ທ່ານ ໄຊສົມພອນ ພົມວິຫານ ໂອ້ລົມຕໍ່ ກອງປະຊຸມສາມັນຄົບຄະນະກຳມະການ ແນວລາວສ້າງຊາດ ຄັ້ງທີ 4 ສະໄໝທີ X


...

14.03.2019 9:38     

   ທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະ ທານສູນກາງແນວລາວສ້າງຊາດ ໄດ້ໃຫ້ກ່ຽດໂອ້ລົມຕໍ່ກອງປະຊຸມສາມັນຄົບຄະນະກໍາມະການສູນກາງແນວລາວສ້າງຊາດ ຄັ້ງທີ 4 ສະໄໝທີ X ເມື່ອວັນທີ 13 ມີນານີ້ວ່າ: ເພື່ອເປັນການຮັບປະກັນໃຫ້ທິດທາງແຜນການເຄື່ອນໄຫວປີ 2019, ຕາງໜ້າພັກ-ລັດຖະບານ, ຂໍສະແດງຄວາມຊົມເຊີຍ ແລະ ຕີລາຄາສູງຕໍ່ຜົນງານການ ເຄື່ອນໄຫວ ຂອງຄະນະກໍາມະການສູນກາງແນວລາວສ້າງຊາດ ກໍຄືແນວລາວສ້າງຊາດແຕ່ລະຂັ້ນ, ສະແດງຂອບໃຈຕໍ່ບັນດາອົງການຈັດຕັ້ງ ພັກ-ລັດ, ຄະນະພັກ-ອົງການປົກຄອງທ້ອງຖິ່ນ ພາກສ່ວນຕ່າງໆທີ່ໄດ້ໃຫ້ຄວາມຮ່ວມມືສ້າງເງື່ອນ ໄຂໃຫ້ອົງການແນວລາວສ້າງຊາດໄດ້ເຄື່ອນໄຫວຕາມພາລະບົດບາດຂອງຕົນດ້ວຍຄວາມຮັບຜິດ ຊອບ, ເປັນການປະກອບສ່ວນເຮັດໃຫ້ການປະຕິບັດໜ້າທີ່ການເມືອງຂອງແນວລາວສ້າງຊາດ ໄດ້ມີຜົນງານພົ້ນເດັ່ນຂຶ້ນໃນໜຶ່ງປີຜ່ານມາ ພ້ອມກັນນັ້ນກໍໄດ້ຍົກໃຫ້ເຫັນຈຸດອ່ອນ, ຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ໄດ້ກຳນົດທິດທາງການເຄື່ອນໄຫວປີ 2019 ແຕ່ເພື່ອເຮັດໃຫ້ເນື້ອໃນຈິດໃຈ ຂອງມະຕິກອງປະຊຸມສາມັນຄົບຄະນະກໍາມະການສູນກາງແນວລາວສ້າງຊາດຄັ້ງນີ້ ໄດ້ຮັບການຈັດຕັ້ງປະຕິບັດ, ຄວນເອົາໃຈໃສ່ດັ່ງນີ້ີ້:

