ສະຫຼອງວັນສ້າງຕັ້ງກຳລັງປ້ອງກັນທີ່ຕັ້ງຄົບຮອບ 25 ປີ


...

11.01.2019 9:08     

   ພິທີໂຮມຊຸມນຸມສະເຫຼີມ ສະຫຼອງວັນສ້າງຕັ້ງກຳລັງປ້ອງກັນທີ່ຕັ້ງ ຄົບຮອບ 25 ປີ (10 ມັງກອນ 1994 10 ມັງກອນ 2019) ໄດ້ຈັດຂຶ້ນເມື່ອວັນທີ 10 ມັງກອນ ນີ້ ທີ່ສະໂມສອນໃຫຍ່ ກຳລັງປ້ອງກັນທີ່ຕັ້ງ ໂດຍໃຫ້ກຽດເຂົ້າຮ່ວມຂອງທ່ານ ພົນຕີ ສິນທະວົງ ໄຊຍະກອນ ກຳມະການສູນກາງພັກ ຮອງລັດຖະມົນຕີກະຊວງປ້ອງກັນຄວາມສະຫງົບ ຊຶ່ງມີຄະນະພັກ, ຄະນະບັນຊາ, ພະນັກງານຫຼັກແຫຼ່ງ ແລະ ແຂກຖືກເຊີນເຂົ້າຮ່ວມ. ທ່ານ ພັນເອກ ຍໍລະວົງສາ ຄະນະພັກກະຊວງ ເລຂາຄະນະພັກ ຫົວໜ້າກອງບັນຊາການປ້ອງກັນທີ່ຕັ້ງໄດ້ກ່າວໃຫ້ຮູ້ເຖິງປະຫວັດພື້ນຖານແຫ່ງການກຳເນີດ ແລະ ເຕີບໃຫຍ່ຂະຫຍາຍຕົວຂອງກຳລັງປ້ອງກັນທີ່ຕັ້ງ, ຜົນງານ ແລະ ໄຊຊະນະໃນໄລຍະປົກປັກຮັກສາ ແລະ ສ້າງສາປະເທດຊາດຂອງກຳລັງປ້ອງກັນທີ່ຕັ້ງ ແລະ ສືບຕໍ່ເສີມຂະ ຫຍາຍມູນເຊື້ອຂອງກຳລັງປ້ອງກັນທີ່ຕັ້ງ, ກຳລັງປ້ອງກັນທີ່ຕັ້ງມີປະຫວັດການເຕີບໃຫຍ່ຂະຫຍາຍຕົວມາຈາກກອງພັນ 15 ກອງທັບປົດປ່ອຍປະຊາຊົນລາວທີ່ຕິດພັນກັບຂະບວນການຕໍ່ສູ້ຕ້ານຈັກກະພັດຜູ້ຮຸກຮານທັງເກົ່າ ແລະ ໃໝ່ ໄດ້ເຄື່ອນໄຫວຢືນຢູ່ຄຽງຂ້າງກັບສູນກາງພັກ ກັບກຳລັງປ້ອງກັນຄວາມສະຫງົບເຮັດໜ້າທີ່ຂົນຂວາຍຮາກຖານປະຊາຊົນພ້ອມທັງປະກອບສ່ວນຢ່າງຕັ້ງໜ້າເຂົ້າໃນການປົກປັກຮັກສາໝາກຜົນຂອງການປະຕິວັດ. ໃນໂອກາດເຂົ້າຮ່ວມໃນຄັ້ງນີ້ ທ່ານ ພົນຕີ ສິນທະວົງ ໄຊຍະກອນ ໄດ້ໃຫ້ກຽດໂອ້ລົມ ກ່ອນອື່ນໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການເຕີບໃຫຍ່ຂະຫຍາຍຕົວຂອງກຳລັງປ້ອງກັນທີ່ຕັ້ງໃນໄລຍະທີ່ຜ່ານມາ ແລະ ເພື່ອສືບຕໍ່ມູນ ເຊື້ອດັ່ງກ່າວໃນຕໍ່ໜ້າໃຫ້ໄດ້ຮັບຜົນສຳເລັດຂຶ້ນເປັນກ້າວໆ ຕ້ອງເອົາໃຈໃສ່ເຄື່ອນໄຫວວຽກງານສຶກສາອົບຮົມນຳພາການເມືອງແນວຄິດ ເພື່ອສ້າງຖັນແຖວພະນັກງານນັກຮົບໃຫ້ມີຄວາມອຸ່ນອ່ຽນທຸ່ນທ່ຽງມີຄວາມເກັ່ງກ້າສາມາດ, ຄ່ອງແຄ້ວ, ວ່ອງໄວໃນການປະຕິບັດໜ້າທີ່ວິຊາສະເພາະຂອງຕົນ, ມີຄຸນສົມບັດສິນທຳປະຕິວັດ, ມີແບບແຜນດຳລົງຊີວິດ ແລະ ເຮັດວຽກທີ່ປອດໃສ, ຊື່ສັດບໍລິສຸດ, ມີລະບຽບວິໄນເຂັ້ມງວດ, ມີນໍ້າໃຈເສຍສະຫຼະ, ມີຄວາມຮັບຜິດຊອບສູງເຮັດໜ້າທີ່ການເມືອງທີ່ພັກລັດ ການຈັດຕັ້ງມອບໝາຍໃຫ້້ມີຜົນສຳເລັດ, ຕ້ອງເພີ່ມທະວີການຄຸ້ມຄອງກຳລັງພົນຂອງເລົ່ານັກຮົບວິຊາສະເພາະຕ່າງໆໃນການປະຈຳການກຽມພ້ອມສູ້ຮົບໃຫ້ເຂັ້ມງວດ, ຕ້ອງມີການຄົ້ນຄິດຄົ້ນຄວ້າປັບປຸງກົນລະຍຸດຍຸດທະວິທີໃນການຕໍ່ສູ້ວາງແຜນປ້ອງກັນສະກັດກັ້ນ ການກໍຄວາມບໍ່ສະຫງົບຮູບແບບຕ່າງໆໃນສັງຄົມ, ຕ້ອງມີການຄົ້ນຄວ້າວາງແຜນຄາດກະ, ຕິດຕາມສະພາບກຳແໜ້ນວຽກປ້ອງກັນຊາດປ້ອງກັນຄວາມສະຫງົບຂອງພັກ ກໍຄືຂອງກະຊວງປ້ອງກັນຄວາມສະຫງົບໃນໄລຍະໃໝ່, ເອົາໃຈໃສ່ບູລະ ນະປົກປັກຮັກສາພື້ນຖານໂຄງ ລ່າງທີ່ມີແລ້ວ, ສືບຕໍ່ປັບປຸງ ລະບົບການຈັດຕັ້ງແຕ່ລະຂັ້ນໃຫ້ໜັກແໜ້ນ, ສົມເຫດ, ສົມຜົນ ແລະ ສ້າງພະນັກງານສືບທອດປ່ຽນແທນໄປຕາມທິດລວມຂອງພັກ, ສອດຄ່ອງກັບແຜນກຳນົດ, ທັງຮັບປະກັນ 3 ຮຸ້ນ, ເພດ, ເຜົ່າ ເພື່ອໃຫ້ໄດ້ຜູ້ທີ່ມີຄວາມຮູ້, ຄວາມສາມາດໃນການຊີ້ນຳບັນຊາກຳລັງເຮັດສຳເລັດໜ້າທີ່ວຽກງານ, ສືບຕໍ່ດຳເນີນການພົວພັນຍາດແຍ່ງເອົາການຮ່ວມມືຊ່ວຍເຫຼືອທາງດ້ານການສຶກສາອຸປະກອນ ເຕັກນິກ, ຍຸດທະວິທີຕ່າງໆນຳຕຳຫຼວດເພື່ອນມິດຍຸດທະສາດເປັນຕົ້ນແມ່ນກອງບັນຊາການຕຳຫຼວດເຄື່ອນທີ່ກະຊວງຕຳຫຼວດ ສສ ຫວຽດນາມ ເພື່ອຖອດຖອນບົດຮຽນແລກປ່ຽນຄະນະຜູ້ແທນປະສານສົມທົບດ້ານ ຕ່າງໆເພື່ອນຳເອົາບົດຮຽນມາພັດທະນາກຳລັງຂອງພວກເຮົາໃຫ້ກ້າວໜ້າທັນສະໄໝເທົ່າທຽມກັບນາໆປະເທດ. (ຂ່າວ: ສຳນານ)