ສສຊ ເຂດ 1 ເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII


...

19.03.2019 8:10     

   ສະມາຊິກສະພາແຫ່ງຊາດ (ສສຊ) ເຂດເລືອກຕັ້ງທີ I ນະຄອນຫຼວງວຽງຈັນ ນຳໂດຍ ທ່ານນາງ ພອນເພັດ ບຸບຜາ ຮອງປະທານກຳມາທິການວັດທະນະທຳ-ສັງຄົມ ສະພາແຫ່ງຊາດ, ສະມາຊິກສະພາແຫ່ງຊາດ ຊຸດທີ VIII ປະຈຳເຂດເລືອກຕັ້ງທີ I ນະ ຄອນຫຼວງວຽງຈັນ ໄດ້ພົບປະກັບບັນດາພະນັກງານຫຼັກແຫຼ່ງ ແລະ ພະນັກງານວິຊາການ ຂອງຄະນະໂຄສະນາອົບຮົມສູນກາງພັກໃນວັນທີ 14 ມີນາຜ່ານມາ ເພື່ອເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 6 ຂອງ ສະພາແຫ່ງຊາດຊຸດທີ VIII, ພ້ອມທັງຮັບຟັງຄຳຄິດຄຳເຫັນ ແລະ ຄຳສະເໜີຕໍ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ບັນຫາຕ່າງໆທີ່ເກີດຂຶ້ນໃນສັງຄົມ.
    ການພົບປະຄັ້ງນີ້ ສສຊ ໄດ້ເຜີຍແຜ່ຜົນສຳເລັດ ກອງປະຊຸມສະໄໝສາມັນເທື່ອທີ 6 ຂອງ ສະພາແຫ່ງຊາດຊຸດທີ VIII ທີ່ຈັດຂຶ້ນໃນລະຫວ່າງເດືອນພະຈິກຫາເດືອນທັນວາ 2018 ຜ່ານມາ, ກອງປະຊຸມໄດ້ມີການພິຈາລະນາ ແລະ ຮັບຮອງເອົາຫຼາຍບັນຫາສຳຄັນຂອງຊາດ ເປັນຕົ້ນແມ່ນ ບົດລາຍງານຂອງນາຍົກລັດຖະມົນຕີ ກ່ຽວກັບການເຄື່ອນໄຫວວຽກງານພົ້ນເດັ່ນຂອງລັດຖະບານ ປີ 2018 ແລະ ທິດທາງປີ 2019; ບົດລາຍງານກ່ຽວກັບການຈັດຕັ້ງວຽກງານໃນຂົງເຂດຕ່າງໆປະ ຈຳປີ 2018 ແລະ ທິດທາງປີ 2019 ເປັນຕົ້ນ ສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ແຜນເງິນຕາ; ບົດລາຍງານການເຄື່ອນໄຫວວຽກງານກວດສອບ, ຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປີ 2017 ແລະ ບົດລາຍງານຂອງອົງການກວດກາລັດຖະບານກ່ຽວກັບຜົນການກວດສອບ; ບົດລາຍງານການເຄື່ອນໄຫວວຽກງານກາງສະໄໝຂອງສະພາແຫ່ງຊາດຊຸດທີ VIII, ທິດທາງແຜນການຮອດກອງປະຊຸມຄັ້ງປະຖົມມະລືກຂອງສະພາແຫ່ງຊາດ ຊຸດທີ IX ແລະ ແຜນ ການຈຸດສຸມ; ແຜນການສ້າງ ແລະ ປັບປຸງກົດໝາຍ ແລະ ແຜນການຕິດຕາມກວດກາ ປະຈຳປີ 2019 ຂອງສະພາແຫ່ງຊາດ.
(ຂ່າວ-ພາບ:ພູວຽງຄຳ)