ສະຫຼຸບປີທ່ອງທ່ຽວລາວ 2018


...

12.02.2019 9:22     

   ພິທີສະຫຼຸບປີທ່ອງທ່ຽວ ລາວ 2018 ໄດ້ຈັດຂຶ້ນເມື່ອວັນທີ 11 ກຸມພານີ້ ທີ່ຫໍວັດທະ ນະທຳແຫ່ງຊາດ ໂດຍໃຫ້ກຽດເຂົ້າຮ່ວມຂອງທ່ານ ສອນໄຊ ສີພັນດອນ ຮອງນາຍົກລັດ ຖະມົນຕີ ປະທານຄະນະຊີ້ນຳ ລະດັບຊາດ ໃນການຈັດປິີທ່ອງທ່ຽວລາວ 2018, ມີພາກສ່ວນທີ່ກ່ຽວຂ້ອງ ແລະ ແຂກຖືກເຊີນເຂົ້າຮ່ວມ. ໃນພິທີ, ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຮອງປະທານ, ຜູ້ປະຈຳການຄະນະ ຊີ້ນຳລະດັບຊາດ ໃນການຈັດປີ ທ່ອງທ່ຽວລາວ 2018 ໄດ້ກ່າວລາຍງານກ່ຽວກັບການຈັດຕັ້ງປະຕິບັດກິດຈະກຳສົ່ງເສີມປີທ່ອງທ່ຽວລາວ 2018 ຊຶ່ງໄດ້ ຍົກໃຫ້ເຫັນວ່າ: ຕະຫຼອດປີ 2018 ຜ່ານມາໄດ້ມີການຈັດກິດຈະກຳສົ່ງເສີມການທ່ອງທ່ຽວຢ່າງຕັ້ງ ໜ້າ ແລະ ຄຶກຄື້ນໃນທົ່ວປະ ເທດ, ຢູ່ບັນດາແຂວງກໍໄດ້ສ້້າງກິດຈະກຳການທ່ອງທ່ຽວພາຍໃນແຂວງ ຕະຫຼອດຮອດຂັ້ນເມືອງຕາມສະພາບທ່າແຮງດ້ານການທ່ອງທ່ຽວຂອງຕົນຢ່າງເປັນຂະບວນຟົດຟື້ນ ເພື່ອຊຸກຍູ້ການຈັດປີທ່ອງທ່ຽວລາວ 2018, ລັດຖະບານກໍໄດ້ໃຫ້ຄວາມສຳຄັນເປັນພິເສດໂດຍໄດ້ສະໜອງງົບປະມານ ແລະ ມີນະໂຍບາຍພິເສດຈຳນວນໜຶ່ງເຊັ່ນ: ໄດ້ຍົກເວັ້ນຄ່າທຳນຽມວິຊາໃຫ້ແກ່ 4 ປະເທດ ໃນໄລ ຍະປີທ່ອງທ່ຽວລາວ 2018 ຄື: ປະເທດເດັນມາກ, ນອກແວ, ແຟງລັງ ແລະ ປະເທດຊູແອດ ນອກນັ້ນ ບັນດາທ່ານ ການນຳຂັ້ນສູງກໍໄດ້ໃຫ້ກຽດເຂົ້າຮ່ວມງານກິດຈະກຳ ປີທ່ອງທ່ຽວລາວທີ່ໄດ້ຈັດຂຶ້ນຢູ່ແຂວງຕ່າງໆ, ທຸກໆແຂວງໄດ້ສຳເລັດການຈັດກິດຈະກຳທ່ອງທ່ຽວຢ່າງເປັນທາງການ, ທ່ານກ່າວຕື່ມວ່າ: ຜ່ານການຈັດປີທ່ອງທ່ຽວລາວ 2018 ໄດ້ເຮັດໃຫ້ທຸກພາກສ່ວນໃນສັງຄົມລາວໄດ້ຮັບຮູ້ ແລະ ມີສ່ວນຮ່ວມໃນການພັດທະນາ ແລະ ສົ່ງເສີມການທ່ອງທ່ຽວລາວເຮົາ,ພາກທຸກລະກິດຕ່າງໆກໍໄດ້ປະກອບ ສ່ວນຢ່າງຕັ້ງໜ້າເຂົ້າໃນການລົງທຶນ, ພັດທະ ນາການທ່ອງທ່ຽວລາວ ຕາມແນວທາງນະໂຍບາຍຂອງລັດ ຄີືສົ່ງເສີມການທ່ອງທ່ຽວທາງດ້ານທຳມະຊາດ, ປະຫວັດ ສາດ ແລະ ວັດທະນະທຳອັນໄດ້ເຮັດໃຫ້ວຽກງານການທ່ອງທ່ຽວໄດ້ກາຍເປັນວຽກງານລວມຂອງທຸກຂະແໜງການ ແລະ ທ້ອງຖິ່ນໃນທົ່ວປະເທດຢ່າງແທ້ຈິງ, ປະກອບສ່ວນສ້າງເງື່ອນ ໄຂ ແລະ ທ່ວງທ່າອັນດີໃຫ້ແກ່ການເປີດປີທ່ອງທ່ຽວລາວຈີນ 2019 ໃຫ້ສາມາດດຶງດູດນັກທ່ອງທ່ຽວຈີນເຂົ້າມາລາວໃຫ້ຫຼາຍຂຶ້ນ ເພາະນັກທ່ອງທ່ຽວຈີນເປັນອັນດັບໜຶ່ງຂອງໂລກໃນການເດີນທາງທ່ອງທ່ຽວ. ໃນໂອກາດດັ່ງກ່າວຍັງໄດ້ມີການມອບລາງວັນການພັດ ທະນາການທ່ອງທ່ຽວທີ່ດີເດັ່ນ ແລະ ຍືນຍົງຂອງ ສປປ ລາວ ໃນໂອກາດເປີດປີທ່ອງທ່ຽວລາວ 2018 ຊຶ່ງປະກອບມີ: ສະຖານ ທີ່ທ່ອງທ່ຽວລວມມີ 16 ລາງວັນ, ໂຮງແຮມ 19 ລາງວັນ, ຣີສອດມີ 6 ລາງວັນ, ເຮືອນພັກແຮມມີ 5 ລາງວັນ, ບໍລິສັດທ່ອງທ່ຽວ 18 ລາງວັນ, ພະນັກງານນຳທ່ຽວ 18 ລາງວັນ, ຮ້ານອາຫານ 24 ລາງວັນ, ການທ່ອງທ່ຽວແບບປະຊາຊົນມີສ່ວນຮ່ວມ 5 ລາງ ວັນ, ເຮືອນພັກແຮມປະຊາຊົນ 5 ລາງວັນ ແລະ ພາກສ່ວນບຸກຄົນອຸປະຖຳປີທ່ອງທ່ຽວລາວ 2018 ມີ 11 ລາງວັນ ໂດຍ ໃຫ້ກຽດມອບລາງວັນຄັ້ງນີ້ໂດຍ ທ່ານ ສອນໄຊ ສີພັນດອນ. (ຂ່າວພາບ: ສຳນານ)