ທ່ານ ສະເຫຼີມໄຊ ກົມມະສິດ ນຳເງິນຊ່ວຍເຫຼືອໄປມອບໃຫ້ຜູ້ປະສົບໄພ ຢູ່ເມືອງສະໜາມໄຊ


...

12.02.2019 9:22     

   ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງ ປະເທດ ພ້ອມດ້ວຍຄະນະໄດ້ລົງເຄື່ອນໄຫວຢ້ຽມຢາມພໍ່ແມ່ປະຊາຊົນ ທີ່ໄດ້ຮັບຜົນກະ ທົບຈາກເຫດການໄພພິບັດນ້ຳຖ້ວມ ຢູ່ເມືອງສະໜາມໄຊ ແຂວງອັດຕະປື ໃນວັນທີ 6 ກຸມພາ ຜ່ານມາ ໂດຍໄດ້ຮັບການຕ້ອນຮັບຢ່າງອົບອຸ່ນຈາກອຳນາດການປົກຄອງແຂວງ, ເມືອງ ແລະ ພໍ່ແມ່ປະຊາຊົນ ເມືອງສະໜາມໄຊ. ການລົງເຄື່ອນໄຫວຢ້ຽມ ຢາມແຂວງອັດຕະປືຂອງທ່ານສະເຫຼີມໄຊ ກົມມະສິດ ພ້ອມຄະນະຄັ້ງນີ້ ເພື່ອນຳເອົາເງິນຈຳນວນ 950.000.000 ກີບ ແລະ ເຄື່ອງອຸປະໂພກບໍລິໂພກ ຈຳນວນໜຶ່ງໄປມອບໃຫ້ແກ່ປະຊາຊົນຜູ້ໄດ້ຮັບຜົນກະທົບຈາກໄພພິບັດນ້ຳຖ້ວມ ຢູ່ເມືອງສະໜາມໄຊ ແຂວງອັດຕະປື ໃນທ້າຍເດືອນກໍລະກົດ 2018 ຜ່ານມາ, ຊຶ່ງເງິນ ແລະ ເຄື່ອງດັ່ງກ່າວແມ່ນໄດ້ຮັບການປະກອບສ່ວນຈາກພີ່ນ້ອງເຊື້ອຊາດລາວຢູ່ປະເທດຕ່າງໆ, ພະນັກງານກະຊວງການຕ່າງ ປະເທດ ທັງຢູ່ພາຍໃນ ແລະ ປະຈຳການຢູ່ຕ່າງປະເທດ ແລະ ຈາກອົງການຈັດຕັ້ງສາກົນ ປະຈຳ ສປປ ລາວ ຈຳນວນໜຶ່ງ, ຕາງໜ້າໃຫ້ແກ່ອຳນາດການປົກຄອງແຂວງ ໂດຍແມ່ນ ທ່ານ ບຸນຮຽນ ແກ້ວບົວພາດ ປະທານກວດກາພັກ-ລັດແຂວງອັດຕະປື ເປັນຜູ້ກ່າວຮັບ, ພ້ອມທັງໄດ້ລາຍງານສະພາບຄວາມຄືບໜ້າໃນການແກ້ໄຂ ແລະ ຟື້ນຟູຊີວິດການເປັນຢູ່ຂອງພໍ່ແມ່ປະຊາຊົນທີ່ໄດ້ຮັບຜົນກະທົບຈາກເຫດການໄພພິບັດດັ່ງກ່າວໃຫ້ຄະນະຊາບວ່າ ມາຮອດປັດ ຈຸບັນແມ່ນໄດ້ຮັບການແກ້ໄຂໂດຍພື້ນຖານ, ປະຊາຊົນທີ່ໄດ້ຮັບຜົນກະທົບທັງໝົດແມ່ນໄດ້ຍົກຍ້າຍເຂົ້າພັກເຊົາຢູ່ເຮືອນພັກເຊົາຊົ່ວຄາວທີ່ທາງການໄດ້ຈັດສັນໃຫ້, ໄດ້ຮັບການສະ ໜອງເຂົ້າກິນ, ເງິນອຸດໜູນ, ການບໍລິການດ້ານສາທາລະນະສຸກ ແລະ ອື່ນໆ. ສຳລັບວຽກງານຈຸດສຸມໃນສະເພາະໜ້າ ແມ່ນການສ້າງເຮືອນຖາວອນ, ຟື້ນຟູພື້ນຖານໂຄງລ່າງ, ພື້ນຖານການຜະລິດ ເພື່ອຊຸກຍູ້ປະຊາຊົນຫັນເຂົ້າສູ່ການຜະລິດໂດຍໄວ ແນໃສ່ເລັ່ງປົວແປງຊີວິດການເປັນຢູ່ຂອງເຂົາເຈົ້າ ໃຫ້ເຂົ້າສູ່ສະພາບປົກກະຕິ. ໃນໂອກາດດັ່ງກ່າວ, ທ່ານລັດຖະມົນຕີກະຊວງການຕ່າງປະເທດ ກໍ່ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ອຳນາດການປົກຄອງແຂວງ ແລະ ເມືອງທີ່ໄດ້ເອົາໃຈໃສ່ ຕັ້ງໜ້າເບິ່ງແຍງຊີວິດການເປັນຢູ່ຂອງພໍ່ແມ່ປະຊາຊົນທີ່ໄດ້ຮັບຜົນກະທົບໃນຄັ້ງນີ້. ຈາກນັ້ນ ທ່ານລັດຖະມົນຕີ ແລະ ຄະນະ ຍັງໄດ້ຖືເອົາໂອກາດນີ້ລົງໄປພົບປະໂອ້ລົມ ແລະ ອວຍພອນ ນາຍ ແລະ ພົນທະຫານ ທີ່ພວມປະຈຳການຢູ່ກອງພັນ 21 ແຂວງອັດຕະປື ເນື່ອງໃນໂອກາດທີ່ທົ່ວພັກທົ່ວກອງທັບພວມສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ທີ່ມີຄວາມໝາຍອັນເລິກເຊິ່ງ ອີກດ້ວຍ. (ຂ່າວ-ພາບ: ກະຊວງການຕ່າງ ປະເທດ)