ກະຊວງຍຸຕິທຳເຊື່ອມຊຶມມະຕິ 7 ສະໄໝທີ X ຂອງພັກ


...

08.02.2019 9:47     

   ກະຊວງຍຸຕິທຳໄດ້ຈັດຕັ້ງກອງປະຊຸມເຊື່ອມຊຶມເອກະສານມະຕິກອງປະຊຸມຄົບຄະນະຄັ້ງທີ 7 ຂອງຄະນະບໍລິຫານງານສູນກາງພັກ ສະໄໝທີ X ຊຶ່ງໄດ້ຈັດຂຶ້ນໃນວັນທີ 7 ກຸມພານີ້, ທີ່ກະຊວງດັ່ງກ່າວ, ໂດຍການເປັນປະທານ ແລະ ໃຫ້ກຽດເຜີຍແຜ່ເອກະສານຂອງສະຫາຍ ໄຊສີ ສັນຕິວົງ , ລັດຖະມົນຕີກະຊວງ ຍຸຕິທຳ, ຊຶ່ງມີພະນັກງານການນຳ ແລະ ລັດຖະກອນ ອອ້ມຂ້າງກະຊວງເຂົ້າຮ່ວມ. ເອກະສານທີ່ນຳມາເຜີຍແຜ່ໃນຄັ້ງນີ້: ມີເອກະສານມະຕິເລກທີ 057/ ຄບສພ, ລົງວັນທີ 19 ທັນວາ 2018 ວ່າດ້ວຍການເພີ່ມທະວີການນຳພາແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງຂອງການຄຸ້ມຄອງມະຫາພາກ, ເອກະສານເລກທີ 056/ຄບສພ, ລົງວັນທີ 19 ທັນວາ 2018 ວ່າດ້ວຍການປັບປຸງຮາກຖານການເມືອງຂອງລະບອບປະຊາທິປະໄຕ ປະຊາຊົນໃຫ້ເຂັ້ມແຂງ ແລະ ໜັກແໜ້ນ. ກອງປະຊຸມຄັ້ງນີ້ຈັດຂຶ້ນເພື່ອເປັນການສ້າງຄວາມຮັບຮູ້, ເຂົ້າໃຈ ແລະ ກຳແໜ້ນບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ສິ່ງທ້າທາຍຂອງການຄຸ້ມຄອງມະຫາພາກ, ຮັບຮູ້ເຂົ້າໃຈຢ່າງຖຶກຕ້ອງລະບົບຮາກຖານການເມືອງຂອງລະບອບປະຊາທິປະໄຕ ປະຊາຊົນ, ພ້ອມກັນຄົ້ນຄວ້າຊອກຫາດ້ານດີ, ດ້ານອ່ອນຂໍ້ຄົງຄ້າງ ພ້ອມດ້ວຍສາເຫດຂອງຂະແໜງຍຸຕິທຳ ບົນພື້ນຖານການຍົກສູງຄວາມເປັນເຈົ້າການ ແລະ ຄວາມຮັບຜິດຊອບດ້ານການເມືອງຮ່ວມກັບພັກ-ລັດໃນການແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ສືບຕໍ່ປັບປຸງຮາກຖານການເມືອງຂອງຂະແໜງພວກເຮົາ, ສ້າງການຫັນປ່ຽນໃໝ່ທີ່ເປັນການກະທຳຕົວຈິງໃນການສືບຕໍ່ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກໃຫ້ບັນລຸຄາດໝາຍທີ່ກຳນົດໄວ້. (ຂ່າວ-ພາບ: ພູວັນ)