ກະຊວງ ຍທຂ ສະຫຼຸບວຽກງານຈັດຕັ້ງ ກໍ່ສ້າງພັກ-ພະນັກງານ


...

...

20.03.2019 9:12     

   ກະຊວງ ໂຍທາທິການ ແລະ ຂົນສົ່ງ(ຍທຂ) ໄດ້ຈັດກອງປະຊຸມວຽກງານ, ກໍ່ສ້າງພັກ-ພະນັກງານທົ່ວກະຊວງຂຶ້ນໃນ ວັນທີ 19 ມີນາຜ່ານມາ ທີ່ກະຊວງດັ່ງກ່າວ ໂດຍການເຂົ້າຮ່ວມ ແລະ ກ່າວເປີດຂອງທ່ານ ບຸນຈັນ ສິນທະວົງ ກໍາມະການສູນກາງພັກ ເລຂາຄະນະພັກ ລັດຖະມົນຕີກະຊວງ ຍທຂ, ມີບັນດາຫົວໜ້າກົມ, ຮອງກົມ, ພາກສ່ວນກ່ຽວຂ້ອງ ແລະ ແຂກຖືກເຊີນເຂົ້າຮ່ວມ. ທ່ານ ບຸນຈັນ ສິນທະວົງ ໄດ້ກ່າວເປີດບາງຕອນວ່າ: ກອງປະຊຸມຄັ້ງນີ້ ມີຈຸດ ປະສົງ ເພື່ອເຜີຍແຜ່ເນື້ອໃນຈິດໃຈບົດສະຫຼຸບຂອງຄະນະຈັດຕັ້ງສູນກາງພັກກ່ຽວກັບການຈັດຕັ້ງ, ກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງຂອງປີ 2018 ແລະ ຜ່ານທິດທາງແຜນການປີ 2019; ສະຫຼຸບຕີລາຄາສະພາບການຈັດຕັ້ງປະຕິບັດວຽກງານຈັດຕັ້ງ, ກໍ່ສ້າງພັກພະນັກງານ ແລະ ການປັບປຸງກົງຈັກການຈັດຕັ້ງຂອງຂະແໜງ ຍທຂ ປີ 2016-2018 ແລະ ແຜນການຂອງປີ 2019. ພ້ອມທັງແນະນຳລົງເລິກກ່ຽວກັບການກະກຽມດຳເນີນກອງປະຊຸມໃຫຍ່ ບັນດາຮາກຖານພັກ, ການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນເພື່ອ ເປັນພື້ນຖານໃຫ້ແກ່ການປະຕິບັດຕົວຈິງໄດ້ຮັບຜົນດີ. ໃນໂອກາດນີ້, ທ່ານລັດຖະມົນຕີ ຍັງໄດ້ຮຽກຮ້ອງມາຍັງບັນດາທ່ານຜູ້ແທນ ທີ່ເຂົ້າຮ່ວມກອງປະຊຸມ ພ້ອມກັນສຸມສະຕິປັນຍາເຂົ້າໃນການຄົ້ນຄວ້າ ແລະ ປະກອບຄຳຄິດຄຳເຫັນເຂົ້າໃສ່ເນື້ອໃນບົດ ສະຫຼຸບດັ່ງກ່າວ ໃຫ້ເລິກເຊິ່ງ ເພື່ອເສີມຂະຫຍາຍດ້ານຕັ້ງໜ້າ ແລະ ຊອກວິທີແກ້ໄຂຂໍ້ຄົງ ຄ້າງໃນຕໍ່ໜ້າ. ຢາກເຮັດໄດ້ຄື ແນວນັ້ນ ພວກເຮົາຕ້ອງມີການຄົ້ນຄວ້າກະກຽມຄຳຄິດ ຄຳເຫັນສົມທຽບໃສ່ພຶດຕິກຳຕົວຈິງຂອງແຕ່ລະຮາກຖານ; ທັງນີ້ ກໍເພື່ອແນໃສ່ເຮັດໃຫ້ກອງປະຊຸມຄັ້ງນີ້ ສຳເລັດຢ່າງຈົບງາມ ແລະ ສາມາດນຳໄປຈັດຕັ້ງປະຕິບັດເຂົ້າໃນວຽກງານຂອງຂະແໜງ ຍທຂ ຢ່າງສອດຄ່ອງກັບສະພາບຕົວຈິງ ແລະ ໄດ້ຮັບໝາກຜົນ. (ຂ່າວ: ບຸນທົງ)