S ໜັງສືພິມ ປະຊາຊົນ

 

ນາຍົກລັດຖະມົນຕີ ສຳເລັດການ ຢ້ຽມຢາມຮົງກາຣີ


...

13.03.2019 12:58     

   ໂດຍຕອບສະໜອງການເຊື້ອເຊີນຂອງທ່ານ ວິກຕໍຣ ອໍຣບານ ນາຍົກລັດຖະມົນຕີ ແຫ່ງ ຮົງກາຣີ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ນຳພາຄະນະຜູ້ແທນລັດຖະບານລາວ ເດີນທາງໄປຢ້ຽມຢາມ ຮົງກາຣີ ຢ່າງເປັນທາງການ, ໃນລະຫວ່າງວັນທີ 10-12 ມີນານີ້, ຊຶ່ງເປັນການຢ້ຽມຢາມຄັ້ງປະຖົມມະລືກ ນັບແຕ່ທ່ານໄດ້ດຳລົງຕຳແໜ່ງເປັນນາຍົກລັດຖະມົນຕີ ແຫ່ງ ສປປ ລາວ. ການຢ້ຽມຢາມຄັ້ງນີ້ ເປັນນິມິດໝາຍອັນດີ ແລະ ຍິ່ງໃຫຍ່ໃນການເພີ່ມທະວີຮັດແໜ້ນສາຍພົວພັນມິດຕະພາບ ແລະ ການຮ່ວມມື ທີ່ເປັນມູນເຊື້ອ ຍາວນານ ລະຫວ່າງ ສປປ ລາວ ແລະ ຮົງກາຣີ ໃຫ້ແໜ້ນແຟ້ນ ແລະ ແຕກດອກອອກຜົນຍິ່ງໆຂຶ້ນ. ໃນວັນທີ 11 ມີນາ ທ່ານນາຍົກລັດຖະມົນຕີ ແຫ່ງ ສປປ ລາວ ໄດ້ພົບປະສອງຝ່າຍຢ່າງເປັນທາງການ ກັບ ທ່ານນາ ຍົກລັດຖະມົນຕີ ແຫ່ງ ຮົງກາຣີ, ທີ່ສຳນັກງານນາຍົກລັດຖະມົນ ຕີ ຮົງກາຣີ. ໃນນັ້ນ ສອງຝ່າຍ ໄດ້ທົບທວນ ແລະ ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອຍາວນານ ລະຫວ່າງ ລາວ-ຮົງກາຣີ. ສອງປະເທດ ເຄີຍໄດ້ໃຫ້ການສະໜັບສະໜູນ ແລະ ຊ່ວຍເຫຼືອຊຶ່ງກັນ ແລະ ກັນ, ທັງໃນຂອບສອງຝ່າຍ ກໍຄືຫຼາຍຝ່າຍຕະຫຼອດມາ, ຄຽງຄູ່ກັນນັ້ນ ທ່ານນາຍົກລັດຖະມົນຕີເຮົາ ໄດ້ສະແດງຄວາມຮູ້ບຸນຄຸນອັນເລິກເຊິ່ງ ຕໍ່ການຊ່ວຍເຫຼືອອັນລາໍ້ຄ່າຂອງລັດຖະບານ ແລະ ປະຊາຊົນ ຮົງກາຣີ ໃຫ້ແກ່ ສປປ ລາວ ໃນພາລະກິດຕໍ່ສູ້ກູ້ຊາດໃນເມື່ອກ່ອນ ກໍຄືການປົກປັກຮັກສາ ແລະ ສ້າງສາປະເທດຊາດ ໃນປັດຈຸບັນ. ສອງຝ່າຍ ໄດ້ປຶກສາຫາລືກັນກ່ຽວກັບການເພີ່ມທະວີການຮ່ວມມືໃນຕໍ່ໜ້າ ໂດຍໄດ້ຕົກລົງກັນ ຍົກລະດັບການພົວພັນສອງຝ່າຍ ຂຶ້ນເປັນຄູ່ຮ່ວມຍຸດທະສາດ, ຊຶ່ງເປັນການຢັ້ງຢືນຄືນ ແລະ ສະແດງໃຫ້ເຫັນເຖິງຄວາມໄວ້ເນື້ອເຊື່ອໃຈ ຊຶ່ງກັນ ແລະ ກັນ ລະຫວ່າງ ລັດຖະບານ ແລະ ປະຊາຊົນ ສອງຊາດ ລາວ-ຮົງກາຣີ. ເພື່ອຜັນຂະຫຍາຍການຕົກລົງດັ່ງກ່າວ, ສອງຝ່າຍເຫັນດີເປັນເອກະພາບກັນໃຫ້ມີການແລກປ່ຽນການຢ້ຽມຢາມຊຶ່ງກັນ ແລະ ກັນໃນທຸກລະດັບ ແລະ ທຸກຂະແໜງ, ນັບແຕ່ການນຳຂັ້ນສູງຈົນຮອດລະດັບວິຊາການຂອງສອງປະເທດ, ລວມທັງ ລະດັບທ້ອງຖິ່ນ ແລະ ຊຸກຍູ້ການຈັດຕັ້ງປະຕິບັດ ໂຄງການຮ່ວມມືຕ່າງໆ ໃຫ້ປະກົດຜົນເປັນຈິງ. ພ້ອມກັນນັ້ນ, ສອງຝ່າຍ ໄດ້ຕົກລົງສີືບຕໍ່ການຮ່ວມມືສອງຝ່າຍໃນຂົງເຂດ ເສດຖະກິດ, ການຄ້າ, ການລົງທຶນ, ການສຶກສາ, ກະສິກຳ, ການເງິນ ແລະ ຂະແໜງການອື່ນໆ ທີ່ສອງຝ່າຍມີທ່າແຮງ ແລະ ມີຄວາມສົນໃຈຮ່ວມກັນ. ສິ່ງສໍາຄັນ ສອງຝ່າຍໄດ້ຕົກລົງເຫັນດີຈັດກອງປະຊຸມປຶກສາຫາລືດ້ານການເມືອງ ລະຫວ່າງ ສອງກະຊວງການຕ່າງປະເທດ ຢ່າງເປັນປົກກະຕິນຳກັນ ແນໃສ່ເສີມຂະຫຍາຍການພົວພັນຮ່ວມມືສອງຝ່າຍ ລາວ-ຮົງກາຣີ ໃຫ້ກວ້າງຂວາງ ແລະ ມີປະສິດທິຜົນຍິ່ງໆຂຶ້ນ. ພ້ອມກັນນັ້ນ, ລັດຖະບານ ຮົງກາຣີ ໄດ້ຕົກລົງເພີ່ມທຶນການສຶກສາ ໃຫ້ແກ່ ສປປ ລາວ ຕື່ມອີກ ຈາກ 50 ທຶນ ມາເປັນ 100 ທຶນ ຕໍ່ປີ ນັບແຕ່ປີ 2019 ເປັນຕົ້ນໄປ. ປັດຈຸບັນ ນັກສຶກສາລາວ ກຳລັງສຶກສາຮໍ່າຮຽນ ຢູ່ມະຫາວິທະຍາໄລຕ່າງໆ ຂອງຮົງກາຣີ ມີຈໍານວນທັງໝົດ 86 ຄົນ (ໃນລະດັບປະລິນຍາຕີ, ປະລິນຍາໂທ ແລະ ປະລິນຍາເອກ). ໃນໂອກາດດັ່ງກ່າວ ທ່ານນາຍົກລັດຖະມົນຕີເຮົາ ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈຢ່າງຈິງໃຈ ຕໍ່ລັດຖະບານ ແລະ ປະຊາຊົນ ຮົງກາຣີ ທີ່ໄດ້ຊ່ວຍກໍ່ສ້າງຊັບພະຍາກອນມະນຸດໃຫ້ແກ່ ສປປ ລາວ ໃນໄລຍະຜ່ານມາ ກໍຄືປັດຈຸບັນ, ຊຶ່ງນັກສຶກສາລາວ ທີ່ໄດ້ຮຽນຈົບຈາກ ຮົງກາຣີ ໃນເມື່ອກ່ອນ ໄດ້ກາຍເປັນຊັບພະຍາກອນມະນຸດ ທີ່ມີຄຸນນະພາບ ແລະ ປະສົບຄວາມສຳເລັດສູງ, ຈຳນວນໜຶ່ງ ມີໜ້າທີ່ຕຳແໜ່ງສຳຄັນ ຢູ່ພາກລັດ ແລະ ຈຳນວນໜຶ່ງ ກໍປະສົບຜົນສຳເລັດຢູ່ໃນພາກທຸລະກິດ. ນອກນັ້ນ, ຍັງໄດ້ສະແດງຄວາມຂອບໃຈ ຕໍ່ລັດຖະບານ ຮົງກາຣີ ທີ່ໄດ້ສະໜອງເງິນກູ້ທີ່ມີເງື່ອນໄຂຜູກພັນບໍ່ມີ ດອກເບ້ຍ ໃຫ້ແກ່ ສປປ ລາວ ໃນໄລຍະທີ 1 ມູນຄ່າ 8,6 ລ້ານໂດລາ, ໄລຍະທີ 2 ມູນຄ່າ 30 ລ້ານໂດລາ, ໄລຍະທີ 3 ມູນຄ່າ 160 ລ້ານໂດລາ ແລະ ຍັງເຫັນດີຈະເພີ່ມຈໍານວນເງິນກູ້ຢືມດັ່ງກ່າວຂຶ້ນຕື່ມອີກໃນຕໍ່ໜ້າ, ຊຶ່ງເປັນການປະກອບສ່ວນສຳຄັນ ໃຫ້ແກ່ການພັດທະນາເສດຖະກິດ-ສັງຄົມ ຂອງ ສປປ ລາວ. ພ້ອມກັນນັ້ນ, ສອງຝ່າຍຈະຊຸກຍູ້ການຈັດຕັ້ງປະຕິບັດບັນດາໂຄງການຮ່ວມມື ລາວ-ຮົງກາຣີ ທີ່ກຳລັງດຳເນີນຢູ່ ສປປ ລາວ ໃຫ້ສຳເລັດຜົນ ຕາມຄາດ ໝາຍທີ່ກຳນົດໄວ້. ຝ່າຍຮົງກາຣີ ເຫັນດີທີ່ຈະໄປເປີດຫ້ອງການຕາງໜ້າກົງສູນຂອງຕົນ ຢູ່ນະ ຄອນຫຼວງວຽງຈັນ ໃນອະນາຄົດອັນໃກ້ໆນີ້. ສອງຝ່າຍຍັງໄດ້ແລກປ່ຽນທັດສະນະນໍາກັນ ກ່ຽວກັບບັນຫາພາກພື້ນ ແລະ ສາກົນ ແລະ ອື່ນໆ ທີ່ສອງຝ່າຍມີຄວາມສົນໃຈຮ່ວມກັນ. ໃນໂອກາດຢ້ຽມຢາມຄັ້ງນີ້, ສອງຝ່າຍ ໄດ້ລົງນາມເອກະສານຮ່ວມກັນ ສອງສະບັບ ຄື: ສັນຍາວ່າດ້ວຍການຍົກເວັ້ນວີຊາການທູດ ແລະ ລັດຖະການ ແລະ ແຜນການຮ່ວມມືດ້ານການສຶກສາ ສຳລັບໄລຍະ ປີ 2020-2022 ຊຶ່ງຈະສ້າງເງື່ອນໄຂໃຫ້ສອງປະເທດໄດ້ເພີ່ມທະວີ ແລະ ເສີມຂະຫຍາຍການພົວພັນຮ່ວມມືໃຫ້ແໜ້ນແຟ້ນກວ່າເກົ່າ. ໃນໄລຍະຢ້ຽມຢາມຄັ້ງນີ້, ທ່ານ ທອງລຸນ ສີສຸລິດ ໄດ້ເຂົ້າຢ້ຽມຂາໍ່ນັບ ທ່ານ ຢາໂນສ ອາເດຣ ປະທານາທິບໍດີ ຮົງກາຣີ ແລະ ທ່ານ ລາຊໂລ ໂກເວີ ປະທານສະພາແຫ່ງຊາດ ຮົງກາຣີ. ຈາກນັ້ນກໍໄດ້ໄປວາງພວງມາລາຢູ່ອະນຸສາວະລີນັກ ຮົບນິລະນາມ ແລະ ຢ້ຽມຊົມສະຖານທີ່ທ່ອງທ່ຽວດ້ານວັດທະນະທຳ ແລະ ປະຫວັດສາດທີ່ສຳຄັນຂອງ ຮົງກາຣີ ຈຳນວນໜຶ່ງ. ທ່ານນາຍົກລັດຖະມົນຕີ ໄດ້ຖືເອົາໂອກາດນີ້ເຊື້ອເຊີນ ທ່ານນາຍົກລັດຖະມົນຕີ ວິກຕໍຣ ອໍຣບານ ຢ້ຽມຢາມ ສປປ ລາວ ຢ່າງເປັນທາງການ ໃນເວລາທີ່ເຫັນວ່າສະດວກ, ຊຶ່ງນາຍົກລັດຖະມົນຕີ ວິກຕໍຣ ອໍຣບານ ກໍມີຄວາມຍິນດີຕອບຮັບການເຊື້ອເຊີນດັ່ງກ່າວ. (ພາບ-ຂ່າວ: ກະຊວງການຕ່າງປະເທດ)