ການນຳກະຊວງ ປທສ ເຂົ້າຮ່ວມກອງປະຊຸມ ລັດຖະມົນຕີ ດີຈີຕອນ ອາຊຽນ


...

20.03.2019 9:08     

   ທ່ານ ບຸນສະເຫຼີມໄຊ ເຄນນາວົງ ຮອງລັດຖະມົນຕີ ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ (ປທສ) ພ້ອມດ້ວຍຄະນະ ໄດ້ເດີນທາງເຂົ້າຮ່ວມກອງ ປະຊຸມລັດຖະມົນຕີດີຈີຕອນ, ພາຍໃຕ້ຄໍາຂວັນ "ASEAN Roadmap toward Industry 4.0", ໃນວັນທີ 15 ມີນາຜ່ານມາ ທີ່ນະຄອນພະນົມເປັນ ປະເທດກຳປູເຈຍ ໂດຍມີບັນດາຄະນະຜູ້ແທນຈາກບັນດາປະເທດສະມາຊິກອາຊຽນເຂົ້າຮ່ວມ. ການຈັດກອງປະຊຸມໃນຄັ້ງນີ້, ເພື່ອປຶກສາຫາລື ແລະ ແລກ ປ່ຽນທັດສະນະ ຕໍ່ກັບການກະກຽມຫັນສູ່ອຸດສາຫະກຳ 4.0, ຊຶ່ງໃນປັດຈຸບັນ ແຕ່ລະປະເທດໃນທົ່ວໂລກ ກໍຄືບັນດາພາກພື້ນ ກໍກໍາລັງກະກຽມທີ່ຈະຫັນໄປສູ່ເສດຖະກິດ ແລະ ສັງຄົມດີຈີຕອນ ໄປຄຽງຄູ່ກັບການປ່ຽນແປງຂອງອຸດສາຫະ ກໍາ 4.0 ໂດຍສະເພາະ ການນໍາໃຊ້ເຕັກໂນໂລຊີການສື່ ສານ ແລະ ອິນເຕີເນັດເຂົ້າໃນຂະບວນການຜະລິດ, ການບໍລິການ ລວມໄປເຖິງການນຳສະເໜີຮູບແບບທຸລະກິດໃໝ່, ເຮັດໃຫ້ເກີດຄວາມຍືດຫຍຸນໃນການຜະລິດ, ສ້າງມູນຄ່າເພີ່ມຕໍ່ອຸດສະຫະກໍາ ແລະ ເຮັດໃຫ້ຜົນຜະລິດທີ່ມີຄຸນນະພາບສູງ. ດັ່ງນັ້ນ, ການຫັນປ່ຽນສູ່ຍຸກ ດີຈີຕອນ 4.0 ແລະ ວິທີການ ໃນການຫັນປ່ຽນຂອງແຕ່ລະປະເທດຈຶ່ງມີຄວາມແຕກຕ່າງກັນ, ເນື່ອງຈາກຄວາມແຕກຕ່າງຂອງການເຕີບໂຕດ້ານເສດຖະກິດ, ສະພາບແວດລ້ອມ ແລະ ເງື່ອນໄຂຕ່າງໆ. ທ່າມກາງຄວາມແຕກຕ່າງເຫຼົ່ານີ້, ກອງປະຊຸມດັ່ງກ່າວ ຈະເປັນເວທີທີ່ດີ ແລະ ເປັນໂອກາດ ໃນການແລກປ່ຽນປະສົບການ, ການຮ່ວມມືກັນລະຫວ່າງອາຊຽນ ເພື່ອແລກປ່ຽນບົດຮຽນ, ສິ່ງທ້າທາຍ ແລະ ວິທີທາງໃນການກ້າວສູ່ຍຸກ 4.0. ໃນໂອກາດນີ້, ທ່ານຮອງລັດຖະມົນຕີ ກະຊວງ ປທສ ໄດ້ໃຫ້ກຽດເປັນນັກວິທະຍາກອນ (Panelist) ໃນກອງປະຊຸມ ແລະ ໄດ້ລາຍງານຕໍ່ກອງປະຊຸມວ່າ ກະຊວງ ປທສ ກໍຄື ສປປ ລາວເຫັນໄດ້ເຖິງປັດໃຈທີ່ສໍາຄັນໃນການຫັນເປັນຍຸກ 4.0 ເປັນຕົ້ນ ການກໍານົດຍຸດສາດທີ່ຊັດເຈນ (ມີຈຸດປະສົງ ແລະ ແຜນ ການໃນການພັດທະນາ), ການຕອບສະໜອງຄວາມຕ້ອງການຂອງສັງຄົມ (ການບໍລິການ), ຮັບປະກັນຄວາມພ້ອມດ້ານຊັບພະຍາກອນມະນຸດ (ການສ້າງທັກສະ ແລະ ຂີດຄວາມສາມາດ) ແລະ ສຸມໃສ່ການຮ່ວມມືແບບລວງຂວາງ (ການເຂົ້າເຖິງການບໍລິການຕ່າງໆຢ່າງທົ່ວເຖິງທຸກຂະແໜງການ. ຊຶ່ງປັດຈຸບັນ ກະຊວງ ປທສ ໃນນາມຜູ້ຄຸ້ມຄອງມະຫາພາກ ກໍໄດ້ລິເລີ່ມໃນການຫັນປ່ຽນ ແລະ ຮ່າງແຜນໃນການຫັນເປັນທັນສະໄໝ (Digital Transformation Master Plan) ໂດຍສະເພາະ, ການກໍານົດຫົວຂໍ້, ບຸລິມະສິດ ແລະ ອົງປະກອບຕ່າງໆ ເພື່ອກຽມໃນການຫັນເປັນຍຸກດັ່ງກ່າວ. (ຂ່າວ-ພາບ: ປທສ)