1. ໃນສະພາບເງື່ອນໄຂໃໝ່, ສະພາບແວດລ້ອມໃໝ່ ປະເທດເຮົາຍັງປະສົບຄວາມຫຍຸ້ງຍາກ ດ້ານເສດຖະກິດມະຫາພາກ, ບັນຫາໄພພິບັດທາງທໍາມະຊາດ ແລະ ອິດທິກຳລັງປໍລະປັກທີ່ເພີ່ມທະວີການເຄື່ອນໄຫວມ້າງເພທຸກຮູບແບບ ໂດຍໂຄສະນາທັບຖົມໂຈມຕີແນວທາງ, ສ້າງຄວາມເສື່ອມເສຍໃຫ້ແກ່ບົດບາດການນຳພາຂອງພັກ-ລັດ ໂດຍສະເພາະບັນຫາສື່ອອນລາຍຕ່າງໆທີ່ໄດ້ໂຄສະນາບິດເບືອນຄວາມຈິງ, ອົງການແນວລາວສ້າງຊາດ, ຄະນະກໍາມະການສູນກາງແນວລາວສ້າງຊາດ ພວກເຮົາຈະຕ້ອງເອົາໃຈໃສ່ ເພີ່ມທະວີວຽກງານສຶກສາອົບຮົມການເມືອງ-ແນວຄິດໃຫ້ພະນັກງານ-ລັດຖະກອນ, ປະຊາຊົນບັນດາເຜົ່າ ໂດຍສະເພາະຢູ່ເຂດຊົນນະບົດດ້ວຍຫຼາຍຮູບການ ແລະ ວິທີການ ເປັນຕົ້ນ: ການເຜີຍແຜ່ເຊື່ອມຊຶມເອກະສານຕ່າງໆທີ່ສຳຄັນຂອງພັກ-ລັດ, ມູນເຊື້ອອັນດີງາມ,ຜົນງານອັນໂດດເດັ່ນຂອງພັກ-ລັດ, ແນວລາວສ້າງຊາດ ແລະ ອົງການຈັດຕັ້ງມະຫາຊົນ ແລະ ລົງຮາກຖານພົບປະໂອ້ລົມ, ເກັບກໍາຄວາມຂັດຂ້ອງໝອງໃຈ, ຫາງສຽງສັງຄົມ ເພື່ອເຮັດໃຫ້ເຂົາເຈົ້າມີຄວາມຮັບຮູ້ເຂົ້າໃຈຕໍ່ແນວທາງຂອງພັກ, ຄວາມຫຍຸ້ງຍາກໃນດ້ານເສດຖະກິດ-ການເງິນ, ສະພາບການພັດທະນາເສດຖະກິດ-ສັງຄົມແຕ່ລະໄລຍະ ແລະ ອື່ນໆ ເພື່ອປຸກລະດົມປະ ຊາຊົນບັນດາເຜົ່າມີສະຕິຊາດສູງ ກຽມພ້ອມຕອບຕ້ານຕໍ່ທຸກກົນອຸບາຍຫັນປ່ຽນໂດຍສັນຕິຂອງກຸ່ມຄົນບໍ່ດີ ສືບຕໍ່ປະກອບສ່ວນຢ່າງຕັ້ງໜ້າໃນການສ້າງສາ ແລະ ພັດທະນາປະເທດຊາດໃຫ້ຈະເລີນກ້າວໜ້າຂຶ້ນເລື້ອຍໆ;

2. ໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ VIII ໄດ້ຮັບຮອງເອົາກົດໝາຍວ່າດ້ວຍແນວລາວສ້າງຊາດ ແລະ ໄດ້ຮຽບຮຽງຄືນຕາມທິດຊີ້ນໍາຂອງກອງປະຊຸມດັ່ງກ່າວແລ້ວ. ສະນັ້ນ, ຄະນະຮັບຜິດຊອບສ້າງ ແລະ ປັບປຸງໃຫ້ຮີບຮ້ອນຈັດພິມປຶ້ມກົດໝາຍ, ສ້າງຄໍາແນະນໍາໃນການຈັດຕັ້ງປະຕິບັດກົດໝາຍ, ເອົາໃຈໃສ່ການຈັດຕັ້ງ ເຜີຍແຜ່ກົດໝາຍດັ່ງກ່າວໃຫ້ກວ້າງຂວາງທົ່ວເຖິງ; ພ້ອມກັນນັ້ນ, ເປັນເຈົ້າການຊຸກຍູ້ຕິດຕາມທໍາມະນູນສົງສະບັບປັບປຸງທີ່ສົ່ງລັດຖະບານພິຈາລະນາປະກາດໃຊ້, ຮ່າງຂໍ້ກໍານົດການປະສານງານລະຫວ່າງສູນກາງແນວລາວສ້າງຊາດ ກັບກະຊວງພາຍໃນ ກ່ຽວກັບວຽກງານສາສະໜາ ແລະ ຄໍາແນະນໍາວ່າດ້ວຍການຈັດຕັ້ງປະຕິບັດດໍາລັດ 315/ລບ ໃນຂົງເຂດແນວລາວສ້າງຊາດ ທີ່ໄດ້ສະເໜີຜ່ານກະຊວງພາຍໃນໃຫ້ຄວາມເປັນເອກະພາບ ແລະ ພາຍຫຼັງທີ່ສໍາເລັດສອງເອກະສານດັ່ງກ່າວ ມອບໃຫ້ພາກສ່ວນກ່ຽວຂ້ອງຮີບຮ້ອນຈັດຕັ້ງເຜີຍແຜ່ໃຫ້ບັນດາກໍາມະການສູນກາງແນວລາວສ້າງຊາດ, ແນວລາວສ້າງຊາດທຸກຂັ້ນ, ບັນດາພາກສ່ວນກ່ຽວຂ້ອງໃຫ້ໄດ້ຮັບຮູ້ຢ່າງກວ້າງຂວາງ ແລະ ທົ່ວເຖິງ.

