ກອງປະຊຸມສຳມະນາວິທະຍາສາດບັ້ນຮົບປ້ອງກັນ ຕົວເມືອງທ່າແຂກ


...

21.03.2019 9:27     

   ການສໍາມະນາວິທະຍາ ສາດ " ບັ້ນຮົບປ້ອງກັນຕົວເມືອງທ່າແຂກ 21 ມີນາ 1946" ເບື້ອງຕົ້ນແມ່ນເລີ່ມຈາກການເຂົ້າຮ່ວມວາງພວງມາລາ ແລະ ກະຕ່າດອກໄມ້ຢູ່ 4 ຈຸດຂອງ ແຂວງຄື : ຫໍໄຫວ້ລະນຶກປະ ຫວັດສາດ 21 ມີນາ 1946, ອະ ນຸສາວະລີນັກຮົບນິລະນາມ, ອະນຸສາວະລີປະທານ ໄກສອນ ພົມວິຫານ ແລະ ອານຸສອນສະຖານ 21 ມີນາ ຈາກນັ້ນແມ່ນໄດ້ເຂົ້າຮ່ວມກອງປະຊຸມສໍາມະນາວິທະຍາສາດໂດຍໄດ້ຈັດຂຶ້ນໃນຕອນເຊົ້າຂອງວັນທີ 20 ມີນາ ຢູ່ທີ່ສະໂມສອນໃຫຍ່ຫຼັກ 4 ໂດຍການເປັນກຽດເຂົ້າຮ່ວມຂອງທ່ານ ພົອ. ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ ລັດຖະມົນຕີກະຊວງປ້ອງກັນປະເທດ, ມີທ່ານ ສົມໃຈ ເພັດສີນວນ ຮອງເລຂາພັກແຂວງ ປະທານສະພາປະຊາຊົນແຂວງຄໍາມ່ວນ, ມີບັນດາທ່ານເຈົ້າແຂວງຈາກບັນດາແຂວງໃກ້ຄຽງ , ພະນັກງານປະຕິວັດອາວຸໂສບໍານານ , ທ່ານ ເຈິນ ກົງທິ່ງ ຫົວໜ້າກົງສູນໃຫຍ່ ສສ ຫວຽດນາມປະຈຳແຂວງສະຫວັນນະເຂດ , ທ່ານ ນາງ ຍອດແກ້ວມະນີ ສຸພານຸວົງ ຕາງໜ້າສູນກາງແນວລາວສ້າງຊາດ, ມີບັນດາແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.
    ທ່ານ ພົຕ ແອສະໄໝ ເລືອງວັນໄຊ ຮອງລັດຖະມົນຕີກະຊວງປ້ອງກັນປະເທດໃນນາມປະທານກອງປະຊຸມໄດ້ກ່າວເປີດກອງປະຊຸມຢ່າງເປັນທາງການວ່າ: ຕະຫຼອດໄລຍະຂອງການດໍາເນີນກອງປະຊຸມເປັນເວລາ 1 ວັນ ບັນດາຜູ້ແທນເຂົ້າຮ່ວມໄດ້ຮັບຮູ້, ເຂົ້າໃຈກ່ຽວກັບບົດຮຽນ ແລະ ປະສົບການຈາກວິທະຍາກອນທີ່ສັງກັດຢູ່ບັນດາກົມຂອງກະຊວງປ້ອງກັນປະເທດ, ກອງບັນຊາການທະຫານແຂວງຄໍາມ່ວນ, ພະນັກງານປະຕິວັດອາວຸໂສບໍານານຂັ້ນຕ່າງໆທີ່ໄດ້ຜ່ານບັ້ນຮົບມາແລ້ວໃນໄລຍະຕໍ່ສູ້ກູ້ຊາດຊຶ່ງບົດຮຽນທີ່ນໍາມາສໍາມະນາປະກອບມີຄື: ການຊີ້ນໍາໆພາຂອງຄະນະພັກແຄວ້ນລາວຕໍ່ກໍາລັງປະກອບອາວຸດ ແລະ ປະຊາຊົນບັນດາເຜົ່າເພື່ອຕີເອົາຊະນະພວກລ່າເມືອງຂຶ້ນ ແລະ ປົກປັກຮັກສາເມືອງທ່າແຂກໃນຕົ້ນປີ 1946, ເສີມຂະຫຍາຍມູນເຊື້ອພິລະອາດຫານ ແລະ ການສ້າງສາພັດທະນາແຂວງຄໍາມ່ວນຕະຫຼອດໃນໄລຍະເວລາ 70 ປີຜ່ານມາພາຍໃຕ້ການຊີ້ນໍາ ນໍາພາຂອງຄະນະພັກ-ອໍານາດການປົກຄອງແຂວງ, ບັ້ນຮົບປ້ອງກັນຕົວເມືອງທ່າແຂກ 21 ມີນາ 1946 ແມ່ນການສະແດງໃຫ້ເຫັນເຖິງນໍ້າໃຈຮັກຊາດ, ຕໍ່ສູ້ບໍ່ຍອມຈໍານົນຂອງປະຊາຊົນບັນດາເຜົ່າແຂວງຄໍາມ່ວນ, ເສີມຂະຫຍາຍມູນເຊື້ອພິລະອາດຫານ 21 ມີນາ 1946 ຂອງກໍາລັງປະກອບອາວຸດ ແລະ ປະຊາຊົນບັນດາເຜົ່າເມືອງທ່າແຂກເຂົ້າໃນວຽກງານປັບປຸງກໍາລັງປະກອບອາວຸດໃນໄລຍະໃໝ່, ບັ້ນຮົບປ້ອງກັນຕົວເມືອງທ່າແຂກ 21 ມີນາ 1946 ແມ່ນການຮ່ວມສໍາພັນສູ້ຮົບລະຫວ່າງສອງກອງທັບລາວ - ຫວຽດນາມ, ເສີມຂະຫຍາຍມູນເຊື້ອ 21 ມີນາ 1946 ເຂົ້າໃນວຽກງານ 3 ສ້າງຂອງແຂວງເພື່ອລຶບລ້າງຄວາມທຸກຍາກຂອງປະຊາຊົນບັນດາເຜົ່າ, ວິລະກໍາ 21 ມີນາແມ່ນຂີດໝາຍທາງດ້ານປະຫວັດສາດແຫ່ງການຮ່ວມສໍາພັນສູ້ຮົບລະຫວາງສອງຊາດລາວ - ຫວຽດນາມ, ການປັບປຸງກໍາລັງປະກອບອາວຸດທ້ອງຖິ່ນແຂວງຄໍາມ່ວນຕາມທິດປະຕິວັດ ແບບແຜນທັນສະໄໝໃນເງື່ອນໄຂໃໝ່ .
    ສໍາລັບວາລະໃນພາກ ບ່າຍແມ່ນໄດ້ນໍາສະເໜີບົດຮຽນກ່ຽວກັບສະພາບແວດລ້ອມ, ສະພາບສັດຕູ ແລະ ສະພາບກໍາລັງເຮົາໃນເວລາຜັນແປສູ້ຮົບຢູ່ຕົວເມືອງທ່າແຂກໃນຕົ້ນປີ 1946, ເງື່ອນໄຂສະພາບແວດລ້ອມ, ທີ່ຕັ້ງພູມສັນຖານຂອງແຂວງຄໍາມ່ວນ, ສະພາບເທສະບານເມືອງທ່າແຂກໃນເມື່ອກ່ອນ ແລະ ປັດຈຸບັນ.
(ຂ່າວ-ພາບ: ແດງສະຫວັດ ແສນພານິດ)