S ໜັງສືພິມ ປະຊາຊົນ

 

ລາວ-ຫວຽດນາມ ສືບຕໍ່ຮ່ວມມືດ້ານ ປທສ


...

13.03.2019 12:58     

   ທ່ານ ທັນສະໄໝ ກົມມະສິດ ລັດຖະມົນຕີ ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ ແຫ່ງ ສປປ ລາວ (ປທສ) ພ້ອມຄະນະ ແລະ ທ່ານ ຫງວຽນ ແມງ ຮຸ່ງ ລັດຖະມົນຕີກະຊວງຖະແຫຼງຂ່າວ ແລະ ການສື່ສານ ແຫ່ງ ສສ ຫວຽດນາມ ພ້ອມຄະນະ ໄດ້ພົບປະສອງຝ່າຍ ເພື່ອທົບທວນຄືນການຮ່ວມມືດ້ານໄປ ສະນີ ໂທລະຄົມມະນາຄົມ ແລະ ການສື່ສານ ໃນໄລຍະຜ່ານມາ ແລະ ປຶກສາຫາລືແຜນ ການຮ່ວມມືໃນຕໍ່ໜ້າ. ພິທີພົບປະມີຂຶ້ນໃນວັນ ທີ 12 ມີນານີ້ ທີ່ໂຮງແຮມລາວ ພລາຊານະຄອນຫຼວງວຽງຈັນ ຊຶ່ງທັງສອງຝ່າຍໄດ້ມີການປຶກສາຫາລື ເພື່ອດຳເນີນແຜນການຮ່ວມມືສອງຝ່າຍ ເປົ້າໝາຍເພື່ອສ້າງສາພັດທະນາເສດຖະກິດ-ສັງຄົມ ເພື່ອໃຫ້ເກີດຜົນປະໂຫຍດສູງສຸດ ກັບປະຊາຊົນທັງສອງຊາດ ລາວ - ຫວຽດນາມ. ການຮ່ວມມື ລະຫວ່າງສອງກະຊວງ ແມ່ນມີຢ່າງຕໍ່ເນື່ອງ ແລະ ຫຼາຍລະດັບ ເປັນຕົ້ນແມ່ນການຮ່ວມມືລະຫວ່າງ ສູນອິນເຕີເນັດແຫ່ງຊາດ ຂອງລາວ ແລະ ສູນເຄື່ອຂ່າຍຂໍ້ມູນຂ່າວສານ ຂອງ ສສ ຫວຽດນາມ ໃນການ ຄຸ້ມຄອງອິນເຕີເນັດສູຸງສຸດແຫ່ງຊາດ; ການຮ່ວມມືໃນຂົງເຂດວຽກງານ ໂທລະຄົມມະນາຄົມ ແລະ ICT ລະດັບອາຊຽນ ໃນນາມຕົວແທນຜູ້ຮັບຜິດຊອບຢ່າງເປັນທາງການຂອງຂະແໜງການໃນອາຊຽນ. ໃນການພົບປະຄັ້ງນີ້, ຍັງໄດ້ແລກປ່ຽນບົດຮຽນ ແລະ ຂໍການສະໜັບສະໜູນ ໃນການກະກຽມທີ່ ສປປ ລາວ ຈະເປັນເຈົ້າພາບ ຈັດກອງປະຊຸມລັດຖະມົນຕີ ICT ອາຊຽນ ໃນເດືອນ ຕຸລາ ທີ່ຈະມາເຖິງ. ນອກນີ້, ຍັງໄດ້ປຶກສາຫາລື ການຮ່ວມມືເພື່ອຍົກລະດັບຄວາມຮູ້ ຄວາມສາມາດຂອງພະນັກງານ, ການຝຶກອົບຮົມໄລຍະສັ້ນ ແລະ ໄລຍະຍາວ ດ້ານໂທລະຄົມມະນາຄົມ ແລະ ICT ໂດຍສະເພາະແມ່ນດ້ານການຄຸ້ມຄອງ ແລະ ພັດທະນາວຽກງານ ICT. ຫຼັງຈາກສິ້ນສຸດການພົບປະແລ້ວ, ສອງຝ່າຍໄດ້ຮ່ວມກັນລົງນາມບົດບັນທຶກ ເພື່ອຮ່ວມມືຕໍ່ໜ້າຈຳນວນ 4 ສະບັບຄື: 1). ລົງນາມບົດບັນທຶກກອງປະຊຸມ ໂດຍແມ່ນ ທ່ານ ທັນສະໄໝ ກົມມະສິດ ແລະ ທ່ານ ຫງວຽນ ແມງ ຮຸ່ງ. 2). ລົງນາມບົດບັນທຶກການຮ່ວມມືສອງຝ່າຍລະຫວ່າງສູນສະກັດກັ້ນ ແລະ ແກ້ໄຂເຫດສຸກເສີນທາງຄອມພິວເຕີ ຂອງ ລາວ ແລະ ສູນຄຸ້ມຄອງຄວາມປອດໄພທາງຂໍ້ມູນຂ່າວສານ, ກະຊວງ ຖະແຫຼງຂ່າວ ແລະ ການສື່ສານ ຂອງ ສສ ຫວຽດນາມ. 3). ລົງນາມສັນຍາການຮ່ວມມືພັດທະນາລະບົບຫ້ອງການທັນສະໄໝ ລະຫວ່າງ ທ່ານ ຫົວໜ້າສູນບໍລິຫານລັດດ້ວຍເອເລັກໂຕຣນິກ ຂອງລາວ ແລະ ທ່ານ ຜູ້ອໍານວຍການ ກຸ່ມບໍລິສັດ ໄປສະນີ ແລະ ໂທລະຄົມມະນາຄົມ ສສ ຫວຽດນາມ. 4). ລົງນາມເອກະສານມອບ-ຮັບລົດໄປສະນີ 2 ຄັນ ມູນຄ່າ 62.132 ໂດລາ ແກ່ບໍລິສັດລັດວິສາຫະກິດໄປສະນີລາວ ໂດຍ ຮອງປະທານບໍລິຫານຂອງໄປສະນີ ສສ ຫວຽດນາມ. (ພາບ + ຂ່າວ: ສຸກສະຫວັນ)