3. ການຈັດຕັ້ງປະຕິບັດຕາມທິດຊີ້ນໍາຂອງກົມການ ເມືອງສູນກາງພັກ, ຄະນະເລຂາທິການສູນກາງພັກ ກ່ຽວກັບ ການກະກຽມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ປີ 2021; ໃນ ນັ້ນ, ເອົາໃຈໃສ່ກະກຽມກອງປະຊຸມໃຫຍ່ 3 ຂັ້ນນັ້ນ, ໃຫ້ປະທານແນວລາວສ້າງຊາດນະຄອນຫຼວງ, ບັນດາແຂວງເອົາໃຈໃສ່ຄົ້ນຄ້ວາປະສານສົມທົບກັບຄະນະພັກຂັ້ນຂອງຕົນໃນການກະກຽມບຸກຄະລາກອນ ໃຫ້ແກ່ກອງປະຊຸມໃຫຍ່ສາມຂັ້ນຂອງອົງການແນວລາວສ້າງຊາດ ໂດຍສົມທົບແໜ້ນກັບຄະນະພັກນະຄອນຫຼວງ ແລະ ບັນດາແຂວງ ຄົ້ນຄວ້າດ້ານບຸກຄະລາກອນຜູ້ທີ່ມີເງື່ອນໄຂຄົບຖ້ວນ ຕາມມາດຕະຖານ, ເປັນບຸກຄົນທີ່ມີບົດບາດໃນການເຕົ້າໂຮມຄວາມສາມັກຄີ, ສາມາດປຸກລະດົມປະຊາຊົນບັນດາເຜົ່າ, ນັກຮຽນຮູ້ປັນຍາຊົນເຂົ້າຮ່ວມຂະບວນການຮັກຊາດພັດທະນາ ກໍຄືປະ ກອບສ່ວນໃນການສ້າງສາພັດທະນາປະເທດຊາດໃຫ້ມີຄວາມຈະເລີນສີວິໄລ. ສ່ວນເວລາດໍາເນີນກອງປະຊຸມແມ່ນໃຫ້ຈັດຫຼັງກອງປະຊຸມໃຫຍ່ຂັ້ນແຂວງ, ເມືອງ ຊຶ່ງລະອຽດໄດ້ມີຄຳແນະນໍາຂອງຄະນະປະຈໍາວ່າດ້ວຍການກະກຽມ ແລະ ດໍາເນີນກອງປະຊຸມໃຫຍ່ຂອງແນວລາວສ້າງຊາດແຂວງ, ນະຄອນຫຼວງ,ເມືອງ-ນະຄອນ ແລະ ບ້ານ ໄດ້ຈັດສົ່ງໃຫ້ແນວລາວສ້າງຊາດທ້ອງຖິ່ນແລ້ວ, ພ້ອມກັນນັ້ນ, ສູນກາງແນວລາວສ້າງຊາດກໍໄດ້ລົງສົມທົບກັບບັນດາແຂວງຈໍານວນໜຶ່ງແດ່ແລ້ວ;

