ທ່ານ ບຸນຍັງ ວໍລະຈິດ ພົບປະໂອ້ລົມການນຳ ແຂວງສະຫວັນນະເຂດ


...

...

14.03.2019 9:16     

   ໃນວັນທີ 8 ມີນາຜ່ານມາ ຢູ່ທີ່ຫ້ອງປະຊຸມໃຫຍ່ຫໍວັດທະນະທຳໄກສອນ ພົມ ວິຫານ ແຂວງສະຫວັນນະເຂດ, ທ່ານ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດແຫ່ງ ສປປ ລາວ ໄດ້ພົບປະໂອ້ລົມກັບພະນັກງານການນຳຫຼັກແຫຼ່ງ ໃນທົ່ວແຂວງສະຫວັນນະເຂດ ໂດຍມີທ່ານ ສັນຕິພາບ ພົມວິຫານ ກຳມະການສູນກາງພັກ ເລຂາພັກແຂວງເຈົ້າແຂວງສະຫວັນນະເຂດ, ບັນດາທ່ານຄະນະປະຈຳພັກແຂວງ, ກຳມະການພັກແຂວງ, ບັນດາເຈົ້າເມືອງ, ຫົວໜ້າພະແນກການ, ຂະແໜງການ ອ້ອມຂ້າງແຂວງເຂົ້າຮ່ວມຮັບຟັງ. ໃນໂອກາດດັ່ງກ່າວ ທ່ານ ສັນຕິພາບ ພົມວິຫານ ກໍໄດ້ຂຶ້ນກ່າວລາຍງານການ ເຄື່ອນໄຫວຈັດຕ້ັງປະຕິບັດມະຕິກອງປະ ຊຸມໃຫຍ່ຄ້ັງທີ X ຂອງສູນກາງພັກ ແລະ ມະຕິກອງປະຊຸມໃຫຍ່ຄ້ັງທີ VIII ຂອງອົງຄະນະພັກແຂວງສະຫວັນນະເຂດ ໃນຜ່ານມາໂດຍມີເນື້ອໃນບາງຕອນວ່າ: ໃນປີ 2018 ຜ່ານມາ ແຂວງສະຫວັນນະເຂດ ເຖິງຈະພົບກັບບັນຫາຫຍຸ້ງຍາກຫຼາຍປະການເຊັ່ນ: ໄພນ້ຳຖ້ວມ, ປະກົດການຫຍໍ້ທໍ້ກໍເກີດມີຂຶ້ນຫຼາຍ ແຕ່ການນຳຂອງແຂວງກໍໄດ້ພ້ອມກັນແກ້ໄຂຜ່ານຜ່າເຮັດໃຫ້ເສດຖະກິດ-ສັງຄົມ ຍັງສືບຕໍ່ຂະຫຍາຍຕົວຢ່າງຕໍ່ເນື່ອງດ້ານການເມືອງມີຄວາມສະຫງົົບ ແລະເປັນລະບຽບຮຽບຮ້ອຍ ປະຊາຊົນບັນດາເຜົ່າມີຄວາມສາມັກຄີຢ່າງໜັກແໜ້ນ ເຊື່ອໝັ້ນຕໍ່ການນຳພາຂອງພັກ ວຽກງານກໍ່ສ້າງພັກ ພະນັກງານກໍສືບຕໍ່ປັບປຸງໃຫ້ໜັກແໜ້ນເຂັ້ມແຂງ, ໃນທົ່ວແຂວງມີ 231 ຮາກຖານພັກລວມມີໜ່ວຍພັກ 1.816 ໜ່ວຍ. ເປັນໜ່ວຍພັກແຂງຮູ້ນຳພາຮອບດ້ານ 968 ໜ່ວຍ, ມີ 960 ໜ່ວຍພັກທີ່ເປັນເລຂາ ແລະ ເປັນນາຍບ້ານ ແລະ ມີສະມາຊິກພັກທັງໝົດ 26.396 ສະຫາຍ, ມີພະນັກງານລັດຖະກອນທັງໝົດ 16.923 ຄົນ, ຍິງ 8.746 ກວ່າຄົນ, ລຶບລ້າງຄອບຄົວທຸກຍາກຍັງເຫຼືອ 952 ຄອບຄົວ ຂອງຈຳນວນຄອບຄົວທັງໝົດ 7.018 ຄອບຄົວ, ກວມອັດຕາສ່ວນຍັງເຫຼືອ 3,8 % ຂອງຈຳນວນຄອບຄົວໃນທົ່ວແຂວງ ຊຶ່ງຍັງມີບ້ານທຸກຍາກ 98 ບ້ານ ເທົ່າກັບ 9,6%, ນອກຈາກນີ້ ທ່ານ ເຈົ້າແຂວງລາຍງານບັນຫາອື່ນໆອີກຈຳນວນໜຶ່ງ. ໃນພິທີດັ່ງກ່າວ ກໍໄດ້ມີ ທ່ານລັດຖະມົນຕີ ກະຊວງໂຍທາທິການ ແລະ ຂົນ ສົ່ງ, ລັດຖະມົນຕີກະຊວງຊັບພະຍາກອນທຳມະຊາດແລະ ສິ່ງແວດລ້ອມ ແລະລັດຖະມົນຕີກະຊວງກະສິກຳປ່າໄມ້ ກໍໄດ້ຂຶ້ນລາຍງານສະ ພາບການເຄື່ອນໄຫວເຮັດວຽກງານໃນຂົງເຂດດັ່ງກ່າວໃນປີ 2018 ຜ່ານມາ ພ້ອມທັງຊີ້ໃຫ້ເຫັນບັນຫາສະດວກ, ຂໍ້ຫຍຸ້ງຍາກ ແລະ ຂໍ້ຄົງຄ້າງໃນການຈັດຕ້ັງປະຕິບັດວຽກງານຂອງບັນດາກະຊວງດັ່ງກ່າວຜ່ານມາໃນທົ່ວປະເທດເວົ້າສະເພາະກໍແມ່ນຢູ່ແຂວງສະຫວັນນະເຂດ. ຈາກນັ້ນ ທ່ານປະທານປະເທດ ກໍໄດ້ມີຄຳເຫັນໂອ້ລົມຕໍ່ກອງປະຊຸມ ຊຶ່ງກ່ອນອື່ນທ່ານໄດ້ສະແດງຄວາມຊົມເຊີຍຕໍ່ບັນດາຜົນສຳເລັດໃນການພັດທະນາເສດຖະກິດ-ສັງຄົມ ຢູ່ແຂວງສະຫວັນນະເຂດ ຊຶ່ງເຫັນວ່າມີຫຼາຍອັນພົ້ນເດັ່ນ ແລະ ເຕີບໃຫຍ່ຂະຫຍາຍຕົວ ຊຶ່ງແມ່ນໝາກຜົນຂອງການນຳພາຂອງພັກ ແລະ ລັດແຕ່ລະຂັ້ນໃນຜ່ານມາພ້ອມນີ້ກໍໃຫ້ສືບຕໍ່ສຶກສາອົບຮົມການເມືອງແນວຄິດ ໃຫ້ພະນັກງານການນຳຫຼັກແຫຼ່ງ ແລະ ປະຊາຊົນບັນດາເຜົ່າ, ໃຫ້ມີຄວາມເຊື່ອໝັ້ນຕໍ່ແນວທາງຂອງພັກ ບໍ່ຫວັ່ນໄຫວຄອນແຄນຕໍ່ກົນອຸບາຍຫວັງມ້າງເພທຳລາຍຂອງສັດຕູ, ເຖິງແມ່ນສະພາບການຂອງໂລກຂອງພາກພື້ນຈະມີການຜັນແປສັບສົນ ແລະສິ່ງທ້າທາຍຫຼາຍຢ່າງ ຊຶ່ງມັນກໍໄດ້ສົ່ງຜົນກະທົບໂດຍກົງຕໍ່ປະເທດຊາດ ແລະ ປະຊາຊົນພວກເຮົາ ຊຶ່ງກຸ່ມຄົນບໍ່ຫວັງດີ ສວຍໃຊ້ດ້ານອ່ອນ ແລະ ປະກົດການຫຍໍ້ທໍ້ ເພື່ອຫັນປ່ຽນແນວຄິດສ້າງຄວາມແຕກແຍກລະຫວ່າງອຳນາດການປົກຄອງລັດ ແລະປະຊາຊົນລາວຂອງພວກເຮົາ. ດ້ານວຽກງານກໍ່ສ້າງພັກ ໄລຍະນີ້ເປັນໄລຍະທີ່ ທົ່ວພັກທົ່ວປວງຊົນອອກແຮງແຂ່ງຂັນກັນສ້າງຂະບວນການ ເພື່ອຕ້ອນຮັບກອງປະຊຸມໃຫຍ່ອົງ ຄະນະພັກ 3 ຂັ້ນ ສະນັ້ນການກໍ່ສ້າງພັກ-ພະນັກງານ ຕ້ອງໄດ້ຕາມມາດຖານລະບຽບຂອງພັກ ເປັນແບບຢ່າງ ແລະ ສ້າງຄວາມໄວ້ເນື້ອເຊື່ອໃຈແກ່ມະຫາຊົນ ບໍ່ໃຊ້ອຳນາດຫາຜົນປະໂຫຍດມາໃສ່ຕົນເອງຕ້ອງສ້າງໃຫ້ໄດ້ຄຸນທາດການເມືອງທີ່ດີ ບໍ່ໃຫ້ມີແນວຄິດອະຄະຕິຄັບແຄບ ໃຫ້ເປັນທີ່ເພິ່ງຂອງປະຊາຊົນ, ພະນັກງານສະມາຊິກພັກທຸກສະຫາຍຕ້ອງມີຄວາມປອດໃສ ໜັກແໜ້ນ ແລະ ເຂັ້ມແຂງ, ບຸກຄົນໃດກະທຳຜິດຕໍ່ລະບຽບຂອງພັກກະທຳຜິດຕໍ່ກົດໝາຍຂອງລັດກໍຕ້ອງມີຄວາມຈຳເປັນຕ້ອງລົງວິໄນ ໃນກອງປະຊຸມຂອງພັກ ທີ່ຈະມີຂຶ້ນໃນຕໍ່ໜ້ານີ້ ຕ້ອງໄດ້ກວດຄືນໃຫ້ດີ ອົງປະກອບດ້ານບຸກຄະລາກອນ ຕ້ອງມີທັງຜູ້ສູງອາຍຸ, ປານກາງໜຸ່ມນ້ອຍ ມີທັງເພດຍິງ, ເພດຊາຍ ແລະ ຊົນເຜົ່າ. ທາງດ້ານເສດຖະກິດ ສືບຕໍ່ສ້າງລາຍຮັບໃຫ້ໄດ້ຄາດໝາຍຂອງແຜນການວາງອອກ ກວດກາບັນດາຫົວໜ່ວຍເສດຖະກິດ ບັນດາໂຄງການລົງທຶນຂອງຕ່າງປະເທດ ຫົວໜ່ວຍເສດຖະກິດພາຍໃຫ້ມີຄວາມບໍລິສຸດໂປ່ງໃສຕໍ່ລະບຽບກົດໝາຍ ເຮັດພັນທະອາກອນຕໍ່ປະເທດຊາດການເກັບລາຍຮັບ ແລະ ຄຸ້ມຄອງລາຍຈ່າຍ ກໍໃຫ້ເປັນໄປຕາມລະບຽບແບບແຜນ, ແກ້ໄຂບັນຫາໜີ້ສິນທີ່ຄົງຄ້າງ, ໃຊ້ຫົວຄິດປະດິດສ້າງ ເຂົ້າໃນການພັດທະນາເສດຖະກິດ ໃຫ້ຈະເລີນເຕີບໂຕ ໂດຍສະເພາະຄອບຄົວທຸກຍາກທີ່ຍັງເຫຼືອຢູ່ໃຫ້ຫຼຸດລົງເປັນລຳດັບເວົ້າສະເພາະຢູ່ແຂວງສະຫວັນນະເຂດ ກໍແມ່ນຍັງເມືອງນອງທີ່ບໍ່ທັນປະກາດເປັນເມືອງພົ້ນທຸກກໍໃຫ້ພະຍາຍາມຕື່ມອີກສ້າງໃຫ້ເຂົາເຈົ້າມີອາຊີບ, ມີລາຍໄດ້ ຖ້າເຂົາເຈົ້າຜະລິດຫຍັງໄດ້ ພາກລັດກໍຕ້ອງສົ່ງເສີມເລື່ອງຕະຫຼາດຈຳໜ່າຍ ສົ່ງເສີມທາງດ້ານການຜະລິດໃຫ້ມີເຕັກນິກ ຕາມຍຸກສະໄໝໃໝ່ ສ້າງໃຫ້ປະຊາຊົນທີ່ຢູ່ຫ່າງໄກສອກຫຼີກຮູ້ຈັກຊື້-ຂາຍ ແລະ ຮູ້ຈັກຜະລິດ ເພື່ອຍົກສູງຊີວິດການເປັນຢູ່ ໃຫ້ນັບມື້ມີຄຸນນະພາບທີ່ດີຂຶ້ນ. ບັນດາຊົນລະປະທານທີ່ສ້າງຂຶ້ນແລ້ວ ຕ້ອງໄດ້ກວດກາສະພາບເຕັກນິກໃຫ້ໃຊ້ງານໄດ້ຕະຫຼອດໃຫ້ອຳນວຍຄວາມສະດວກເລື່ອງນ້ຳໃຫ້ປະຊາຊົນຜະລິດເຂົ້າໄດ້ທັງ 2 ລະດູ ໃຫ້ເຂົາເຈົ້າປູກພືດ ທີ່ເປັນສິນຄ້າຂາຍໄດ້ຕາມຈຸດພິເສດ ແລະເງື່ອນໄຂຂອງແຕ່ລະທ້ອງຖິ່ນ ເບື້ອງລັດ ກໍຕ້ອງສົ່ງເສີມວິຊາການເຕັກນິກ ແນວພັນຢາປາບສັດຕູພືດ ແລະ ອື່ນໆ. (ຂ່າວ: ຕຸກໆ)