S ໜັງສືພິມ ປະຊາຊົນ

 

ລັດຖະບານລາວ ປະດັບຫຼຽນກາມິດຕະພາບ ໃຫ້ຮອງຜູ້ຕາງໜ້າອົງການອຸຍນີເຊັບ


...

12.03.2019 13:30     

   ລັດຖະບານ ແຫ່ງ ສປປ ລາວໄດ້ປະດັບຫຼຽນກາມິດຕະ ພາບ ໃຫ້ແກ່ ທ່ານ ມິໂອ-ຊິນ ຢູນ (Myo-Zin Nyunt), ຮອງຜູ້ຕາງໜ້າອົງການອຸຍນີເຊັບ (UNICEF) ປະຈຳ ສປປ ລາວ ຊຶ່ງພິທີປະດັບຫຼຽນດັ່ງກ່າວໄດ້ຈັດຂຶ້ນໃນວັນທີ 11 ມີນາ 2019 ຢູ່ທີ່ ກະຊວງການຕ່າງປະເທດ ໂດຍແມ່ນທ່ານ ນາງ ຄຳເພົາ ເອີນທະວັນ ຮອງລັດຖະມົນຕີກະຊວງການຕ່າງປະເທດ ຕາງໜ້າໃຫ້ລັດຖະບານລາວປະດັບຫຼຽນດັ່ງກ່າວ, ເພື່ອເປັນການຍ້ອງຍໍຊົມເຊີຍຜົນງານ ຂອງຜູ້ກ່ຽວພາຍຫຼັງ ສິ້ນສຸດການປະຕິບັດໜ້າທີ່ຢູ່ ສປປ ລາວ. ໃນໂອກາດດັ່ງກ່າວ,ທ່ານຮອງລັດຖະມົນຕີ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສຳເລັດໃນການປະ ຕິບັດໜ້າທີ່ວຽກງານໃນໄລຍະຜ່ານມາຂອງ ທ່ານ ມິໂອ-ຊິນ ຢູນ ທີ່ໄດ້ປະກອບສ່ວນເສີມຂະຫຍາຍການພົວພັນຮ່ວມມື ແລະ ຊ່ວຍເຫຼືອ ສປປ ລາວ ດ້ານຕ່າງໆຂອງອົງການອຸຍນີເຊັບ ເປັນຕົ້ນແມ່ນວຽກງານຊ່ວຍເຫຼືອແມ່ ແລະ ເດັກ ທາງດ້ານສາທາລະນະສຸກ ແລະ ໂພຊະນາການ ຢູ່ ສປປ ລາວ. ດັ່ງນັ້ນ, ລັດຖະບານ ແຫ່ງ ສປປ ລາວ ຈຶ່ງໄດ້ຕົກລົງຍ້ອງຍໍປະດັບຫຼຽນກາມິດຕະພາບ ເພື່ອເປັນການຈາລຶກຜົນງານການປະກອບສ່ວນໃນການສ້າງສາພັດທະນາ ຢູ່ ສປປ ລາວ ຂອງຜູ້ກ່ຽວ. ພ້ອມດຽວກັນ ທ່ານ ມິໂອ-ຊີນ ຢູນ ກໍໄດ້ສະແດງຄວາມຂອບອົກຂອບໃຈ ຕໍ່ການຮ່ວມມື ແລະ ສະໜັບສະໜູນຂອງລັດຖະບານລາວ ຕະຫຼອດໄລຍະການປະຕິບັດໜ້າທີ່ ຂອງທ່ານ ໃນໄລຍະ 3 ປີ ທີ່ຜ່ານມາ, ພ້ອມທັງຢືນຢັນຈະສືບຕໍ່ຊຸກຍູ້ໃຫ້ມີການຊ່ວຍເຫຼືອ ແລະ ສະໜັບສະໜູນຮ່ວມມືຂອງອົງການ ອຸຍນີເຊັບ UNICEF ໃຫ້ແກ່ ສປປ ລາວ ໃນຕໍ່ໜ້າ. (ຂ່າວ-ພາບ: ກະຊວງການຕ່າງປະເທດ)