4. ໃນປີ 2020 ທີ່ຈະມາເຖິງນີ້ ຈະເປັນປີໜຶ່ງທີ່ຄົບຮອບວັນປະຫວັດສາດສໍາຄັນຂອງພັກ, ຂອງຊາດ; ໃນນັ້ນ, ແນວລາວສ້າງຊາດພວກເຮົາຈະມີອາຍຸຄົບຮອບ 70 ປີພໍດີ.

ສະນັ້ນ, ໃຫ້ຄະນະຮັບຜິດຊອບກະກຽມສະເຫຼີມສະຫຼອງ 70 ປີ ວັນສ້າງຕັ້ງແນວລາວສ້າງຊາດໃຫ້ເອົາໃຈໃສ່ກະກຽມແຜນການລະອຽດ, ການແຕ່ງຕັ້ງຄະນະຮັບຜິດຊອບລະດັບຊາດ ແລະ ຄະນະຊ່ວຍວຽກ; ການປະສານສົມທົບພາກສ່ວນຕ່າງໆ, ແນວລາວສ້າງຊາດແຕ່ລະຂັ້ນ ເພື່ອສ້າງຂະບວນການດ້ານຕ່າງໆສະເຫຼີມສະຫຼອງວັນສ້າງຕັ້ງແນວລາວສ້າງຊາດຄົບຮອບ 70 ປີໂດຍຕິດພັນກັບວັນສໍາຄັນຂອງພັກ-ລັດ ເປັນຕົ້ນແມ່ນການຈັດຕັ້ງປາຖະກະຖາມູນເຊື້ອຂອງພັກ, ຂອງແນວລາວສ້າງຊາດ, ຈັດຕັ້ງການສໍາມະນາກ່ຽວກັບວຽກງານແນວໂຮມໃນໄລຍະໃໝ່, ຈັດຕັ້ງງານບຸນອຸທິດເຖິງອະດີດການນໍາພັກ-ລັດ,ພະນັກງານ-ນັກຮົບ ແລະ ປະຊາຊົນຜູ້ມີຄຸນງາມຄວາມດີຕໍ່ປະເທດຊາດ, ໂຄສະນາເຜີຍແຜ່, ສໍາພາດບຸກຄົນດີ ເດັ່ນ, ການສະແດງສິລະປະ, ການວາງສະແດງຮູບພາບ, ການສ້າງຂະບວນກິລາ ແລະ ອື່ນໆ ເພື່ອເຮັດງານສະ ເຫຼີມສະຫຼອງດັ່ງກ່າວຄືກັບປາງບຸນໃຫຍ່;

5. ໃຫ້ຄະນະຮັບຜິດຊອບກະກຽມຄົ້ນຄ້ວາ, ປັບປຸງມະຕິ 05/ກມສພ ວ່າດ້ວຍວຽກງານມະຫາຊົນຂອງພັກໃນໄລຍະໃໝ່ ໂດຍສະເພາະຢູ່ຂົງເຂດແນວລາວສ້າງຊາດ ສືບຕໍ່ປັບປຸງມະຕິດັ່ງກ່າວ ໃຫ້ສໍາເລັດກະກຽມຈັດຕັ້ງສໍາມະນາເພື່ອລະດົມຄວາມຄິດເຫັນ ກ້າວໄປເຖິງການນໍາໄປທາບທາມຢູ່ທ້ອງຖິ່ນຮາກຖານ. ຫຼັງຈາກນັ້ນ, ຈຶ່ງປັບປຸງ,ສະຫຼຸບລາຍງານເພື່ອຂໍທິດຊີ້ນໍາຈາກກົມການເມືອງສູນກາງພັກ ກ່ອນຈະນໍາສະເໜີເຂົ້າຜ່ານກອງປະຊຸມຄົບຄະ ນະບໍລິຫານງານສູນກາງພັກ ທ້າຍສະໄໝທີ X;

