ເປີດນຳໃຊ້ລະບົບຫ້ອງການທັນສະໄໝ


...

18.03.2019 9:18     

ກະຊວງໄປສະນີໂທລະ ຄົມມະນາຄົມ ແລະ ການສື່ສານ ຮ່ວມກັັບກຸ່ມບໍລິສັດໄປສະນີໂທລະຄົມມະນາຄົມຫວຽດ ນາມ (VNPT) ໄດ້ຈັດພິທີເປີດ ການນຳໃຊ້ຫ້ອງການທັນສະ ໄໝ ຫຼື E-Office ຂຶ້ນໃນວັນທີ 15 ມີນາ ຜ່ານມາ ທີ່ໂຮງແຮມລາວພລາຊາ ນະຄອນຫຼວງວຽງຈັນ ໂດຍການເປັນປະທານຂອງທ່ານ ທັນສະໄໝ ກົມມະສິດ ລັດຖະມົນຕີກະຊວງໄປສະນີໂທລະຄົມມະນາຄົມ ແລະ ການສື່ສານ, ມີພາກສ່ວນກ່ຽວຂ້ອງເຂົ້າຮ່ວມ. ໃນພິທີທ່ານ ທັນສະໄໝ ກົມມະສິດ ໄດ້ກ່າວວ່າ: ການຫັນ ເປັນທັນສະໄໝເປັນວຽກງານໜຶ່ງທີ່ພັກ ແລະ ລັດຖະບານ ໃຫ້ຄວາມສຳຄັນ ຊຶ່ງສະແດງອອກໃນກອງປະຊຸມໃຫຍ່ ຄັ້ງທີ X ຂອງພັກ, ການຫັນເປັນທັນສະໄໝ ແລະ ດີຈີຕອນກໍແມ່ນການນຳໃຊ້ເຕັກໂນໂລຊີຂໍ້ມູນຂ່າວສານເຂົ້າເປັນກົນໄກສຳຄັນໃນການຂັບເຄື່ອນການປະຕິຮູບຂະບວນການບໍ ລິຫານລັດ, ການຜະລິດ, ການດຳເນີນທຸລະກິດ, ການຄ້າ, ການບໍລິການ, ການສຶກສາ, ສາ ທາລະນະສຸກ, ລວມທັງກິດຈະ ກຳທາງເສດຖະກິດ ແລະ ສັງ ຄົມ. ການນຳໃຊ້ລະບົບເຕັກໂນໂລຊີຂໍ້ມູນຂ່າວສານ (ລະບົບບໍລິຫານລັດດ້ວຍເອເລັກໂຕຣນິກ E-Government) ເຂົ້າໃນທຸກຂະແໜງການຂອງລັດເພື່ອໃຫ້ການບໍລິການປະຊາຊົນເຊັ່ນ: ການຊໍາລະພາສີອາກອນຜ່ານມືຖື, ຜ່ານເວັບໄຊ, ການສົ່ງເສີມໃຫ້ປະຊາຊົນເຂົ້າເຖິງຂໍ້ມູນຂ່າວສານ, ການບໍລິການ ແລະ ການເຮັດທຸລະກຳຜ່ານທາງອິນເຕີເນັດ ແລະ ອື່ນໆຈະສ້າງໂອກາດນຳໄປສູ່ການປະຕິຮູບຂັ້ນພື້ນຖານຂອງການບໍລິການ, ການດຳເນີນທຸລະກິດ ແລະ ສ້າງມູນຄ່າເພີ່ມໃຫ້ແກ່ຜູ້ຊົມໃຊ້ ແລະ ການກ້າວໄປສູ່ລະບົບດີຈີຕອນໃນຍຸກອຸດສາຫະກຳ 4.0. ຍ້ອນເຫັນໄດ້ຄວາມໝາຍຄວາມສຳຄັນດັ່ງກ່າວກະຊວງໄປສະນີໂທລະຄົມມະນາຄົມ ແລະ ການສື່ສານໃນຖານະເປັນຜູ້ຄຸ້ມຄອງມະຫາພາກກ່ຽວກັບການຫັນເປັນທັນສະໄໝ ແລະ ດີຈີຕອນ ຈຶ່ງໄດ້ມີການຮ່ວມມືກັບຫຼາຍພາກສ່ວນທັງພາຍໃນ ແລະ ຕ່າງປະເທດໂດຍສະເພາະແມ່ນວຽກງານການພັດທະນາລະບົບບໍລິຫານລັດດ້ວຍເອເລັກໂຕຣນິກ, ສສ ຫວຽດນາມ, ເປັນປະເທດໜຶ່ງທີ່ມີລະດັບການພັດທະນາວຽກງານການບໍລິຫານລັດດ້ວຍເອເລັກໂຕຣນິກຢູ່ໃນແຖວໜ້າໃນຂົງເຂດອາຊີ. ການພັດທະນາລະບົບການບໍລິຫານລັດດ້ວຍເອເລັກໂຕຣນິກບໍ່ພຽງແຕ່ເປັນການປັບປຸງປະສິດທິພາບ ແລະ ປະ ສິດທິຜົນຂອງການບໍລິຫານລັດເທົ່ານັ້ນ, ແຕ່ຍັງເປັນການສ້າງໂອກາດໃຫ້ທຸກພາກສ່ວນໃນສັງຄົມສາມາດເຂົ້າເຖິງການ ບໍລິການຂອງພາກລັດຜ່ານ ລະບົບເອເລັກໂຕຣນິກ ແລະ ດີຈີຕອນ, ພະນັກງານລັດຖະ ກອນສາມາດເຮັດວຽກຮ່ວມ ກັນຢ່າງມີປະສິດທິພາບເຊັ່ນ: ການຊ່ວຍເຫຼືອຊຶ່ງກັນ ແລະ ກັນ, ການແລກປ່ຽນຄວາມຮູ້ ແລະ ປະສົບການຜ່ານລະບົບການສື່ສານຂໍ້ມູນຂ່າວສານ ແລະ ລະບົບໂປຣ ແກລມທີ່ທັນສະໄໝ, ສະນັ້ນທິດທາງແຜນການໃນຕໍ່ໜ້າຂອງກະຊວງໄປສະນີໂທລະຄົມມະນາຄົມ ແລະ ການສື່ສານ ນອກຈາກພັດທະນາລະບົບການບໍລິຫານແກ່ພາກລັດດ້ວຍກັນແລ້ວ ຍັງຈະຕ້ອງໄດ້ສືບຕໍ່ສ້າງເຄື່ອງມື ແລະ ສິ່ງອຳນວຍຄວາມສະດວກໃຫ້ແກ່ການບໍລິການພາກທຸລະກິດ ແລະ ປະຊາຊົນທີ່ຕິດພັນກັບການພັດທະນາແບບຍືນຍົງ. (ຂ່າວ: ສຸກສາຄອນ, ພາບ: ພູວຽງຄຳ)