົນທີ 1 ຢູູ່ບ້ານນາມອນ ເມືອງວັງວຽງ ແຂວງ ວຽງຈັນ ເນ່ືອງໃນໂອກາດສ້າງຂະບວນການຕ້ອນຮັບວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ເມື່ອວັນທີ 9 ມັງກອນ ຜ່ານມາ, ໂດຍການຕ້ອນຮັບຂອງທ່ານ ພັນເອກ ສາຍໃຈ ກົມມະສິດ ຫົວໜ້າກອງພົນທີ 1 ແລະ ພ້ອມດ້ວຍນາຍ ແລະ ພົນທະຫານ. ຈຸດປະສົງໃນການຢ້ຽມຢາມແລະ ມອບເຄື່ອງ ໃນຄັ້ງນີ້ ແມ່ນເປັນການປະກອບສ່ວນສ້າງຂະບວນການ ກິດຈະກຳກິລາ ຂອງນາຍ ແລະ ພົນທະຫານ ໃຫ້ເປັນຂະບວນຟົດຟື້ນ. ເຄື່ອງທີ່ນຳມາມອບໃນຄັ້ງນີ້ປະກອບມີ ຄອມພິວເຕີ ແລະ ເຄິື່ອງພິມ 3 ຊຸດ, ເຄື່ອງນຸ່ງກິລາ 50 ຊຸດ, ບານເຕະ 11 ໜ່ວຍ, ບານສົ່ງ 10 ໜ່ວຍ, ກະຕໍ້ 15 ໜ່ວຍ, ເຄື່ອງບໍລິໂພກຈຳນວນໜຶ່ງ ແລະ ອຸປະກອນກິລາອື່ນໆອີກລວມມູນຄ່າ 46 ລ້ານກວ່າກີບ . ໃນໂອກາດດັ່ງກ່າວ ທ່ານ ລັດຖະມົນຕີ ໄດ້ມີຄຳເຫັນບາງຕອນວ່າ: ເພື່ອສະແດງເຖິງຄວາມເຄົາລົບນັບຖື, ຮູ້ບຸນຄຸນ ແລະ ເປັນການໃຫ້ກໍາລັງໃຈຕໍ່ການປະຕິບັດໜ້າທີ່ອັນສໍາຄັນ ແລະ ຫຍຸ້ງຍາກສັບສົນ, ແຕ່ມີກຽດອັນສູງສົ່ງ ຂອງກອງທັບປະຊາຊົນລາວ ເພື່ອຜົນປະໂຫຍດຂອງປະເທດຊາດ ຂອງປະຊາຊົນ ກໍຄືຂອງພັກປະຊາຊົນປະຕິວັດລາວພວກເຮົາ, ຄະນະພັກ-ຄະນະນໍາ ແລະ 3 ອົງການຈັດຕັ້ງມະຫາຊົນ ໂດຍຕາງໜ້າໃຫ້ສະມາຊິກພັກ, ພະນັກງານ, ກໍາມະກອນ ທົ່ວກະຊວງໂຍທາທິການ ແລະ ຂົນສົ່ງ, ຂໍນໍາເອົາກະຕ່າດອກໄມ້, ເຄື່ອງໃຊ້ຫ້ອງການ, ວັດຖຸອຸປະກອນ ແລະ ເງິນສົດ ລວມເປັນເງິນທັງໝົດຈໍານວນ 46 ລ້ານກວ່າກີບ ເພື່ອຊຸກຍູ້ ອວຍພອນໄຊອັນປະເສີດ ແລະທັງເປັນການປະກອບສ່ວນໃຫ້ກໍາລັງໃຈແກ່ນາຍ ແລະ ພົນທະຫານກອງພົນທີ 1 ທີ່ໄດ້ປະຕິບັດໜ້າທີ່ວຽກງານອັນສໍາຄັນໜັກໜ່ວງ ໃນໄລຍະຜ່ານມາ, ພ້ອມທັງຂໍຝາກຄວາມຢື້ຢາມຖາມຂ່າວ ຜ່ານບັນດາສະຫາຍຄະນະພັກ, ຄະນະບັນຊາກອງພົນ ໄປຍັງອ້າຍເອື້ອຍນ້ອງທີ່ປະຈໍາການຢູ່ແນວໜ້າ ແລະ ຜູ້ທີ່ຍັງພັກປິ່ນປົວຢູ່ໂຮງໝໍ ຕະຫຼອດເຖິງພະນັກງານອາວຸໂສບໍານານ ນັກຮົບເກົ່າ ພ້ອມດ້ວຍຄອບຄົວທຸກຖ້ວນໜ້າ ຈົ່ງຫາຍຈາກພະຍາດໂລຄາ, ມີສຸຂະພາບແຂງແຮງ, ສືບຕໍ່ເຮັດໜ້າທີ່ການເມືອງທີ່ພັກ-ລັດ ແລະ ປະຊາຊົນມອບໝາຍ ໃຫ້ສໍາເລັດຜົນອັນໃໝ່ຍິ່ງໃຫຍ່ກ່ວາເກົ່າ. ທ່ານພັນເອກ ສາຍໃຈ ກົມມະສິດ ໄດ້ຕາງໜ້າໃຫ້ ນາຍ ແລະ ພົນທະຫານ ຂໍສະແດງຄວາມຂອບໃຈເປັນຢ່າງສູງ ຕໍ່ການນຳ, ພະນັກງານ ແລະ ກຳມະກອນທຸກຖ້ວນໜ້າຂອງ ກະຊວງ ຍທຂ ທີ່ໄດ້ນຳເອົາວັດຖຸ ສິ່ງຂອງມາມອບໃຫ້ກອງພົນທີ 1 ໃນຄັ້ງນີ້ ແລະ ອວຍພອນໃຫ້ການນຳ, ພະນັກງານ ກຳມະກອນ ກະຊວງ ຍທຂ ຈົ່ງປະສົບຜົນສຳເລັດໜ້າທີ່ ທີ່ພັກ-ລັດມອບໝາຍໃຫ້. (ຂ່າວ: ສະຫວັນຄຳ)