6. ອົງການແນວລາວສ້າງຊາດ, ກໍາມະການແນວລາວສ້າງຊາດແຕ່ລະຂັ້ນ ໃຫ້ເພີ່ມທະວີປະຕິບັດພາລະບົດບາດຕິດຕາມກວດກາຂອງແນວລາວສ້າງຊາດໃຫ້ເຂັ້ມແຂງ, ເອົາໃຈໃສ່ ຄົ້ນຄວ້າຄໍາຮ້ອງຄໍາສະເໜີ, ເກັບກໍາຄວາມຄິດຄວາມເຫັນຂັດຂ້ອງໝອງໃຈຂອງປະຊາຊົນບັນດາເຜົ່າຢູ່ທ້ອງຖິ່ນຕໍ່ການປະຕິບັດພາລະບົດບາດ, ສິດ-ໜ້າທີ່ຂອງສະມາຊິກສະພາແຫ່ງຊາດ, ສະພາປະຊາຊົນຂັ້ນແຂວງ, ການປະຕິບັດໜ້າທີ່ຂອງອົງການບໍລິຫານ, ອົງການ ປົກຄອງທ້ອງຖິ່ນ, ອົງການຕຸລາການ, ເອົາໃຈໃສ່ສົມທົບກັບການຈັດຕັ້ງທີ່ກ່ຽວຂ້ອງໃນການຊີ້ແຈງອະທິບາຍ, ແກ້ໄຂບົນພື້ນຖານລະບຽບ, ກົດໝາຍ ຕໍ່ບັນຫາຕ່າງໆທີ່ພົ້ນເດັ່ນ; ພ້ອມກັນນັ້ນ, ແນວລາວສ້າງຊາດນະຄອນຫຼວງ-ບັນດາແຂວງທົ່ວປະເທດ ຕ້ອງເພີ່ມທະວີຄວາມຮັບຜິດຊອບໃນການຕິດຕາມກວດກາຜົນການແກ້ໄຂຄໍາສະເໜີຂອງປະຊາຊົນບັນ ດາເຜົ່າທີ່ໄດ້ສັງລວມສະເໜີຕໍ່ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ VIII.

7. ແນວລາວສ້າງຊາດທຸກຂັ້ນໃຫ້ສືບຕໍ່ຊີ້ນໍາ ນໍາພາຕໍ່ການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ໃຫ້ເປັນຂະບວນ ກວ້າງຂວາງຕິດພັນກັບການສ້າງຄອບຄົວ, ສ້າງບ້ານພັດທະນາຢູ່ທ້ອງຖິ່ນຮາກຖານ, ພ້ອມ ກັນນີ້ໃຫ້ເອົາໃຈໃສ່ດ້ານຄຸນນະພາບເປັນບັນຫາສໍາຄັນ ເພື່ອປະກອບສ່ວນເຮັດໃຫ້ທ້ອງຖິ່ນຮາກຖານ, ຄອບຄົວມີຄວາມສະຫງົບ, ມີຊີວິດການເປັນຢູ່ດີຂຶ້ນ, ຢູ່ແຕ່ລະແຂວງ ຕ້ອງສູ້ຊົນສ້າງໃຫ້ເມືອງເປັນເມືອງສາມັກຄີປອງດອງໃຫ້ມີຈໍານວນເພີ່ມຂຶ້ນ; ເພີ່ມທະວີການປະສານສົມທົບໃນການເຄື່ອນໄຫວຂອງແນວລາວສ້າງຊາດ, ສະຫະພັນນັກຮົບເກົ່າ ແລະ ອົງການຈັດຕັ້ງມະຫາຊົນ;ແນວລາວສ້າງຊາດແຕ່ລະຂັ້ນຕ້ອງມີລະບອບເຮັດວຽກປະສານສົມທົບໃນການເຄື່ອນໄຫວກັບບັນດາອົງການມະຫາຊົນ, ຄວນມີລະບອບສ່ອງແສງ, ເຄື່ອນໄຫວຂະບວນການຕ່າງໆຮ່ວມກັນ, ກໍາມະການສູນກາງແນວລາວສ້າງຊາດຄວນສະໜັບສະໜູນຄະນະຊາວໜຸ່ມ, ຄະນະສະຫະພັນ ນັກ ຮົບເກົ່າ, ແມ່ຍິງ, ກໍາມະບານໃນການເຄື່ອນໄຫວ;

8. ໃນທ້າຍປີ 2018 ຜ່ານມາ, ແນວລາວສ້າງຊາດພວກເຮົາໄດ້ສໍາເລັດຢ່າງຈົບງາມໃນການດໍາເນີນກອງປະຊຸມພົບປະຜູ້ຊົງຄຸນວຸດທິບັນດາເຜົ່າທົ່ວປະເທດ ຄັ້ງທີ 3 ແລະ ໃນກອງ ປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ VIII ໄດ້ຮັບຮອງເອົາຊົນເຜົ່າ ບຣູ ເປັນຊົນເຜົ່າທີ 50.

ສະນັ້ນ, ແນວລາວສ້າງຊາດແຕ່ລະຂັ້ນ ໃຫ້ເອົາໃຈໃສ່ການເຜີຍແຜ່ຜົນສໍາເລັດດັ່ງກ່າວ ແລະ ຊື່ເອີ້ນຊົນເຜົ່າບຣູ ໂດຍສົມທົບກັບອົງການປົກຄອງທ້ອງຖິ່ນຕາມສະພາບເງື່ອນໄຂຕົວຈິງຂອງຕົນ;

9. ໃນກອງປະຊຸມສາມັນຄົບຄະນະກໍາມະການສູນກາງແນວລາວສ້າງຊາດພວກເຮົາ ຄັ້ງນີ້ໄດ້ຮັບຮອງເອົາກໍາມະການສູນກາງແນວລາວສ້າງຊາດສະໄໝທີ X ຈໍານວນໜຶ່ງ ຊຶ່ງແມ່ນຜູ້ທີ່ມີມາດຕະຖານເງື່ອນໄຂຄົບຖ້ວນ. ສະນັ້ນ, ກໍາມະການສູນກາງແນວລາວສ້າງ ຊາດ ຈະຕ້ອງໄດ້ເອົາໃຈໃສ່ປະຕິບັດຕາມພາລະບົດບາດ, ສິດ ແລະ ໜ້າທີ່ຂອງຕົນ ຕາມກົດໝາຍວ່າດ້ວຍແນວລາວສ້າງຊາດ ໂດຍສະເພາະ ກໍາມະການສູນກາງແນວລາວສ້າງຊາດຢູ່ຕ່າງປະເທດຍິ່ງຈະຕ້ອງເອົາໃຈໃສ່ວຽກງານເຕົ້າໂຮມຄວາມສາມັກຄີຄົນລາວຢູ່ຕ່າງປະເທດໃຫ້ດໍາລົງຊີວິດສອດຄ່ອງກັບກົດໝາຍປະເທດທີ່ຕົນອາໄສຢູ່;

