ລມຕ ກະຊວງ ພບ ເນັ້ນ 4 ບັນຫາໃຫ້ໄຟຟ້າລາວແກ້ໄຂ


...

15.03.2019 9:29     

   ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງ ງານ ແລະ ບໍ່ແຮ່ (ພບ) ເນັ້ນໃຫ້ ລັດວິສາຫະກິດໄຟຟ້າລາວ ເອົາໃຈໃສ່ຫຼາຍບັນຫາ ເປັນຕົ້ນແມ່ນຂອດບໍລິການ ເນື່ອງຈາກວ່າ ຜ່ານມາ ມີສຽງຈົ່ມວ່າຈາກສັງຄົມເປັນຈຳນວນຫຼວງຫຼາຍ. ລັດວິສາຫະກິດໄຟຟ້າລາວໄດ້ຈັດພິທີສະຫຼຸບຜົນການດຳເນີນທຸລະກິດປະຈຳປີ 2018 ແລະ ທິດທາງແຜນການປີ 2019 ຂຶ້ນໃນວັນທີ 13 ມີນາ ຜ່ານມາ, ທີ່ລັດວິສາຫະກິດໄຟຟ້າລາວ, ນະຄອນຫຼວງວຽງຈັນ ໂດຍມີທ່ານ ຄຳມະນີ ອິນທິລາດ, ທ່ານ ບຸນອູ້ມ ສີວັນເພັງຜູ້ອຳນວຍການລັດວິສາຫະກິດໄຟຟ້າລາວ, ມີພາກສ່ວນກ່ຽວຂ້ອງເຂົ້າຮ່ວມ. ທ່ານ ບຸນອູ້ມ ສີວັນເພັງ ໄດ້ກ່າວວ່າ: ລັດວິສາຫະກິດໄຟຟ້າລາວໄດ້ມີການຮັບຊື້ພະລັງງານທັງໝົດລວມທັງນຳເຂົ້າ ແລະ ຜະລິດເອງເທົ່າກັບ 9 ພັນລ້ານກວ່າກິໂລວັດໂມງ, ເປັນເງິນ 4 ພັນຕື້ກວ່າກີບ, ທຽບໃສ່ແຜນປີ 2018 ເທົ່າກັບ 97,65%, ລາຄາສະເລ່ຍຊື້ພະລັງງານທັງໝົດ 475,86 ກີບ/ກິໂລວັດໂມງ. ດ້ານການຄຸ້ມຄອງລະບົບຈຳໜ່າຍໃນປີຜ່ານມາສາມາດຈຳໜ່າຍພະລັງງານທັງໝົດ 8 ພັນລ້ານກວ່າກິໂລວັດໂມງ, ເປັນເງິນ 5 ພັນຕື້ກວ່າກີບເທົ່າກັບ 97,29% ລາຄາສະເລ່ຍເທົ່າກັບ 603,37 ກີບ/ກິໂລວັດໂມງ, ໃນນັ້ນຈຳໜ່າຍພາຍໃນປະເທດ 5 ພັນລ້ານກວ່າກິໂລວັດໂມງ, ຂາຍອອກຕ່າງປະເທດ 2 ພັນລ້ານກວ່າກິໂລວັດໂມງ ແລະ ຂາຍໃຫ້ລູກຄ້າລາຍໃຫຍ່ບໍ່ຄຳເຊໂປນ, ໂຮງງານຊີມັງທ່າແຂກ, ບໍ່ເຕັນແດນງາມ ແລະ ດອກງິ້ວບານ 443 ລ້ານກວ່າກິໂລວັດໂມງ. ທ່ານໄດ້ກ່າວໃຫ້ຮູ້ຕື່ມອີກວ່າ: ທົ່ວປະເທດມີ 148 ເມືອງ, ໄດ້ມີໄຟຟ້າຊົມໃຊ້ຖາວອນທັງໝົດ 148 ເມືອງເທົ່າກັບ 100%, ມີໄຟຟ້າໃຊ້ຖາວອນ 7.760 ບ້ານ (ໃນຈຳນວນ 8.480 ບ້ານທົ່ວປະເທດ) ເທົ່າກັບ 90,58% ຂອງຈຳນວນບ້ານທົ່ວປະເທດ, ໃນຂະນະທີ່ຈຳນວນຄອບຄົວໄດ້ຊົມໃຊ້ໄຟຟ້າກວມ 93,79% ຂອງຈຳນວນຄອບຄົວທັງໝົດ. ຫຼັງຈາກນັ້ນຄະນະຈັດຕັ້ງພິທີໄດ້ຂຶ້ນຜ່ານລັດຖະດຳລັດຂອງປະທານປະເທດວ່າດ້ວຍການມອບຫຼຽນໄຊແຮງງານຊັ້ນ II ຈຳນວນ 56 ທ່ານ (4 ກົມກອງລວມໝູ່), ຫຼຽນໄຊແຮງງານຊັ້ນ III ຈຳນວນ 52 ທ່ານ (ຈຳນວນ 5 ໂຄງການຂອງລັດວິສາຫະກິດໄຟຟ້າລາວ); ລັດຖະດຳລັດຂອງນາຍົກລັດຖະມົນຕີວ່າດ້ວຍການມອບຫຼຽນກາແຮງງານຈຳນວນ 46 ທ່ານ (ຈຳນວນ 5 ໂຄງການຂອງລັດວິສາຫະກິດໄຟຟ້າລາວ) ແລະ ມອບໃບຍ້ອງຍໍລັດຖະບານຈຳນວນ 56 ທ່ານ (ຈຳນວນ 5 ໂຄງການຂອງລັດວິສາຫະກິດໄຟຟ້າລາວ). ພາຍຫຼັງສຳເລັດພິທີປະດັບຫຼຽນແລ້ວ, ທ່ານ ຄຳມະນີ ອິນທິລາດ ໄດ້ໂອ້ລົມໂດຍເນັ້ນ 4 ບັນຫາສຳຄັນໃຫ້ໄຟຟ້າລາວເອົາໃຈໃສ່ຄື: 1) ການພັດທະນາໄຟຟ້າລາວ ຈະຕ້ອງຮັບປະກັນໃຫ້ສອດຄ່ອງກັບໜ້າທີ່ການເມືອງຂອງພັກ ແລະ ຄວາມຮຽກຮ້ອງຕ້ອງການຂອງການພັດທະນາປະເທດຊາດໃນແຕ່ລະໄລຍະບົນພື້ນຖານຢຶດໝັ້ນແນວທາງຫັນເປັນອຸດສາຫະກຳ ແລະ ທັນສະໄໝທີ່ີພັກວາງອອກ, ຕິດພັນກັບແຜນຍຸດທະສາດຮອດປີ 2025 ແລະ ແຜນພັດທະນາວຽກງານພະລັງງານ ແລະ ບໍ່ແຮ່ໄລຍະປີ 2016-2020. 2) ຄຸນນະພາບໃນການນຳພາ, ການຄຸ້ມຄອງ ແລະ ປະສິດທິຜົນໃນການດຳເນີນທຸລະກິດຂອງໄຟຟ້າລາວໃນເງື່ອນໄຂໃໝ່, ຊຶ່ງຜ່ານມາຍັງມີຈຸດອ່ອນ ແລະ ຂໍ້ຫຍຸ້ງຍາກ ເປັນຕົ້ນແມ່ນ ບັນຫາໜີ້ສິນຄ່າກະແສໄຟຟ້າຍັງສືບຕໍ່ຄຸມເຄືອ, ການຂະຫຍາຍລະບົບຕາຂ່າຍໄຟຟ້າໄປສູ່ເຂດຊົນນະບົດ ຫ່າງໄກສອກຫຼີກໃນໄລຍະຜ່ານມາແມ່ນມີມູນຄ່າໂຄງການສູງ, ການຈັດຕັ້ງປະຕິບັດຊັກຊ້າສ່ວນໃຫຍ່ແມ່ນລໍຖ້າງົບປະມານລັດມາຊຳລະ. 3) ຂອດການບໍລິການຂອງໄຟຟ້າລາວ ມັກມີສຽງຈົ່ມວ່າ ຈາກປະຊາຊົນ, ຜູ້ປະກອບການ ທັງພາຍໃນ ແລະ ຕ່າງປະເທດ, ສຳລັບຄຳຂວັນທີ່ໄຟຟ້າລາວວາງໄວ້ຄື: "ເພີ່ມລາຍຮັບ ຫຼຸດລາຍຈ່າຍ ຈຳໜ່າຍໄຟໃຫ້ພຽງພໍ ບໍລິການວ່ອງໄວ ດ້ວຍຄວາມປອດໄພ ຊົມໃຊ້ໃຫ້ເກີດຜົນ" ຊຶ່ງສອດຄ່ອງທີ່ສຸດ ແຕ່ຕ້ອງປະຕິບັດໃຫ້ປະກົດຜົນເປັນຈິງ. 4) ຕ້ອງເອົາໃຈໃສ່ສຶກສາອົບຮົມການເມືອງ-ແນວຄິດ, ການປະສານສົມທົບກັນຢູ່ພາຍໃນບໍ່ທັນໜັກແໜ້ນ, ວຽກງານຄຸ້ມຄອງ ແລະ ບຳລຸງສ້າງພະນັກງານ, ກຳມະກອນບໍ່ທັນເຮັດໄດ້ດີ, ການປະຕິບັດລະບອບ, ລະບຽບຍັງມີຫຼາຍດ້ານຍັງບໍ່ທັນເຂັ້ມງວດ, ໜັກແໜ້ນ ແລະ ອື່ນໆ. (ຂ່າວ-ພາບ: ສຸກສາຄອນ)