ສປປ ລາວ ກຽມຈັດກິດຈະກຳສະຫຼອງວັນຟຣັງໂກໂຟນີ


...

14.03.2019 9:39     

   ເນື່ອງໃນໂອກາດໃກ້ຈະເຖິງວັນຟຣັງໂກໂຟນີສາກົນ 20 ມີນາ, ກະຊວງການຕ່າງປະເທດ ຮ່ວມກັບພາກສ່ວນທີ່ກ່ຽວຂ້ອງ ຈະຈັດພິທີສະເຫຼີມສະຫຼອງ ວັນດັ່ງກ່າວຂຶ້ນ ໃນຕອນບ່າຍຂອງວັນທີ 2 ເມສາ 2019 ທີ່ຫ້ອງປະຊຸມໃຫຍ່ ມະຫາວິທະຍາໄລແຫ່ງຊາດ, ນອກຈາກນີ້ ຍັງກຽມຈັດຫຼາຍກິດຈະກຳ. ທ່ານ ບຸນຍະລິດ ສຸດທິຈັກ ຮອງຫົວໜ້າກົມອົງການຈັດຕັ້ງສາກົນ, ທັງເປັນຜູ້ປະສານງານແຫ່ງຊາດ ປະຈໍາອົງການຟຣັງໂກໂຟນີ ໄດ້ກ່າວວ່າ: ອົງການຟຣັງໂກໂຟນີສາກົນ ແມ່ນອົງ ການຈັດຕັ້ງສາກົນ ລະຫວ່າງລັດຖະບານທີ່ໃຊ້ພາສາຝຣັ່ງ ຊຶ່ງໄດ້ຮັບການສ້າງຕັ້ງຂຶ້ນ ໃນວັນທີ 20 ມີນາ 1970 ໂດຍມີຈຸດປະສົງ ເພື່ອເສີມສ້າງຄວາມສາມັກຄີ, ການຮ່ວມມື ແລະ ການປົກປ້ອງທີ່ຫຼາກຫຼາຍ ທາງດ້ານວັດທະນະທໍາ. ປັດຈຸບັນ, ອົງການດັ່ງກ່າວ ມີສະມາຊິກທັງໝົດ 88 ປະເທດ ( 61ປະເທດສະມາຊິກສົມບູນ ແລະ 27 ປະ ເທດສະມາຊິກສັງເກດການ) ຢູ່ໃນ 5 ທະວີບ, ມີສໍານັກງານໃຫຍ່ຕັ້ງຢູ່ນະຄອນຫຼວງປາຣີ. ສປປ ລາວ ເຂົ້າເປັນສະ ມາຊິກສົມບູນຂອງອົງການດັ່ງກ່າວ 22 ພະຈິກ 1991 ຊຶ່ງອົງການດັ່ງກ່າວ ໄດ້ໃຫ້ການຮ່ວມມື ແລະ ຊ່ວຍເຫຼືອແກ່ສປປ ລາວ ໃນຫຼາຍດ້ານ ໂດຍສະເພາະ ໃນການຍົກລະດັບຄວາມຮູ້ ຄວາມສາມາດບຸກຄະລາກອນ ໃນຂະແໜງສຶກສາ. ໃນຖານະທີ່ເປັນສະມາຊິກຂອງອົງການຟຣັງໂກໂຟນີສາກົນ, ສປປ ລາວ ໄດ້ປະກອບສ່ວນສໍາຄັນໃຫ້ແກ່ວຽກງານຕ່າງໆ ກໍຄືການເຂົ້າຮ່ວມກອງປະຊຸມສໍາຄັນຂອງອົງການດັ່ງກ່າວ. ນອກຈາກນີ້ ສປປ ລາວ ກໍຄືກັນກັບບັນດາປະເທດສະມາຊິກອື່ນໆ ໃນແຕ່ລະປີໄດ້ຈັດພິທີ ແລະ ກິດຈະກໍາຕ່າງໆ ເພື່ອສະເຫຼີມສະຫຼອງ ວັນຟຣັງໂກໂຟນີສາກົນ ແນໃສ່ເພື່ອສົ່ງເສີມວຽກງານຟຣັງໂກໂຟນີ. ສໍາລັບປີ 2019 ນີ້, ກະ ຊວງການຕ່າງປະເທດ ຮ່ວມກັບພາກສ່ວນທີ່ກ່ຽວຂ້ອງ ຈະຈັດພິທີສະເຫຼີມສະຫຼອງວັນຟຣັງໂກໂຟນີຂຶ້ນ ໃນວັນທີ 2 ເມສາ 2019 ທີ່ຫ້ອງປະຊຸມໃຫຍ່ຂອງມະຫາວິທະຍາໄລແຫ່ງຊາດ. ພິທີດັ່ງກ່າວ ຈະດໍາເນີນໄປ ໂດຍພາຍໃຕ້ການເປັນປະທານຂອງທ່ານ ບຸນເກີດ ສັງສົມສັກ ລັດຖະມົນຕີປະຈໍາສໍານັກງານນາຍົກລັດຖະມົນຕີ ທັງເປັນຜູ້ຮັບຜິດຊອບວຽກງານຟຣັງໂກໂຟນີ ແລະ ຈະມີການນໍາກະຊວງການຕ່າງປະເທດ, ທູຕານຸທູດບັນດາປະເທດສະມາຊິກອົງການຟຣັງໂກໂຟນີສາກົນ, ຕະຫຼອດຮອດຄູອາຈານ, ນັກຮຽນ, ນັກສຶກສາ ພາກວິຊາພາສາຝຣັ່ງ. ຄຽງຄູ່ກັນນັ້ນ, ບັນດາສະຖາບັນສຶກສາທີ່ມີການຮຽນ-ສອນພາສາຝຣັ່ງ ໃນນະຄອນຫຼວງວຽງຈັນ, ຫຼວງພະບາງ, ສະຫວັນນະເຂດ ແລະ ແຂວງຈໍາປາສັກ ກໍຈະຈັດກິດຈະກໍາຕ່າງໆ ເພື່ອສະເຫຼີມສະຫຼອງວັນສໍາຄັນດັ່ງກ່າວ ໃນໄລຍະເດືອນມີນານີ້ເຊັ່ນ: ການແຂ່ງຂັນນັກຮຽນເກ່ັງ, ກິລາ, ສິລະປະວັນນະຄະດີ. ນອກຈາກນີ້, ທ່ານ ນາງ ໂຟລຣັງ ຈຽນບລັງ-ຣິສເລີ (Flo rence Jeanblanc-Risler) ເອກອັກຄະລັດຖະທູດຝຣັ່ງປະຈໍາລາວ ກ່າວວ່າ: ສະຖານທູດຝຣັ່ງ ຮ່ວມກັບກະຊວງການຕ່າງປະເທດ, ສະຖານທູດລຸກຊໍາບວກ, ສະຖານທູດການາດາ ແລະ ມະຫາວິທະຍາໄລທີ່ໃຊ້ພາສາຝຣັ່ງ ປະຈໍາລາວ ກໍຈະຈັດສັບປະດາ ຟຣັງໂກໂຟນີ ເພື່ອສະເຫຼີມສະຫຼອງ ວັນຟຣັງໂກໂຟນີສາກົນ ປະຈໍາປີ 2019 ເຊັ່ນ: ກອງປະຊຸມໂຕະມົນ ເພື່ອແລກປ່ຽນປະສົບການ ທາງດ້ານພາສາຝຣັ່ງ ໃນຂະແໜງການຕ່າງໆ, ການສະແດງສິລະປະ, ການແຂ່ງຂັນກິລາ,ແຕ້ມຮູບ ແລະ ກິດຈະກໍາອື່ນໆ. ເຂົ້າຮ່ວມພິທີຖະແຫຼງຂ່າວ ໄດ້ຈັດຂຶ້ນໃນວັນທີ 12 ມີນາທີ່ກະຊວງການຕ່າງປະ ເທດ ໂດຍມີ ທ່ານ ສົມສະໜຸກ ມີໄຊ ຮອງປະທານສະມາຄົມນັກຂ່າວລາວ, ຜູ້ຕາງໜ້າຈາກສະຖານທູດທີ່ໃຊ້ພາສາຝຣັ່ງປະຈຳລາວ ແລະ ພາກສ່ວນກ່ຽວຂ້ອງເຂົ້າຮ່ວມ. ( ຂ່າວ: ແສງຈັນ)