ພ້ອມກັນນັ້ນ, ປຸກລະດົມຄົນລາວອວ່າຍໜ້າມາຢ້ຽມຢາມ ແລະ ປະກອບທຶນຮອນຊ່ວຍເຫຼືອບ້ານເກີດເມືອງນອນຂອງຕົນ ຕາມເງື່ອນໄຂ ແລະ ຄວາມສາມາດຕົວຈິງ, ພ້ອມກັນນັ້ນ, ກໍສືບຕໍ່ ຊັກຊວນກັນມາຢ້ຽມຢາມບັນດາບ້ານເກີດເມືອງນອນ, ເຮັດບຸນສິນກິນທານຕາມຮີດ ຄອງປະເພນີຕ່າງໆ, ເຜີຍແຜ່ຮີດຄອງປະເພນີອັນດີງາມ ກໍຄືຈັດງານບຸນຕ່າງໆຂອງຊາດ ລາວ ເພື່ອເຕົ້າໂຮມພົບປະສ້າງສັນຊຸມຊົນຄົນລາວນໍາກັນດ້ວຍຫຼາຍຮູບຫຼາຍສີ;

10. ແນວລາວສ້າງຊາດ ທ້ອງຖິ່ນ ໂດຍສະເພາະບັນ ດາແຂວງທີ່ມີຊາຍແດນຕິດຈອດກັບບັນດາແຂວງຂອງ ສສ ຫວຽດນາມ, ກໍາປູເຈຍ ໃຫ້ເອົາ ໃຈໃສ່ຜັນຂະຫຍາຍເນື້ອໃນກອງປະຊຸມແລກປ່ຽນກ່ຽວກັບວຽກງານສາສະໜາ,ວຽກງານແນວໂຮມ, ວຽກງານຂົນຂວາຍປະ ຊາຊົນ, ວຽກງານຊາຍແດນ ແລະ ກອງປະຊຸມເສີມສ້າງຄວາມສາມັກຄີ, ມິດຕະພາບ, ສັນຕິພາບ ແລະການຮ່ວມມື ເພື່ອພັດທະນາລະຫວ່າງສູນກາງແນວລາວສ້າງຊາດແລະ ແນວໂຮມສາມັກຄີພັດທະນາມາຕຸພູມກໍາປູເຈຍ ເພື່ອໃຫ້ປະຊາຊົນຢູ່ຕາມເຂດຊາຍແດນຮັບຮູ້ເຂົ້າໃຈສະພາບຄວາມເປັນຈິງ ທັງເຂົ້າຮ່ວມນໍາພັກ-ລັດ, ອໍານາດການປົກຄອງທ້ອງ ຖິ່ນປະກອບສ່ວນປົກປັກຮັກສາຫຼັກໝາຍຊາຍແດນ, ສ້າງຊາຍແດນໃຫ້ມີສັນຕິພາບ, ມິດຕະພາບ ແລະ ການພັດທະນາ; ໂດຍຈັດຕັ້ງຜັນຂະຫຍາຍບົດບັນທຶກຮ່ວມມື ແລະ ມີຄໍາແນະນໍາຂອງຄະນະປະຈໍາສູນກາງແນວລາວສ້າງຊາດ;

- ແນວລາວສ້າງຊາດຢູ່ທ້ອງຖິ່ນໃຫ້ຖືສໍາຄັນການພົວພັນຮ່ວມມືກັບປະເທດເພື່ອນມິດຍຸດທະສາດ ເປັນຕົ້ນ ສສ ຫວຽດນາມ, ສປ. ຈີນ ແລະ ກໍາປູເຈຍ ແລະ ປະເທດເພື່ອນມິດ ສາກົນ, ອົງການຈັດຕັ້ງທາງສັງຄົມ ເພື່ອຍາດແຍ່ງທຶນຮອນມາພັດທະນາທ້ອງຖິ່ນຂອງຕົນ, ການແລກປ່ຽນພົບປະບົດຮຽນນໍາກັນ ແລະ ອື່ນໆ ແຕ່ກໍໃຫ້ເອົາໃຈໃສ່ເລືອກເຟັ້ນຄັກແນ່ ແລະ ສັ່ງຊາເບິ່ງຜົນໄດ້ຮັບ ແລະ ຜົນເສຍທີ່ຈະຕາມມາ. (ຂ່າວ. ຍຸພິນທອງ)