S ໜັງສືພິມ ປະຊາຊົນ

 

ຫຼາຍແຫ່ງສະເຫຼີມສະຫຼອງວັນແມ່ຍິງ ສາກົນ ຄົບຮອບ 109 ປີ


...

11.03.2019 8:54     

   ເນື່ອງໃນ ໂອກາດວັນທີ 8/3 ວັນແມ່ຍິງສາກົນ ໝູນວຽນມາບັນຈົບຄົບຮອບອີກວາລະໜຶ່ງ, ຫຼາຍແຫ່ງໄດ້ຈັດ ພິທີສະເຫຼີມສະຫຼອງເລົ່າມູນ ເຊື້ອ ການກໍາເນີດເກີດຂຶ້ນຂອງ ຂະບວນການຕໍ່ສູ້ຂອງແມ່ ຍິງ, ເປັນຕົ້ນແມ່ນ ກະຊວງວິທະ ຍາສາດ ແລະເຕັກໂນໂລຊີ ແລະ ກະຊວງພາຍໃນ ຊຶ່ງຈັດຂຶ້ນ ໃນວັນທີ 7 ມີນາຜ່ານມາ. ສຳລັບການສະເຫຼີມສະ ຫຼອງວັນແມ່ຍິງສາກົນ ຢູ່ກະ ຊວງວິທະຍາສາດ ແລະ ເຕັກໂນໂລຊີ (ກວຕ), ທ່ານ ບໍ່ວຽງຄໍາ ວົງດາລາ ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ໄດ້ໃຫ້ກຽດເຂົ້າຮ່ວມ, ມີທ່ານ ນາງ ໄມຕີ ວົງຄໍາຊາວ ປະທານສະຫະພັນແມ່ຍິງ ກວຕ, ແຂກຖືກເຊີນພ້ອມດ້ວຍບັນດາສະມາຊິກ ແມ່ຍິງເຂົ້າຮ່ວມ. ໃນພິທີທ່ານ ນາງ ໄມຕີ ວົງຄໍາຊາວ ໄດ້ຍົກໃຫ້ເຫັນປະຫວັດຄວາມເປັນມາຂອງວັນທີ 8/3, ຊຶ່ງປີ 1899ຊາວກໍາມະກອນແມ່ຍິງຢູ່ໂຮງງານຕໍ່າແຜ່ນ-ຕັດຫຍິບ ທີ່ເມືອງນິວຢອກ ສະຫະລັດອາເມຣິກາ, ໄດ້ຈັດຕັ້ງໂຮມຊຸມນຸມປະທ້ວງ ແລະ ຄັດຄ້ານຕໍ່ການໃຫ້ຄ່າແຮງງານຕໍ່າ ແລະ ສະຖານທີ່ເຮັດວຽກກໍບໍ່ຮັບປະກັນສຸຂະພາບ. ໃນວັນທີ 8/3 /1908 ມີແມ່ຍິງຈໍານວນ 15.000 ຄົນ ໄດ້ເດີນຂະບວນຢູ່ເມືອງນິວຢອກ ເພື່ອທວງໃຫ້ນາຍທຶນ ຫຼຸດຜ່ອນຊົ່ວໂມງເຮັດວຽກ, ຢຸດເຊົາການຂູດຮີດແຮງງານເດັກ ແລະ ທວງໃຫ້ແມ່ຍິງມີສິດໃນການອອກສຽງເລືອກຕັ້ງ ແລະ ການຮັບສະໝັກເລືອກຕັ້ງ. ມາເຖິງປີ 1910 ຂະບວນການຕໍ່ສູ້ຂອງແມ່ຍິງ ໄດ້ແຜ່ຂະຫຍາຍກວ້າງອອກໄປສູ່ ບັນດາປະເທດ ທະວີບເອີຣົບ ແລະ ໃນປີນີ້ເອງ ກອງປະຊຸມສາກົນ ກ່ຽວກັບ ບັນຫາແມ່ຍິງຄັ້ງທໍາອິດ ໄດ້ຈັດຂຶ້ນຢູ່ ໂກເປັນຮາກ ນະຄອນຫຼວງຂອງປະເທດ ດານມາກ, ມີຜູ້ແທນ 100 ກວ່າຄົນ, ຈາກ 17 ປະເທດເຂົ້າຮ່ວມ, ກອງປະຊຸມ ໄດ້ຕົກລົງເອົາວັນທີ 8/3 ຂອງທຸກໆປີ ເປັນວັນແມ່ຍິງສາກົນ, 8 ມີນາ ແມ່ນເຫດການທາງການເມືອງທີ່ສໍາຄັນ, ເປັນຂີດໝາຍແຫ່ງໄຊຊະນະອັນພື້ນຖານຂອງຂະບວນການຂອງແມ່ຍິງສາກົນ ໃນການຕໍ່ສູ້ທວງເອົາສິດຜົນປະໂຫຍດອັນເປັນທໍາ ໃຫ້ແກ່ແມ່ຍິງຊາວຜູ້ອອກແຮງງານໃນທົ່ວໂລກ, ເປັນວັນລະນຶກເຖິງການຕໍ່ສູ້ຂອງແມ່ຍິງ ເພື່ອປົດປ່ອຍຕົນເອງ ແລະ ທວງໃຫ້ມີສິດສະເໝີພາບ ປະຊາທິປະໄຕ ຄືກັນກັບຜູ້ຊາຍ, ທວງໃຫ້ພວກນາຍທຶນ ແກ້ໄຂຊີວິດການເປັນຢູ່ ພາຍໃຕ້ຄໍາຂວັນ: " ຜູ້ໜຶ່ງເຮັດວຽກມື້ລະ 8 ຊົ່ວໂມງ, ແມ່ຍິງ ແລະ ຜູ້ຊາຍເຮັດວຽກຄືກັນ ຕ້ອງໄດ້ຮັບເງິນເດືອນເທົ່າກັນ, ຕ້ອງມີລະບອບປ້ອງກັນສຸຂະພາບຂອງແມ່ຍິງ ແລະ ເດັກນ້ອຍ, ຕ້ານສົງຄາມຮຸກຮານ,ປົກປັກຮັກສາສັນຕິພາບຂອງໂລກ" ປີຕໍ່ມາ, ຄືວັນທີ 19/3/1911 ວັນແມ່ຍິງສາກົນໄດ້ຮັບການສະເຫຼີມສະຫຼອງ ໂດຍມີປະຊາຊົນເຂົ້າຮ່ວມຫຼາຍລ້ານຄົນ ຢູ່ໃນບັນດາປະເທດເອີຣົບ ເຊັ່ນ: ປະເທດ ໂອຕຣິດ, ດານມາກ, ເຢຍລະມັນ, ສະວິດເຊີແລນ. ສຳລັບການສະເຫຼີມສະ ຫຼອງວັນແມ່ຍິງສາກົນ ປີນີ້ ພາຍໃຕ້ຄຳຂວັນ:"ຄິດຢ່າງສະເໝີພາບ, ສ້າງຄວາມສະຫຼາດ, ປະດິດສ້າງ ເພື່ອການປ່ຽນແປງ" ຊຶ່ງສູນກາງສະຫະພັນແມ່ຍິງລາວ ໄດ້ກຽມຫຼາຍກິດຈະກຳ ເພື່ອສະເຫຼີມສະຫຼອງວັນດັ່ງກ່າວໃຫ້ມີຄວາມໝາຍ ແລະ ຄຶກຄື້ນ. ໃນວັນດຽວກັນ ທີ່ກະ ຊວງພາຍໃນ ກໍໄດ້ຈັດພິທີສະເຫຼີມສະຫຼອງວັນດັ່ງກ່າວ ເຊັ່ນດຽວກັນ ໂດຍມີສະມາຊິກແມ່ຍິງ ຕະຫຼອດຮອດແຂກຖືກເຊີນເຂົ້າຮ່ວມ. ( ຂ່າວ: ແສງຈັນ)