S ໜັງສືພິມ ປະຊາຊົນ

 

ທ່ານ ສົມພັນ ແພງຄຳມີ ຕ້ອນຮັບ ຄະນະຜູ້ແທນ ສປ ຈີນ


...

12.03.2019 13:30     

   ທ່ານ ສົມພັນ ແພງຄໍາມີ ຮອງປະທານສະພາແຫ່ງຊາດ ປະທານຄະນະສັນຕິພາບ ແລະ ສາມັກຄີຂອງລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ອານ ເຢ້ຈຸນ ເລຂາທິການ ສະມາຄົມປະຊາຊົນຈີນ ເພື່ອສັນຕິພາບ ແລະ ຫຼຸດຜ່ອນການທະຫານ ໃນວັນທີ 11 ມີນານີ້ ທີ່ຫ້ອງຮັບແຂກສະພາແຫ່ງຊາດ. ໃນໂອກາດທີ່ຄະນະຜູ້ແທນດັ່ງກ່າວເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ ລະຫວ່າງ ວັນທີ 9-12 ມີນານີ້. ໃນໂອກາດດັ່ງກ່າວ, ທ່ານ ສົມພັນ ແພງຄໍາມີ ໄດ້ສະແດງຄວາມຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຂອງຄະນະຜູ້ແທນ ສປ ຈີນໃນຄັ້ງນີ້ ແລະ ໄດ້ສະແດງຄວາມຊົມເຊີຍຕໍ່ການພົວພັນຮ່ວມມືຂອງສອງອົງການຈັດຕັ້ງສັນຕິພາບລາວ-ຈີນ ທີ່ໄດ້ປະກອບສ່ວນຢ່າງຕັ້ງໜ້າ ເຂົ້າໃນການເສີມສ້າງ ສັນຕິພາບໃນພາກພື້ນ ແລະ ໃນໂລກ. ພ້ອມນັ້ນ ຍັງໄດ້ຕີລາຄາສູງ ຕໍ່ສາຍພົວພັນມິດຕະພາບ, ຄວາມສາມັກຄີອັນເປັນມູນເຊື້ອ ແລະ ການຮ່ວມມືຍຸດທະສາດຮອບດ້ານ, ໝັ້ນຄົງ, ຍາວນານ ຂອງສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ໃຫ້ນັບມື້ໄດ້ຮັບການເສີມຂະຫຍາຍເຂົ້າສູ່ລວງເລິກ ແລະ ເກີດດອກອອກຜົນຢ່າງບໍ່ຢຸດຢັ້ງ. ໃນວັນດຽວກັນ, ຄະນະຜູ້ແທນດັ່ງກ່າວ ກໍໄດ້ມີການພົບປະແລກປ່ຽນປະສົບການການເຄື່ອນໄຫວວຽກງານ ສັນຕິພາບ, ຝ່າຍລາວ ນໍາໂດຍ ທ່ານ ສົມສະໜຸກ ມີໄຊ ເລຂາທິການຄະນະສັນຕິພາບ ແລະ ສາມັກຄີຂອງລາວ, ຝ່າຍສປ ຈີນ ນໍາໂດຍ ທ່ານ ອານ ເຢ້ຈຸນ; ສອງຝ່າຍ ໄດ້ປຶກສາຫາລື ແລະ ແລກປ່ຽນບົດຮຽນຊຶ່ງກັນ ແລະ ກັນ ເປັນຕົ້ນແມ່ນ ດ້ານຂໍ້ມູນຂ່າວສານ ແລະ ເຫດການສໍາຄັນທີ່ພົ້ນເດັ່ນ ໃນພາກພື້ນ ແລະ ສາກົນ ທີ່ສອງຝ່າຍໃຫ້ຄວາມສົນໃຈ, ພ້ອມທັງໄດ້ແຈ້ງສະພາບການພັດທະນາເສດຖະກິດ-ສັງຄົມໂດຍຫຍໍ້ ຂອງແຕ່ລະປະເທດໃຫ້ກັນແລະ ກັນຊາບ. ນອກຈາກນີ້ ຄະນະຜູ້ແທນດັ່ງກ່າວ ຍັງໄດ້ເຂົ້າຢ້ຽມຂໍ່ານັບ ທ່ານ ສົມດີ ບຸນຄຸ້ມ, ຮອງຫົວໜ້າຄະນະພົວພັນຕ່າງປະເທດສູນກາງພັກອີກດ້ວຍ. ( ຂ່າວ: ແສງຈັນ)