ລາວ-ການາດາ ລົງນາມ ວ່າດ້ວຍການປຶກສາຫາລືດ້ານການເມືອງ


...

11.02.2019 10:01     

   ກະຊວງການຕ່າງປະເທດແຫ່ງສປປລາວ ແລະ ກະຊວງການຕ່າງປະເທດການາດາໄດ້ລົງນາມບົດບັນທຶກຄວາມເຂົ້າ ໃຈວ່າດ້ວຍການປຶກສາຫາລືດ້ານການເມືອງ ແລະ ການຮ່ວມມື ເພີ່ມທະວີການພົວພັນຮ່ວມມື ໂດຍສະເພາະແມ່ນການຮ່ວມມືໃນດ້ານວຽກງານເກັບກູ້ລະເບີດທີ່ບໍ່ທັນແຕກ, ການສຶກສາ. ພິທີລົງນາມດັ່ງກ່າວຈັດຂຶ້ນໃນວັນທີ 8 ກຸມພາ, ທີ່ກະ ຊວງການຕ່າງປະເທດ ຮ່ວມລົງນາມໂດຍທ່ານ ແສງເພັດ ຮຸ່ງບຸນຍວງ ຮອງລັດຖະມົນຕີກະຊວງການຕ່າງປະເທດ, ທ່ານ ນາງ ໂດນີກາ ພອດທີ (Ms Donica Pottie) ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງການາດາ ປະຈຳລາວໂດຍມີສຳນັກງານຕັ້ງຢູ່ບາງກອກປະເທດໄທ, ພ້ອມດ້ວຍພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ. ໃນໂອກາດອັນມີຄວາມໝາຍສຳຄັນນີ້ ທັງສອງຝ່າຍໄດ້ສະແດງຄວາມຍິນດີ ແລະ ຕີລາຄາສູງຕໍ່ການລົງນາມໃນບົດບັນທຶກຄວາມເຂົ້າໃຈວ່າດ້ວຍການປຶກສາຫາລືດ້ານການເມືອງ ແລະ ການຮ່ວມມືຊຶ່ງຖືເປັນການຊຸກຍູ້ ແລະ ເພີ່ມທະວີການພົວພັນຮ່ວມມືແບບສອງຝ່າຍ ແລະ ຫຼາຍຝ່າຍໃຫ້ກວ້າງຂວາງ ແລະ ມີປະສິດທິຜົນຂຶ້ນຕື່ມໂດຍສະເພາະແມ່ນການຮ່ວມມືໃນດ້ານວຽກງານເກັບກູ້ລະເບີດທີ່ບໍ່ທັນແຕກ, ການສຶກສາ ແລະ ການພົວພັນຮ່ວມມືລະຫວ່າງການາດາອາຊຽນ, ການສະໜັບສະໜູນຊຶ່ງກັນ ແລະ ກັນໃນເວທີພາກພື້ນກໍຄືສາກົນ, ສປປລາວ ແລະ ການາດາໄດ້ສ້າງຕັ້ງສາຍພົວ ພັນທາງການທູດນຳກັນໃນວັນທີ 15 ມິຖຸນາ 1974 ແລະ ໃນເດືອນສິງຫາ 2015 ການາດາໄດ້ເປີດຫ້ອງການຕາງໜ້າການທູດການາດາທີ່ນະຄອນຫຼວງວຽງຈັນ. (ຂ່າວພາບ : ສຸກສາຄອນ)