ກະກຽມເປີດຂະບວນການວັນສັກຢາ ກັນພະຍາດແຫ່ງຊາດ


...

21.03.2019 9:27     

   ເພື່ອກະກຽມຄວາມພ້ອມໃນການຈັດຕັ້ງປະຕິບັດວັນສັກຢາກັນພະຍາດແຫ່ງຊາດ ເພື່ອໂຕ້ຕອບການລະບາດພະຍາດໝາກແດງໃຫ້ຢຸດຕິໂດຍໄວ ແລະ ສ້າງເງື່ອນໄຂເຮັດໃຫ້ວັນສັກຢາກັນພະຍາດແຫ່ງຊາດ ບັນລຸ 95% ຂຶ້ນໄປໃນທຸກໆເມືອງ, ທຸກບ້ານ ເພື່ອປິດຊ່ອງວ່າງດ້ານພູມຄຸ້ມກັນຕໍ່ພະຍາດໝາກແດງ.
    ໃນກາງເດືອນມີນາຜ່ານມາ, ກະຊວງສາທາລະນະສຸກ ໄດ້ຈັດກອງປະຊຸມກະກຽມເປີດບັ້ນຂະບວນການວັນສັກຢາກັນພະຍາດແຫ່ງຊາດ ເພື່ອໂຕ້ຕອບການລະບາດພະຍາດໝາກແດງໃຫຍ່ ແລະ ໝາກແດງນ້ອຍ, ທີ່ຫ້ອງປະຊຸມ ຂອງໂຮງແຮມດອນຈັນພາເລດ, ນະຄອນຫຼວງວຽງຈັນ ໂດຍການເປັນປະທານຂອງທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ, ເປັນກຽດເຂົ້າຮ່ວມໂດຍທ່ານ ສົມດີ ດວງດີ ກຳມະການສູນກາງພັກ ຮອງນາຍົກລັດຖະມົນຕີ ລັດຖະມົນ ຕີກະຊວງການເງິນ, ມີທ່ານ ນາງ ຄຳຈັນ ພົມແສງສະຫວັນ ຮອງປະທານ ສູນກາງແນວລາວສ້າງຊາດ, ບັນດາທ່ານເຈົ້າແຂວງ-ຮອງເຈົ້າແຂວງ, ປະທານ-ຮອງປະທານແນວລາວສ້າງຊາດແຂວງ ຂອງບັນດາແຂວງທົ່ວ ປະເທດ, ບັນດາທ່ານຕາງ ໜ້າອົງການອະນາໄມໂລກ, ອົງການອຸຍນີເຊັບ ແລະ ພາກສ່ວນກ່ຽວ ຂ້ອງເຂົ້າຮ່ວມ.
    ກອງປະຊຸມຄັ້ງນີ້, ໄດ້ຮັບຟັງການເຜີຍແຜ່ເອກະສານແຜນຍຸດທະສາດ ການລຶບ ລ້າງພະຍາດໝາກແດງ ແຕ່ນີ້ຮອດປີ 2022, ສະພາບການລະບາດພະຍາດໝາກແດງ ໃນລະຫວ່າງເດືອນ 1-3 ປີ 2019 ແລະ ແນວໂນ້ມການລະບາດໃນຕໍ່ໜ້າ, ການວິເຄາະຄວາມສ່ຽງຂອງການລະບາດໃນຕໍ່ໜ້າ ອີງໃສ່ສະພາບການສັກຢາກັນພະຍາດໝາກແດງ ທົ່ວປະເທດ ແຕ່ປີ 2009-2018, ມາດຕະການຈັດຕັ້ງປະຕິບັດ ວັນສັກຢາກັນພະຍາດ ແຫ່ງຊາດ. ພ້ອມກັນນັ້ນ, ກໍໄດ້ມີການປະກອບຄຳຄິດຄຳເຫັນແລກປ່ຽນບົດຮຽນຢ່າງກົງໄປກົງມາ ກ່ຽວກັບວຽກງານດັ່ງກ່າວ ເຮັດໃຫ້ບັນດາທ່ານຜູ້ແທນທີ່ເຂົ້າຮ່ວມສາມາດຮັບຮູ້ ແລະ ກຳແໜ້ນເນື້ອໃນຈິດໃຈຂອງກອງປະຊຸມໄດ້ຢ່າງເລິກເຊິ່ງ.
(ຂ່າວ-ພາບ: ສູນກາງແນວລາວສ້າງຊາດ)