ຮອງປະທານປະເທດ ຕ້ອນຮັບເຈົ້າຂອງລາງວັນໂນເບລ ເຂົ້າຢ້ຽມຂໍ່ານັບ


...

15.03.2019 9:27     

   ວັນທີ 14 ມີນານີ້ ທີ່ທຳນຽບປະທານປະເທດ, ທ່ານ ພັນຄຳ ວິພາວັນ ຮອງປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ຟິນ ອີ. ໄຄດ໌ແລນ (Finn E. KYDLAND) ເຈົ້າຂອງລາງວັນ ໂນເບລ ສາຂາ ເສດຖະສາດ ປະຈຳປີ 2004 ແລະ ທ່ານ ເຊີ ພອລ ເອັມ. ເນີດສ (Sir Paul M. NURSE) ເຈົ້າ ຂອງລາງວັນໂນເບລ ສາຂາການແພດ ປະຈຳປີ 2001 ໂອກາດທີ່ທ່ານທັງສອງ ໄດ້ເດີນທາງມາຢ້ຽມຢາມ ສປປ ລາວ ໃນລະຫວ່າງວັນທີ 8-15 ມີນານີ້ ເພື່ອຈັດກອງປະຊຸມ ສຳມະນາເຜີຍແຜ່ບົດຮຽນວິຊາການໃນສອງຫົວຂໍ້: "ຄວາມ ສອດຄ່ອງຂອງນະໂຍບາຍທາງດ້ານເສດຖະກິດ ແລະ ການພັດທະນາເສດຖະກິດ (Consistent economic policy and economic development)" ແລະ ຫົວຂໍ້: "ການສ້າງຖານຄວາມຮູ້ແຈ້ງ ຈິນຕະນາການໃໝ່ (Building a new enlightenment). ໂອກາດດັ່ງກ່າວນີ້ ທ່ານ ຮອງປະທານປະເທດ ໄດ້ກ່າວສະແດງຄວາມຕ້ອນຮັບ, ຊົມເຊີຍ ແລະ ຕີລາຄາສູງ ຕໍ່ທ່ານທັງສອງ ທີ່ໄດ້ເປີດໂອກາດແບ່ງປັນຄວາມຮູ້, ປະສົບການຂອງການຄົ້ນຄວ້າວິທະຍາສາດທີ່ມີຄຸນຄ່າ ໃຫ້ແກ່ນັກວິຊາການ ແລະ ນັກສຶກສາລາວ ກໍຄືນັກຄົ້ນຄວ້າຂອງລາວ ອັນໄດ້ເຮັດໃຫ້ພວກເຂົາໄດ້ມີໂອກາດເປີດກວ້າງໂລກະທັດ ແລະ ຄວາມຮູ້ໃໝ່ໆ ຈາກ ການຈັດກອງປະຊຸມສຳມະນາເຜີຍແຜ່ບົດຮຽນວິຊາການ ຊຶ່ງທ່ານ ຮອງປະທານປະເທດຫວັງວ່າ ການແບ່ງປັນປະສົບການ ແລະ ຄວາມຮູ້ຈາກທັງສອງທ່ານ ທີ່ເປັນນັກຄົ້ນຄວ້າລະດັບໂລກ ຈະສາມາດສ້າງພື້ນຖານຄວາມຮູ້ໃຫ້ແກ່ນັກວິຊາການ ແລະ ນັກສຶກສາ ກໍຄືບັນດານັກຄົ້ນຄວ້າຂອງລາວ. ທ່ານ ຮອງປະທານປະເທດ ຍັງໄດ້ສະເໜີ ໃຫ້ ນັກຄົ້ນຄວ້າທັງສອງທ່ານ ເຊີນຊວນບັນດາເພື່ອນມິດສະຫາຍ ຜູ້ໄດ້ຮັບລາງວັນໂນເບລ ມາຊ່ວຍເຜີຍແຜ່ຄວາມຮູ້ ແລະ ປະສົບການໃຫ້ແກ່ ນັກຄົ້ນຄວ້າຂອງລາວຕື່ມອີກ. ໂອກາດດຽວກັນ ທ່ານ ຟິນ ອີ. ໄຄດ໌ແລນ ແລະ ທ່ານ ເຊີ ພອລ ເອັມ. ເນີດສ໌ ກໍໄດ້ກ່າວສະແດງຄວາມ ຂອບໃຈ ຕໍ່ ທ່ານ ຮອງປະທານປະເທດ ທີ່ໄດ້ສະຫຼະເວລາອັນມີຄ່າ ໃຫ້ການຕ້ອນຮັບອັນອົບອຸ່ນໃນຄັ້ງນີ້. (ພາບ + ຂ່າວ: ສຸກສະຫວັນ)