ກຊສ ເຊື່ອມຊຶມມະຕິ 7 ສະໄໝທີ X ຂອງພັກ


...

11.02.2019 9:59     

   ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ (ກຊສ) ໄດ້ຈັດກອງປະຊຸມເຜີຍແຜ່ ເຊື່ອມຊຶມ ມະຕິກອງປະຊຸມ ຄົບຄະນະຄັ້ງທີ 7 ຂອງຄະນະບໍລິຫານງານສູນກາງພັກ ສະໄໝທີ X, ໃນວັນທີ 7 ກຸມພານີ້ ທີ່ກະຊວງດັ່ງກ່າວ ພາຍໃຕ້ການເປັນປະທານ ຂອງ ທ່ານ ສົມມາດ ພົນເສນາ ກໍາມະການສູນກາງພັກ ເລຂາຄະນະພັກ ລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ມີຄະນະພັກ-ຄະນະນໍາ ພ້ອມດ້ວຍສະມາຊິກພັກ, ພະນັກງານຫຼັກແຫຼ່ງເຂົ້າຮ່ວມຮັບຟັງ. ການເຜີຍແຜ່ຄັ້ງນີ້ ປະ ກອບມີສອງເອກະສານ ຄື: (1) ມະຕິ ຂອງຄະນະບໍລິຫານງານສູນກາງພັກ ສະບັບເລກທີ 057/ຄບສພ, ລົງວັນທີ 19 ທັນວາ 2018 ວ່າດ້ວຍການເພີ່ມທະວີການນຳພາແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງ ຂອງການຄຸ້ມຄອງມະຫາພາກ. ຊຶ່ງສະເໜີໂດຍ ທ່ານ ນາງບົວຄໍາ ວໍລະຈິດ, ກໍາມະການສໍາຮອງສູນກາງພັກ, ປະທານກວດກາພັກ, ຮອງລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ. ເອກະສານທີ (2) ມະຕິ ຂອງຄະນະບໍລິຫານງານສູນກາງພັກ ສະບັບເລກທີ 056/ຄບສພ, ລົງວັນທີ 19 ທັນວາ 2018 ວ່າດ້ວຍການປັບປຸງຮາກຖານການເມືອງ ຂອງ ລະບອບ ປະຊາທິປະໄຕ ປະຊາຊົນ ໃຫ້ເຂັ້ມແຂງ ແລະ ໜັກແໜ້ນ, ສະເໜີໂດຍ ທ່ານ ບຸນມີ ພຸດທະວົງ, ຮອງເລຂາຄະນະພັກ, ຮອງລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ. ຈຸດປະສົງຂອງການເຜີຍແຜ່ ເພື່ອໃຫ້ສະມາຊິກພັກ, ພະນັກງານ-ລັດຖະກອນ ຕະຫຼອດຮອດອົງການຈັດຕັ້ງມະຫາຊົນ ທົ່ວ ກຊສ ໄດ້ຮັບຮູ້, ເຂົ້າໃຈແຈ້ງຕື່ມກ່ຽວກັບວຽກ ງານຮາກຖານການເມືອງ,ສ້າງ ລະບອບ ປະຊາທິປະໄຕ ປະຊາ ຊົນ ໃຫ້ມີຄວາມເຂັ້ມແຂງ ແລະ ໜັກແໜ້ນ, ໃນການນຳພາ-ຊີ້ນຳ ເຂົ້າສູ່ຂົງເຂດວຽກງານ ໂດຍສະເພາະແມ່ນການເພີ່ມທະວີການນຳພາ ເຂົ້າໃນການແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງເຂົ້າສູ່ການຄຸ້ມຄອງມະຫາພາກ ທີ່ກຳລັງປະເຊີນໜ້າຢູ່; ພ້ອມທັງເປີດໂອກາດໃຫ້ແກ່ຜູ້ທີ່ເຂົ້າຮ່ວມກອງປະຊຸມໄດ້ພ້ອມກັນສຸມຈິດສຸມໃຈຄົ້ນຄວ້າຊອກຫາບັນຫາທີ່ເປັນແກນກາງ ແລະ ສະເໜີວິທີການແກ້ໄຂບັນຫາຢ່າງເໝາະສົມ. ຕອນທ້າຍຂອງກອງປະ ຊຸມ, ທ່ານ ສົມມາດ ພົນເສນາ ຍັງໄດ້ເນັ້ນໜັກໃຫ້ ຄະນະພັກ-ຄະນະນໍາແຕ່ລະຂັ້ນ ຖືສໍາຄັນ ແລະ ຍົກສູງຄວາມຮັບຜິດຊອບໂດຍກົງ ເພື່ອພ້ອມກັນຈັດຕັ້ງປະຕິບັດໃຫ້ໄດ້ຮັບຜົນສໍາເລັດແຕ່ລະດ້ານ. ( ຂ່າວ: ແສງຈັນ)