ຮອງນາຍົກລັດຖະມົນຕີ ຕ້ອນຮັບລັດຖະມົນຕີ ກະຊວງຖະແຫຼງຂ່າວ ແລະ ການສື່ສານ ສສ ຫວຽດນາມ


...

14.03.2019 9:38     

   ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນ ຕີກະຊວງການເງິນ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ຫງວຽນ ແມງ ຮຸ່ງ (Mr. Nguyen Manh Hung) ລັດຖະມົນຕີກະຊວງຖະແຫຼງຂ່າວ ແລະ ການສື່ສານ (MIC) ສສ ຫວຽດນາມ ພ້ອມດ້ວຍຄະນະ ເມື່ອວັນທີ 12 ມີນາຜ່ານມາ ທີ່ຫ້ອງຮັບແຂກກະຊວງການເງິນ, ເນື່ອງໃນໂອກາດທີ່ທ່ານ ແລະ ຄະນະເດີນທາງມາຢ້ຽມຢາມເຮັດວຽກຢູ່ ສປປ ລາວ ແລະ ເຂົ້າຮ່ວມກອງປະຊຸມການຮ່ວມມືດ້ານວຽກງານ ໄອຊີທີ ສອງຝ່າຍທີ່ນະຄອນຫຼວງວຽງຈັນ ໃນລະຫວ່າງວັນທີ 11-13 ມີນາ 2019. ຈຸດປະສົງການເຂົ້າຢ້ຽມຂໍ່ານັບໃນຄັ້ງນີ້ ກໍເພື່ອເພີ່ມທະ ວີການຮ່ວມມືສອງຝ່າຍໃນວຽກງານ ໄອຊີທີ ແລະ ທົບທວນຄືນຜົນການຈັດຕັ້ງປະຕິບັດການລົງນາມບົດບັນທຶກກອງປະຊຸມ ແຜນການຮ່ວມມື (MOM) ຮ່ວມມືກັນ ໃນໄລຍະຜ່ານມາ ແລະ ແຜນການຮ່ວມມືໃນຕໍ່ໜ້າ, ທັງເປັນການຂໍທິດຊີ້ນໍາຕໍ່ກັບແຜນການຮ່ວມມືໃນຕໍ່ໜ້າຂອງການຮ່ວມມືສອງຝ່າຍສອງກະຊວງ ໂດຍສະເພາະການຮ່ວມມືໃນຂະແໜງການໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໃຫ້ປະກົດຜົນເປັນຈິງເປັນກ້າວໆ. ໂອກາດນີ້, ທ່ານ ສົມດີ ດວງດີ ໄດ້ສະແດງຄວາມຍິນດີ ແລະ ໃຫ້ການຕ້ອນຮັບຢ່າງອົບອຸ່ນຕໍ່ຄະນະທ່ານ ຫງວຽນ ແມງ ຮຸ່ງ ພ້ອມດ້ວຍຄະນະ, ພ້ອມທັງໄດ້ຕີລາຄາສູງຕໍ່ການຮ່ວມມືອັນສະໜິດແໜ້ນລະຫວ່າງສອງປະເທດລາວ-ຫວຽດນາມ; ລັດຖະບານ ກໍຄືປະຊາຊົນສອງຊາດ ຍາມໃດກໍໄດ້ສະແດງຄວາມມີນ້ຳໃຈໄມຕີຈິດ ແລະ ການຊ່ວຍເຫຼືອຊຶ່ງກັນ ແລະ ກັນ. ຊຶ່ງເປັນການປະກອບສ່ວນຮັດ ແໜ້ນມິດຕະພາບ, ການຮ່ວມມືກັນຢ່າງໃກ້ຊິດ ກໍຄືໃນວຽກງານໄປສະນີ, ໂທລະຄົມມະນາຄົມ ແລະ ເຕັກໂນໂລຊີການສື່ສານຂໍ້ມູນຂ່າວສານ (ICT) ຂອງສອງປະເທດ. ຊຶ່ງປັດຈຸບັນນີ້ ICT ແມ່ນມີການພັດທະນາຢ່າງວ່ອງໄວ ໂດຍປະເທດໃດໆກໍຕ້ອງນຳໃຊ້ ICT ແຕ່ພວກເຮົາຕ້ອງຮູ້ນຳໃຊ້ ເພື່ອໃຫ້ເປັນກຳລັງຂັບເຄື່ອນເສດຖະກິດ-ສັງຄົມ. ນອກນີ້, ທ່ານຍັງກ່າວອີກວ່າ: ທັງສອງຝ່າຍຈົ່ງຮ່ວມມືຈັດຕັ້ງປະຕິບັດໃຫ້ໄດ້ຮັບຜົນດີເລື້ອຍໆໄປ ໂດຍສະເພາະການຊ່ວຍເຫຼືອຂອງ ສສ ຫວຽດນາມໃນການສ້າງບຸກຄະລາກອນ ດ້ານ ICT ຂອງລາວ ແລະ ສ້າງລະບົບຄຸ້ມຄອງ ICT ຂອງລາວໃຫ້ທັນສະໄໝເທື່ອລະກ້າວ. ລັດຖະບານແຫ່ງ ສປປ ລາວ ຖືວ່າການພັດທະນາການນຳໃຊ້ ICT ແມ່ນບຸລິມະສິດໜຶ່ງໃນນະໂຍບາຍຂອງລັດ ຖະບານ, ຊຶ່ງຈຳເປັນຕ້ອງໄດ້ສ້າງໂຄງລ່າງພື້ນຖານ ICT ໃຫ້ກວ້າງຂວາງ ແລະ ມີຄຸນນະພາບ, ຄຽງຄູ່ກັັບການສ້າງບຸກຄະລາກອນດ້ານ ICT ໃຫ້ໄດ້ຫຼາຍທີ່ສຸດ ເພື່ອຊຸກຍູ້ສົ່ງເສີມການນຳໃຊ້ ICT ໃນທຸກຂະແໜງການ. ສປປ ລາວ ແລະ ສສ ຫວຽດນາມ ເປັນປະເທດເພື່ອນມິດພິເສດ ມີມູນເຊື້ອຮ່ວມມື ແລະ ຊ່ວຍເຫຼືອກັນມາແຕ່ດົນນານ, ພວກເຮົາກໍເຫັນໄດ້ວ່າ ສສ ຫວຽດນາມ ໄດ້ມີການພັດທະນານຳໃຊ້ ICT ເຂົ້າໃນທຸກຂະແໜງການຢ່າງວ່ອງໄວ ອັນເຮັດໃຫ້ເສດຖະກິດຂອງປະເທດຂະຫຍາຍຕົວສູງ ແລະ ມີຄວາມຍືນຍົງ. ຕອນທ້າຍ ທ່ານຮອງນາຍົກ ກໍໄດ້ອວຍພອນໃຫ້ ທ່ານ ຫງວຽນ ແມງ ຮຸ່ງ ພ້ອມດ້ວຍຄະນະ ຈົ່ງເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ໃຫ້ໄດ້ຮັບຜົນສຳເລັດອັນຈົບງາມ. (ຂ່າວ: ກະຊວງການເງິນ)