ທ່ານ ສອນໄຊ ສີພັນດອນ ລົງຕິດຕາມການຟື້ນຟູໄພພິບັດຢູ່ເມືອງສະໜາມໄຊ


...

15.03.2019 9:28     

   ໃນວັນທີ 12 ມີນາຜ່ານ ມານີ້, ທ່ານ ສອນໄຊ ສີພັນ ດອນ ກຳມະການກົມການ ເມືອງສູນກາງພັກ ຮອງນາຍົກ ລັດຖະມົນຕີ ທັງເປັນປະທານຄະນະສະເພາະກິດແກ້ໄຂໄພພິບັດລະດັບຊາດ ພ້ອມດ້ວຍຄະນະນຳຂັ້ນສູງຂອງແຂວງອັດຕະປື ໄດ້ລົງຕິດຕາມ, ຊຸກຍູ້, ກວດກາການຈັດຕັ້ງປະຕິບັດວຽກງານໂຄງການຟື້ນຟູໄພພິບັດ ຢູ່ 4 ຈຸດຕັ້ງ ບ້ານໃໝ່ ຂອງເມືອງສະໜາມໄຊ ຈຳນວນ 9 ເຂດ, ເນື້້ອທີ່ທັງໝົດ 2.140 ເຮັກຕາ, ໃນນັ້ນ, ຈຸດຫີນລາດ 510,13 ເຮັກຕາ, ຈຸດທ່າແສງຈັນມີ 138,95 ເຮັກຕາ, ຈຸດດົງບາກ 1.022,83 ເຮັກຕາ, ຈຸດສະໝອງໃຕ້ 468,09 ເຮັກຕາ. ພ້ອມກັນນັ້ນ, ທ່ານຮອງນາຍົກລັດຖະມົນຕີຍັງໄດ້ຮັບຟັງການລາຍງານສະພາບການຈັດຕັ້ງປະຕິບັດຈາກພາກສ່ວນກ່ຽວຂ້ອງ ແລະ ປະຊາຊົນ ກ່ຽວກັບຂໍ້ສະດວກ, ຫຍຸ້ງຍາກ ວິຖີການດຳລົງຊີວິດທຳມາຫາກິນ, ການສຶກສາຂອງນ້ອງນ້ອຍນັກຮຽນ, ການຮັກສາສຸຂະອະນາໄມ ແລະ ອື່ນໆ ນອກນີ້ ຍັງລົງຕິດຕາມກວດກາການພັດທະນາຂອງ ວຽກບຸກເບີກເນື້ອທີ່ທຳການຜະລິດຂອງປະຊາຊົນ, ວຽກງານຈັດສັນທີ່ພັກຊົ່ວຄາວ ແລະ ຖາວອນ, ວຽກງານການຄຸ້ມຄອງ-ບໍລິຫານສູນ, ວຽກງານປະເມີນຜົນກະທົບສິ່ງແວດລ້ອມ ແລະ ການຊົດເຊີຍຜົນເສຍຫາຍ ແລະ ວຽກຟື້ນຟູໄລຍະສັ້ນ, ໄລຍະກາງ, ໄລຍະຍາວ ມາຮອດປັດຈຸບັນມີທ່າອ່ຽງດີຂຶ້ນຫຼາຍ ໂດຍສະເພາະ ການບຸກເບີກເນື້້ອທີ່ທຳການຜະລິດໄດ້ 60% ເພື່ອຮັບປະກັນກັບລະດູການຜະລິດໃນປີນີ້, ບຸກເບີກເນື້ອທີ່ປຸກສ້າງເຮືອນຖາວອນ ສໍາເລັດ 100% ແລະ ວຽກອື່ນໆ ໄດ້ສຳເລັດເປັນກ້າວໆ ທ່ານຮອງນາຍົກລັດ ຖະມົນຕີ ຍັງໄດ້ຮຽກຮ້ອງໃຫ້ປະຊາຊົນ ຈົ່ງເພີ່ມທະວີຄວາມເອົາໃຈໃສໃນການດຳລົງຊີວິດດ້ວຍຈິດໃຈທີ່ເຂັ້ມແຂງ, ຢູ່ ຮ່ວມກັນໃຫ້ມີຄວາມສາມັກຄີຮັກແພງ -ຊ່ວຍເຫຼືອຊຶ່ງກັນ ແລະ ກັນ ແລະ ພ້ອມກັນອອກແຮງເພີ່ມພູນຜະລິດຜົນ ສ້າງວຽກເຮັດງານທຳໃຫ້ຄອບຄົວມີຢູ່ມີກິນ, ໃຫ້ມີສະຕິເຝົ້າລະວັງການແຜ່ລະບາດຂອງພະຍາດໄຂ້ຍຸງລາຍ, ນອນໃນມຸ້ງ-ດື່ມນໍ້າຕົ້ມ ແລະ ເອົາໃຈໃສ່ປະຕິບັດບັນດາມະຕິ; ຄໍາສັ່ງ ຂອງຂັ້ນເທິງວາງອອກຢ່າງເຂັ້ມງວດ. (ຂ່າວ-ພາບ: ຊິບປະໄຊ )