ທ່ານ ສົມດີ ດວງດີ ໂອ້ລົມຕໍ່ກອງປະຊຸມວຽກງານກວດກາ ຈັດຕັ້ງ-ພະນັກງານ ຂະແໜງການເງິນທົ່ວປະເທດ


...

15.03.2019 9:29     

   ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະ ມົນຕີກະຊວງການເງິນ ໄດ້ໂອ້ລົມຕໍ່ກອງປະຊຸມວຽກງານ ກວດກາ,ຈັດຕັ້ງ-ພະນັກງານ ຂະແໜງການເງິນທົ່ວປະເທດປະຈໍາປີ 2019, ເມື່ອວັນທີ 13 ມີນາຜ່ານມາ ທີ່ກະຊວງດັ່ງກ່າວ ຊຶ່ງກ່ອນອື່ນ ທ່ານໄດ້ ສະແດງຄວາມຍ້ອງຍໍຊົມເຊີຍ ຕໍ່ຜົນງານຂອງບັນດາພະນັກ ງານ ສະມາຊິກພັກ ທີ່ໄດ້ພ້ອມກັນເອົາໃຈໃສ່ປະຕິບັດ ຕິດຕາມການກວດກາຈົນສາມາດເຫັນໄດ້ດ້ານດີ - ຜົນສໍາເລັດ, ດ້ານອ່ອນ, ຂໍ້ຄົງຄ້າງ ໃນການນໍາພາຂອງຄະນະພັກແຕ່ລະຂັ້ນ; ພົບເຫັນການຕົກເຮ່ຍເສຍຫາຍ ຊັບສິນເງິນ-ຄໍາ ຂອງລັດເປັນຈໍານວນບໍ່ໜ້ອຍ ແລະ ພະຍາຍາມເກັບກູ້ຄືນໃຫ້ລັດໄດ້ຈໍານວນໜຶ່ງ; ໄດ້ເອົາໃຈໃສ່ສືບຕໍ່ກວດກາແກ້ໄຂບັນຫາການສໍ້ລາດບັງຫຼວງ ໃນຖັນແຖວສະມາຊິກພັກ-ພະນັກງານ, ໄດ້ດໍາເນີນການສືບສວນ-ສອບສວນ ພະນັກງານທີ່ມີພຶດຕິກໍາສໍ້ລາດບັງຫຼວງ ຢູ່ກະຊວງການເງິນ ອັນສໍາຄັນ ຜ່ານການກວດກາເປົ້າໝາຍຕ່າງໆ ສາມາດຮູ້ ແລະ ເຫັນໄດ້ສະພາບຫຍໍ້ທໍ້ກໍຄືບັນດາພຶດຕິກໍາ ທີ່ຈະໄດ້ເອົາໃຈໃສ່ແກ້ໄຂ ໃນຖັນແຖວສະມາຊິກພັກ-ພະນັກງານເຊັ່ນ: ການລະເມີດລະບຽບກົດໝາຍ, ການສວຍໃຊ້ໜ້າທີ່, ສົມຮູ້ຮ່ວມຄິດກັບພວກຄົນບໍ່ດີສໍ້ລາດບັງຫຼວງຫາຜົນປະໂຫຍດສ່ວນຕົວ, ພັກພວກ, ພີ່ນ້ອງ ແລະ ພຶດຕິກໍາອື່ນໆ. ເພື່ອເປັນການສືບຕໍ່ປະຕິບັດວຽກງານຕິດຕາມ, ກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງໃນປີ 2019 ໃຫ້ໄດ້ຕາມຄາດໝາຍທີ່ວາງໄວ້, ທ່ານຮອງນາຍົກ ລັດຖະມົນຕີ ຈຶ່ງໄດ້ເນັ້ນໃຫ້ພະນັກງານສະມາຊິກພັກທຸກຄົນຈົ່ງໄດ້ເອົາໃຈໃສ່ຕື່ມບາງບັນຫາດັ່ງລຸ່ມນີ້: 