ປາຖະກະຖາວັນເກີດຂອງປະທານ ກິມເຈິງອິນ ຄົບຮອບ 77 ປີ


...

07.02.2019 9:31     

   ສະຖານເອກອັກຄະລັດຖະທູດແຫ່ງ ສປປ ເກົາຫຼີ ຮ່ວມກັບສະມາຄົມມິດຕະພາບລາວ-ສປປ ເກົາຫຼີ ໄດ້ຈັດພິທີປາຖະກະຖາ ເນື່ອງໃນໂອກາດວັນເກີດຂອງປະທານ ກິມເຈິງອິນ ຄົບຮອບ 77 ປີ (16/2/1942-16/2/2019), ວາງສະແດງຮູບພາບ, ສາຍວີດີໂອ ແລະ ປາຖະກະຖາ ກ່ຽວກັບບົດບາດການນຳພາຂອງປະທານ ກິມເຈິງອິນ ຜູ້ນຳທີ່ຍິ່ງໃຫຍ່ຂອງ ປະຊາຊົນ ສປປ ເກົາຫຼີ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຂຶ້ນໃນວັນທີ 6 ກຸມພານີ້ ທີ່ວິທະຍາຄານສັນຕິບານປະ ຊາຊົນ ໂດຍມີ ສະຫາຍ ສົມດີ ບຸນຄຸ້ມ ຮອງຫົວໜ້າຄະນະພົວພັນຕ່າງປະເທດສູນກາງພັກ, ຄະນະອຳນວຍການ, ຄູ-ອາຈານ ແລະ ນັກສຶກສາ ວິທະຍາຄານສັນຕິບານປະ ຊາຊົນ ແລະ ພາກສ່ວນກ່ຽວ ຂ້ອງເຂົ້າຮ່ວມ. ສະຫາຍ ລີຢົງຊົນ ເອກອັກຄະລັດຖະທູດຜູ້ມີອຳນາດເຕັມ ແຫ່ງ ສປປ ເກົາຫຼີ ປະຈຳ ສປປ ລາວ ໄດ້ກ່າວເຖິງບົດບາດການນຳພາຂອງປະທານ ກິມເຈິງອິນ ຜູ້ນຳທີ່ຍິ່ງໃຫຍ່ຂອງປະຊາຊົນ ສປປ ເກົາຫຼີ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນໄລຍະຜ່ານມາ ເພື່ອເຮັດໃຫ້ພະນັກງານ, ນາຍຕຳຫຼວດ, ຄູ-ອາຈານ ແລະ ນັກສຶກສາ ທິ່ວິທະຍາຄານສັນຕິບານປະ ຊາຊົນ ໄດ້ຮັບຮູ້ເຖິງສະພາບການພັດທະນາຂອງ ສປປ ເກົາຫຼີ ພາຍໃຕ້ການນຳພາຂອງພັກແຮງງານເກົາຫຼີ ບົນເສັ້ນທາງສູ່ຈຸດໝາຍສັງຄົມນິຍົມ, ພ້ອມດຽວກັນນີ້ກໍ່ຍັງໄດ້ຍົກໃຫ້ເຫັນເຖິງສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ ແລະ ສປປ ເກົາຫຼີ ທີ່ໄດ້ຮັບການເສີມຂະຫຍາຍຢ່າງຕໍ່ເນື່ອງ, ປະກອບສ່ວນເຂົ້າໃນພາລະກິດເສີມສ້າງສັນຕິພາບ, ມິດຕະພາບ ແລະ ການຮ່ວມມືໃນຂົງເຂດ ແລະ ໃນໂລກ. (ພາບ: ບຸນຕອມ-ຂ່າວ: ຄຕພ)