S ໜັງສືພິມ ປະຊາຊົນ

 

ກະຊວງ ຮສສ ຈັດພິທີມອບໃບຢັ້ງຢືນ ໃຫ້ໜ່ວຍພັກປອດໃສ ເຂັ້ມແຂງ ແລະ ໜັກແໜ້ນ


...

11.03.2019 8:55     

   ກະຊວງ ແຮງງານ ແລະ ສະຫວັດດີການສັງຄົມ (ຮສສ)ໄດ້ຈັດພິທີມອບໃບຢັ້ງຢືນໃຫ້ບັນດາໜ່ວຍພັກປອດໃສ ເຂັ້ມແຂງ ແລະ ໜັກແໜ້ນ ປະຈຳປີ 2018 ຂຶ້ນໃນວັນທີ 7 ມີນານີ້ທີ່ ຮສສ,ໃຫ້ກຽດມອບໂດຍທ່ານ ນາງ ໃບຄຳ ຂັດທິຍະ ຮອງເລຂາຄະນະພັກ ຮອງລັດຖະມົນຕີ ກະຊວງ ແຮງງານ ແລະ ສະຫວັດດີການສັງຄົມ ຊຶ່ງມີບັນດາເລຂາໜ່ວຍພັກຮາກຖານເຂົ້າຮ່ວມ ທ່ານ ຄຳຂານ ພີນສະ ຫວັນ ຄະນະປະຈຳພັກ ກະ ຊວງ ຮສສ ໄດ້ຂຶ້ນຜ່ານມະຕິຮັບຮອງບັນດາໜ່ວຍພັກປອດໃສ,ເຂັ້ມແຂງ ແລະ ໜັກແໜ້ນປະຈຳປີ 2018 ວ່າ: ຊຶ່ງຜ່ານມາ ຄະນະພັກກະຊວງແຮງງານ ແລະ ສະຫວັດດີການສັງຄົມ ໄດ້ຖືສໍາຄັນ ແລະ ເອົາໃຈໃສ່ ຕໍ່ການນໍາພາວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ກໍຄືບັນດາໜ່ວຍພັກທີ່ຂຶ້ນກັບອົງຄະນະພັກກະຊວງແຮງງານ ແລະ ສະຫວັດດີການສັງຄົມ ຢ່າງຕໍ່ເນື່ອງມີຈຸດສຸມ, ຖືກຕ້ອງຕາມມາດຖານເງື່ອນໄຂທີ່ໄດ້ກໍານົດໄວ້ໃນຄໍາສັ່ງ ຂອງກົມການເມືອງສູນກາງພັກ ສະບັບເລກທີ 01/ກມສພ, ລົງວັນທີ 3 ມັງກອນ 2018 ວ່າດ້ວຍ ການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ. ການສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ແມ່ນມີຄວາມໝາຍ, ຄວາມສໍາຄັນເພື່ອຍົກສູງຄຸນນະພາບຂອງສະມາຊິກພັກ ແລະ ການຈັດຕັ້ງຮາກຖານພັກເຮັດໃຫ້ໜ່ວຍພັກ ມີິຄວາມປອດໃສ, ເຂັ້ມແຂງທາງດ້ານການເມືອງ, ດ້ານແນວຄິດ, ການຈັດຕັ້ງ, ແບບແຜນວິທີນໍາພາທີ່ຖືກຕ້ອງ, ຕີລາຄາຄວາມຮັບຜິດຊອບໜ້າທີ່ການເມືອງ ແລະ ເພື່ອແນໃສ່ປັບປຸງກໍ່ສ້າງລະບົບການເມືອງຂັ້ນຮາກຖານໃຫ້ມີຄວາມໜັກແໜ້ນ, ສ້າງໃຫ້ໜ່ວຍພັກສາມາດເປັນແກນນໍາຈັດຕັ້ງນໍາພາປະຕິບັດໜ້າທີ່ການເມືອງຢູ່ຂັ້ນຮາກຖານໃຫ້ມີປະສິດທິຜົນ, ໃນໄລຍະຜ່ານມາຄະນະພັກຈັດຕັ້ງກະຊວງໄດ້ຖືເອົາວຽກງານດັ່ງກ່າວເປັນໃຈກາງໃນໜ້າທີ່ການເມືອງຂອງຕົນ ຊຶ່ງໄດ້ແຕ່ງຕັ້ງຄະນະຮັບຜິດຊອບຊີ້ນໍາ ແລະ ໜ່ວຍງານວິຊາການຊ່ວຍວຽກເພື່ອລົງໄປຊີ້ນໍາ ແລະ ແນະນໍາວິທີສະຫຼຸບ, ວິທີສ້າງແຜນການ ຫຼັງຈາກນັ້ນກໍໄດ້ມີການຊຸກຍູ້, ຕິດຕາມ, ກວດກາ ແລະ ປະເມີນການສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ທີ່ຂຶ້ນກັບອົງຄະນະພັກ ຈໍານວນ 20 ໜ່ວຍ ແລະ 1 ຄະນະພັກຮາກຖານ ໄດ້ສ້າງ ແລະ ຮັບຮອງແຜນການປະຈໍາປີ 2018 ໄດ້ທັງໝົດ 14 ໜ່ວຍພັກ, ສາມາດຮັບຮອງເປັນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນໄດ້ທັງໝົດ 11 ໜ່ວຍພັກ ເທົ່າກັບ 78,57% ຂອງໜ່ວຍພັກທີ່ຖືກຮັບຮອງລື່ນແຜນການ 3,57% ແລະ ຮອງຮັບແຜນການສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນປະຈໍາປີ 2019 ໄດ້ທັງໝົດ 13 ໜ່ວຍພັກ. ທ່ານ ນາງ ໃບຄຳ ຂັດທິຍະ ໄດ້ສະແດງຄວາມຍ້ອງຍໍຊົມເຊີຍຕໍ່ບັນດາໜ່ວຍພັກທີ່ໄດ້ຮັບຮອງເປັນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປະຈໍາປີ 2018 ແລະ ໄດ້ຮຽກຮ້ອງໃຫ້ທຸກໜ່ວຍພັກຈົ່ງພ້ອມກັນເພີ່ມທະວີ ເອົາໃຈໃສ່ຕື່ມບາງບັນຫາດັ່ງລຸ່ມນີ້: 1. ຄະນະພັກແຕ່ລະຂັ້ນຕ້ອງຈັດຕັ້ງຄົ້ນຄວ້າ, ເຊື່ອມຊຶມ ແລະ ກໍາແໜ້ນເນື້ອໃນຈິດໃຈແຜນການສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນປະຈໍາປີ 2019 ໃຫ້ເລິກເຊິ່ງ, ໃຫ້ຫັນເປັນແຜນງານ ແລະ ໂຄງການ, ຄາດໝາຍສູ້ຊົນຂອງຄະນະພັກແຕ່ລະຂັ້ນໃຫ້ລະອຽດ, ພ້ອມທັງຊີ້ນໍາໆພາ ຈັດຕັ້ງປະຕິບັດໃຫ້ມີຜົນສໍາເລັດເປັນຢ່າງດີ, ໃຫ້ຖືເປັນຄວາມຮັບຜິດຊອບໂດຍກົງຂອງຄະນະພັກແຕ່ລະຂັ້ນ ແລະ ຮັບຜິດຊອບຜົນສໍາເລັດ, ຂໍ້ບົກຜ່ອງຕໍ່ຄະນະພັກຂັ້ນເທິງເວົ້າລວມ, ຕໍ່ຄະນະພັກກະຊວງ, ເວົ້າສະເພາະໃນວຽກງານການຈັດຕັ້ງປະຕິບັດແຜນການສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ; 2. ຄະນະພັກແຕ່ລະຂັ້ນຕ້ອງໄດ້ສ້າງແຜນການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປີ 2019 ຂອງໜ່ວຍພັກຕົນໂດຍສອດຄ່ອງກັບຄວາມຮັບຜິດຊອບ ແລະ ໜ້າທີ່ການເມືອງຂອງຕົນ ພ້ອມທັງສູ້ຊົນຈັດຕັ້ງປະຕິບັດຢ່າງຕັ້ງໜ້າ ແລະ ມີຄວາມຮັບຜິດຊອບສູງ; 3. ຄະນະພັກແຕ່ລະຂັ້ນຕ້ອງມີການດໍາເນີນ, ກວດກາ, ຕີລາຄາປະເມີນຜົນໜຶ່ງປີ ເພື່ອລາຍງານໃຫ້ຄະນະຮັບຜິດຊອບສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນຂອງກະຊວງ ເພື່ອສະເໜີຄະນະພັກກະຊວງຢັ້ງຢືນຄຸນນະພາບ ຂອງສະມາຊິກພັກ ແລະ ໜ່ວຍພັກ; 4. ຄະນະຮັບຜິດຊອບກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນຂອງກະຊວງ ເປັນເຈົ້າການໃນການຕິດຕາມ, ກວດກາ ແລະ ຊຸກຍູ້ການຈັດຕັ້ງປະຕິບັດແຜນການສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປະຈໍາປີ 2019 ຂອງອົງຄະນະພັກກະຊວງ ໃຫ້ເປັນປົກກະຕິ ແລະ ເຂັ້ມງວດ. (ຂ່າວ:ຕຸໄລເພັດ)