1: ສືບຕໍ່ຄົ້ນຄວ້າ ແລະ ຈັດຕັ້ງປະຕິບັດບັນດາຄາດໝາຍ ກໍຄືເນື້ອໃນມະຕິກອງປະຊຸມໃຫຍ່ຄັ້ງທີ x ຂອງພັກ ລວມທັງບັນດາມະຕິຂອງຄະນະບໍລິຫານງານສູນກາງພັກ(ສະໄໝທີ X ), ເນື້ອໃນກອງປະຊຸມວຽກງານກວດກາທົ່ວປະເທດຄັ້ງທີ III, ມະຕິ ຂອງຄະນະບໍລິຫານງານພັກກະຊວງການເງິນຄັ້ງທີ 2 ແລະ ມະຕິກອງປະຊຸມເປີດກ້ວາງຂອງຄະນະບໍລິ ຫານງານພັກກະຊວງແຕ່ລະຄັ້ງ, ບັນດາ ຄໍາສັ່ງ, ຂໍ້ກໍານົດຕ່າງໆຂອງພັກ, ກົດໝາຍ, ນິຕິກໍາລຸ່ມກົດໝາຍຕ່າງໆ ໂດຍສະເພາະແມ່ນມະຕິ, ຄໍາສັ່ງ ແລະ ນິຕິກໍາຕ່າງໆ ກ່ຽວກັບວຽກງານຕິດຕາມ, ກວດກາ, ການສະກັດກັ້ນ ແລະ ການສໍ້ລາດບັງຫຼວງ; ຕ້ອງໄດ້ຈັດຕັ້ງເຊື່ອມຊຶມ ແລະ ຜັນຂະຫຍາຍເນື້ອໃນຂອງກອງປະຊຸມວຽກງານກວດກາເທື່ອນີ້ໃຫ້ເກີດຜົນເປັນຈິງ, ມີການສະຫຼຸບຕີລາຄາຊອກຫາສາເຫດ ແລະ ຖອດຖອນບົດຮຽນວຽກງານຕິດຕາມ, ກວດກາຢູ່ບັນດາກົມ ແລະ ທ້ອງຖິ່ນຂອງຕົນ ໃນປີຜ່ານມາໃຫ້ເລິກເຊິ່ງຖືກຕົວຈິງ; ວາງທິດທາງແຜນການ ແລະ ວຽກງານຈຸດສຸມທີ່ຕ້ອງສືບຕໍ່ສູ້ຊົນປະຕິບັດໃນປີ 2019 ບົນຈິດໃຈບຸກບືນກວ່າເກົ່າເຮັດໃຫ້ວຽກງານຕິດຕາມ, ກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງ ມີການຫັນປ່ຽນໃໝ່ຢ່າງຕັ້ງໜ້າ; ກົມກວດກາ ຂະແໜງກວດກາ ຕ້ອງມີແຜນເຄື່ອນໄຫວຕິດຕາມກວດກາ, ຊຸກຍູ້ບັນດາກົມກອງ ແລະ ທ້ອງຖິ່ນ ປະຕິບັດໜ້າທີ່ຕິດຕາມ, ກວດກາ ຄວາມຮັບຜິດຊອບຢ່າງເປັນປົກກະຕິ. 2: ວຽກງານຕິດຕາມ, ກວດກາພັກ: ສືບຕໍ່ເອົາໃຈໃສ່ຕິດຕາມ,ກວດກາການຈັດຕັ້ງປະຕິບັດບັນດາມະຕິ, ຄໍາສັ່ງ, ຂໍ້ກໍານົດຕ່າງໆຂອງພັກລວມທັງການປະຕິບັດມະຕິຂອງກອງປະຊຸມໃຫຍ່ອົງຄະນະພັກຂັ້ນຂອງຕົນອັນໃດມີຜົນສໍາເລັດ, ອັນໃດຍັງຄົງຄ້າງຈະສືບຕໍ່ຈັດຕັ້ງປະຕິບັດແນວໃດ; ເອົາໃຈໃສ່ຕິດຕາມ, ກວດກາການປະຕິບັດກົດລະບຽບຂອງພັກ; ຕິດຕາມ, ກວດກາ ແບບແຜນນໍາພາວິທີເຮັດວຽກຂອງຄະນະພັກແຕ່ລະຂັ້ນ; ຕິດຕາມ, ກວດກາ, ຄຸນທາດການເມືອງ, ຄຸນສົມບັດສິນທໍາປະຕິວັດຂອງຄະນະພັກ, ສະມາຊິກພັກ-ພະນັກງານ, ກໍາສະພາບພະນັກງານການນໍາ ແລະ ສະມາຊິກພັກໃຫ້ແໜ້ນ, ສືບຕໍ່ຜັນຂະຫຍາຍຜົນການດໍາເນີນຊີວິດການເມືອງປັບປຸງປົວແປງພັກ, ໂດຍຖືເອົາການເພີ່ມທະວີຄຸນນະພາບ ຂອງການດໍາເນີນຊີວິດຂອງຄະນະພັກ ແລະ ໜ່ວຍພັກ, ມີການຕິຊົມຕົນເອງ ແລະ ຕິຊົມກັນເປັນປົກກະຕິ ໂດຍຕິດພັນລົງເລິກການກວດກາ ແລະ ແກ້ໄຂສະພາບຫຍໍ້ທໍ້ຕ່າງໆໃນຄະນະພັກ ແລະ ສະມາຊິກພັກ, ສ້າງການຫັນປ່ຽນແບບບຸກທະລຸດ້ານກົນໄກ ແລະ ແບບແຜນການເຄື່ອນໄຫວນໍາພາຄຸ້ມຄອງທີ່ມີປະສິດທິຜົນ. 3: ບັນຫາທີ່ຕ້ອງເອົາ ໃຈໃສ່ຊີ້ນໍາ ແລະ ສຸມໃສ່ຕິດ ຕາມ, ກວດກາການຄຸ້ມຄອງ ບໍລິຫານລັດໃນແຕ່ລະກົມ ເປັນຕົ້ນ: ຕິດຕາມ, ກວດກາ, ການປະຕິບັດພາລະບົດບາດ, ໜ້າທີ່ການໃຊ້ສິດອໍານາດຂອງ ແຕ່ລະຂະແໜງການ ແລະທ້ອງຖິ່ນ; ການປະຕິບັດມະຕິ, ຄໍາສັ່ງ, ກົດໝາຍ, ດໍາລັດ ແລະ ລະບຽບການຕ່າງໆຂອງລັດ ລວມທັງຂໍ້ກໍານົດ ແລະ ລະບຽບການຕ່າງໆທີ່ຂະແໜງການເງິນວາງອອກ. ຕິດຕາມ, ກວດກາ, ການປະຕິບັດກົດໝາຍພາສີ-ອາກອນ, ກົດໝາຍງົບປະມານ ແລະ ນິຕິກໍາອື່ນໆ; ການເກັບລາຍຮັບເຂົ້າງົບປະມານ-ແກ້ໄຂການຮົ່ວໄຫຼ; ການຄຸ້ມຄອງລາຍຈ່າຍ ລວມທັງບ້ວງທຶນແກ້ໄຂໄພພິບັດຕ່າງໆ, ສືບຕໍ່ປະຕິບັດມາດຕະການ ຕິດຕາມ, ກວດກາເລີ່ມແຕ່ຫົວທີ ຕໍ່ການປະຕິບັດໂຄງການລົງທຶນຂອງລັດເຊັ່ນ: ໂຄງການກໍ່ສ້າງພື້ນຖານໂຄງລ່າງຕ່າງໆປີ 2019, ໃຫ້ເພີ່ມທະວີການຕິດຕາມ, ກວດກາຢູ່ດ່ານຕ່າງໆ ແລະ ການລັກລອບຢູ່ລຽບຕາມຊາຍແດນ ເມື່ອພົບເຫັນຜູ້ລະເມີດຕ້ອງແກ້ໄຂຢ່າງເຂັ້ມງວດ ຕາມລະບຽບກົດໝາຍ. ສືບຕໍ່ກວດກາຕິດຕາມ ແກ້ໄຂຜົນການກວດສອບ ສົກປີ 2018 ແລະ ບັນດາສົກປີທີ່ຍັງຄົງຄ້າງຕາມການຮັບຮອງຂອງສະພາແຫ່ງຊາດ, ກວດກາ-ເກັບກູ້ການເສຍຫາຍຈາກການຍົກເວັ້ນພາສີ-ອາກອນ ພ້ອມທັງເຂັ້ມງວດ ຕໍ່ການປະຕິບັດກົດໝາຍພາສີ-ອາກອນ ແລະ ລະບຽບກົດໝາຍອື່ນໆ ທີ່ກ່ຽວຂ້ອງແລະ ສ້າງກົນໄກການປະສານງານໃຫ້ມີຄວາມຊັດເຈນ. 4: ເອົາໃຈໃສ່ ຕໍ່ການສະກັດກັ້ນ ແລະ ຕ້ານການສໍ້ລາດບັງຫຼວງ ທີ່ເປັນໄພຂົ່ມຂູ່ຕໍ່ສະຖຽນລະພາບຂອງການຈັດຕັ້ງ ແລະ ສະມາຊິກພັກ-ພະນັກງານ, ສົ່ງຜົນກະທົບເຖິງຄວາມເຫຼື້ອມໃສ ແລະ ຄວາມເຊື່ອໝັ້ນຂອງມະຫາຊົນ ຕໍ່ການນໍາພາຂອງພັກ ຄວາມສັກສິດຂອງການຄຸ້ມຄອງລັດ ແລະ ຄວາມໜັ້ນຄົງຂອງລະບອບປະຊາທິປະໄຕ ປະຊາຊົນຂອງ ພວກເຮົາ; ຄົ້ນຄວ້າຜັນຂະ ຫຍາຍ ແລະ ຈັດຕັ້ງປະຕິບັດຍຸດທະສາດຕ້ານການສໍ້ລາດບັງຫຼວງ ໂດຍການອອກເປັນກົນໄກ, ລະບຽບການລະອຽດຂອງກົມ, ຂະແໜງການ ເພື່ອເປັນເຄື່ອງມືຄຸ້ມຄອງ-ອັດຊ່ອງຫວ່າງທີ່ຈະເກີດມີການສໍ້ລາດບັງຫຼວງ, ຄະນະພັກ ຄະນະກວດກາແຕ່ລະບັນດາກົມ ແລະ ທ້ອງຖິ່ນ ຕ້ອງສືບຕໍ່ເອົາໃຈໃສ່ຈັດຕັ້ງເຜີຍແຜ່ ແລະ ເຊື່ອມຊຶມມະຕິ 022/ຄລສພ ວ່າດ້ວຍ ການແກ້ໄຂພະຍາດອາດຍາສິດ, ສະກັດກັ້ນ ແລະ ຕ້ານການສໍ້ລາດບັງຫຼວງ, ກົດໝາຍ ແລະ ນິຕິກໍາອື່ນໆທີ່ກ່ຽວຂ້ອງໃຫ້ເລິກເຊິ່ງທົ່ວເຖິງ. 5: ເພີ່ມທະວີຄວາມຮັບ ຜິດຊອບນໍາພາ-ຊີ້ນໍາຂອງ ຄະນະພັກແຕ່ລະຂັ້ນ ຕໍ່ການ ຄົ້ນຄວ້າແກ້ໄຂຄໍາຮ້ອງ-ຄໍາ ສະເໜີຂອງສະມາຊິກພັກ - ພະນັກງານ ແລະ ຂອງພົນ ລະເມືອງ; ຕ້ອງດໍາເນີນໄປຕາມພາລະບົດບາດຄວາມຮັບຜິດຊອບຂອງແຕ່ລະຂັ້ນຖືກຕາມຂັ້ນຕອນຂອງກົດໝາຍກໍານົດໄວ້, ການຄົ້ນຄວ້າຕ້ອງຮອບຄອບ, ພາວະວິໄສ ແລະ ຊັດເຈນ ເພື່ອແກ້ໄຂໃຫ້ຖືກຕ້ອງຕາມກົດໝາຍ, ຖືກຕ້ອງຕາມຄວາມເປັນຈິງ, ຍຸຕິທໍາ ແລະ ສະເໝີພາບຕໍ່ໜ້າທີ່ກົດໝາຍ, ພ້ອມກັນນີ້, ກໍບໍ່ໃຫ້ຖືເບົາບັດສົນເທ ຫຼື ໜັງສືສະເໜີລາຍງານຂອງພົນລະເມືອງທີ່ບໍ່ມີລາຍເຊັນ,ອັນນີ້ກໍຕ້ອງຄົ້ນຄ້ວາພິຈາລະນາຕາມແຕ່ລະກໍລະນີຢ່າງພາວະວິໄສ. 6: ເອົາໃຈໃສ່ປັບປຸງກົງຈັກການຈັດຕັ້ງ ແລະ ພະນັກງານກວດກາແຕ່ລະຂັ້ນ ໃຫ້ໜັກແໜ້ນເຂັ້ມແຂງສາມາດເຮັດບົດບາດເປັນເສນາທິການໃຫ້ຄະນະພັກ ຄະນະນໍາກະຊວງ ພ້ອມທັງຈັດຕັ້ງບໍາລຸງຝຶກອົບຮົມເຂົາເຈົ້າ ໃຫ້ມີຄວາມຮູ້-ຄວາມສາມາດ ທາງດ້ານວິຊາສະເພາະ, ບໍາລຸງສ້າງໃນຂະບວນວຽກງານຕົວຈິງຢູ່ຮາກຖານ ແລະ ເຂົ້າຮ່ວມການກວດກາແກ້ໄຂເປົ້າໝາຍຕ່າງໆ ເພື່ອໃຫ້ເຕີບໂຕ ສາມາດເຮັດໄດ້ບົດບາດ ເປັນເສນາທິການໃຫ້ຄະນະພັກຄະນະນໍາແຕ່ລະຂັ້ນ 7: ເພີ່ມທະວີການນໍາພາຂອງຄະນະພັກ ແລະ ການນໍາແຕ່ລະຂັ້ນຕໍ່ວຽກງານຕິດຕາມ, ກວດກາ, ວຽກງານສະກັດກັ້ນ ແລະ ຕ້ານການສໍ້ລາດບັງຫຼວງດ້ວຍຫຼາຍວິທີ ໂດຍຖືເອົາການຕິດຕາມ, ກວດກາ ເປັນປົກກະຕິເລີ່ມແຕ່ຫົວທີເປັນວິທີການຕົ້ນຕໍ, ທີ່ສໍາຄັນແມ່ນບັນຫາເກີດຂຶ້ນຢູ່ບ່ອນໃດຄະນະພັກ ແລະ ການນໍາຢູ່ບ່ອນນັ້ນຕ້ອງເປັນຜູ້ຮັບຜິດຊອບແກ້ໄຂ, ເມື່ອກວດກາແລ້ວ ຕ້ອງແກ້ໄຂຜົນຂອງການກວດກາຢ່າງເຂັ້ມງວດ, ຂາດຕົວ ແລະ ທັນເວລາ ຊຶ່ງອັນນີ້ ແມ່ນຄວາມຮັບຜິດຊອບໂດຍ ກົງຂອງຄະນະພັກຂັ້ນນັ້ນ, ພ້ອມກັນນັ້ນ, ກໍໃຫ້ເອົາໃຈໃສ່ສ້າງເງື່ອນໄຂອໍານວຍຄວາມສະດວກໃຫ້ຄະນະກວດກາຂັ້ນຂອງຕົນສາມາດເຄື່ອນໄຫວຕາມພາລະບົດບາດ, ໜ້າທີ່, ສິດ ແລະ ຄວາມຮັບຜິດຊອບຂອງຕົນໃຫ້ມີປະສິດທິຜົນ, ຕ້ານ ແລະ ແກ້ໄຂ ທັດສະນະແນວຄິດຖືເບົາຕໍ່ວຽກງານກວດກາ ແລະ ທັດສະນະອື່ນໆທີ່ບໍ່ຖືກຕ້ອງ. (ຂ່າວ: ຍຸພິນທອງ)