S ໜັງສືພິມ ປະຊາຊົນ

 

ປະທານອົງການກວດສອບ ເນັ້ນເອົາໃຈໃສ່ 6 ບັນຫາສຳຄັນ


...

11.03.2019 8:55     

   ປະທານອົງການກວດສອບແຫ່ງລັດ ເນັ້ນ ຫຼາຍບັນຫາ ໂດຍສະເພາະແມ່ນການສະກັດກັ້ນຕ້ານການສໍ້ລາດບັງຫຼວງ ແລະ ຕິດຕາມກວດກາແຜນປະຈຳປີ. ອົງການກວດສອບແຫ່ງລັດໄດ້ຈັດກອງປະຊຸມວຽກງານກວດກາປະຈຳປີ 2018 ຂຶ້ນໃນວັນທີ 7 ມີນາ, ທີ່ອົງການດັ່ງກ່າວໂດຍການເປັນປະທານຂອງທ່ານ ນາງ ວຽງທອງ ສີພັນດອນ ປະທານອົງການກວດສອບແຫ່ງລັດ, ມີຮອງປະທານອົງການກວດສອບ, ຫົວໜ້າກົມ, ຮອງກົມ, ພ້ອມດ້ວຍພະນັກງານ-ລັດຖະກອນເຂົ້າຮ່ວມ. ໃນພິທີໄດ້ຮັບຟັງ ບົດສະຫຼຸບວຽກງານກວດກາປະຈຳປີ 2018 ຂອງອົງການກວດສອບແຫ່ງລັດ ແລະ ທິດທາງແຜນການປີ 2019, ບົດໂອ້ລົມຂອງທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ ເລຂາທິການສູນກາງພັກ ຮອງນາຍົກລັດຖະມົນຕີ ປະທານຄະນະກວດກາສູນກາງພັກ ປະທານອົງການກວດກາລັດຖະບານ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງຕໍ່ກອງປະຊຸມວຽກງານກວດກາທົ່ວປະເທດປະຈຳປີ 2018, ຄຳແນະນຳຂອງຄະນະກວດກາສູນກາງພັກສະບັບເລກທີ 419/ອກລ ກ່ຽວກັບການຈັດຕັ້ງປະຕິບັດກົດໝາຍວ່າດ້ວຍການກວດກາລັດສະບັບປັບປຸງ. ໃນພິທີທ່ານ ນາງ ວຽງທອງ ສີພັນດອນ ໄດ້ເນັ້ນໃຫ້ເອົາໃຈໃສ່ 6 ບັນຫາສຳຄັນກ່ຽວກັບວຽກງານກວດກາຂອງອົງການກວດສອບແຫ່ງລັດດັ່ງນີ້: 1. ໃຫ້ຄະນະກວດກາພັກ, ຄະນະກວດກາແຕ່ລະໜ່ວຍພັກ ແລະ ກົມກວດກາອົງການກວດສອບແຫ່ງລັດເອົາໃຈໃສ່ຄົ້ນຄວ້າເຊື່ອມຊຶມມະຕິ, ຄຳ ສັ່ງ, ຂໍ້ກຳນົດ, ກົດລະບຽບຂອງ ພັກ, ລະບຽບກົດໝາຍ ລວມທັງນິຕິກຳໃຕ້ກົດໝາຍຂອງ ລັດ ເພື່ອສາມາດປະຕິບັດໜ້າ ທີ່ທີ່ໄດ້ຮັບມອບໝາຍໃຫ້ມີຜົນ ສຳເລັດ ແລະ ປະກົດຜົນເປັນຈິງ. 2. ຕັ້ງໜ້າ ແລະ ເປັນເຈົ້າການຊີ້ນຳ-ນຳພາວຽກງານຕິດຕາມ, ກວດກາພັກ, ການຄຸ້ມຄອງບໍລິຫານແຕ່ລະຂັ້ນໃຫ້ມີປະສິດທິພາບ. 3. ເປັນເຈົ້າການຕໍ່ວຽກງານຕິດຕາມກວດກາຕາມແຜນ ປະຈຳປີເພື່ອດຳເນີນກວດ ກາຕາມກົມ, ຫ້ອງການ, ສະຖາບັນຝຶກອົບຮົມ, ອົງການກວດສອບປະຈຳພາກທີ່ເຫັນວ່າມີປະກົດການ ຫຼື ກວດກາຕາມຄຳສັ່ງຂອງຄະນະປະຈຳພັກ. 4. ເພີ່ມທະວີວຽກງານການສະກັດກັ້ນ ແລະ ຕ້ານການສໍ້ລາດບັງຫຼວງໃຫ້ສູງຂຶ້ນ ເພື່ອເຮັດໃຫ້ບົດບາດຂອງອົງການກວດສອບແຫ່ງລັດໄດ້ຮັບຄວາມເຊື່ອໝັ້ນຈາກຈັດຕັ້ງຂັ້ນເທິງ. 5. ສືບຕໍ່ວຽກງານປະ ສານສົມທົບກັບກົມຈັດຕັ້ງ-ພະນັກງານ ຕໍ່ກັບວຽກງານປັບປຸງກົງຈັກການຈັດຕັ້ງແຕ່ລະໄລຍະເພື່ອຮູ້ໄດ້ສະພາບຂອງພະນັກງານ-ສ້າງເປັນໜ່ວຍພັກປອດໃສ ເຂັ້ມແຂງ ແລະ ໜັກແໜ້ນ ທາງດ້ານການເມືອງ-ແນວຄິດ. 6. ປັບປຸງແບບແຜນວິທີການເຮັດວຽກຂອງກົມກວດກາໂດຍສະເພາະວຽກງານກວດກາພັກ ແລະ ວຽກງານກວດກາລັດໃຫ້ປະຕິບັດຕາມພາລະບົດບາດ, ເຮັດວຽກຕ້ອງມີຈຸດສຸມ, ວິເຄາະ, ວິໄຈ, ເຮັດວຽກຢ່າງພາວະວິໃສ, ບັນດາໜ່ວຍພັກໃຫ້ເອົາໃຈໃສ່ປະຕິບັດແຜນການກໍ່ສ້າງໜ່ວຍພັກປອດໃສ ເຂັ້ມແຂງ ແລະ ໜັກແໜ້ນ. (ຂ່າວ : ສຸກສາຄອນ, ພາບ: ສຸກສະຫວັນ)