ຜົນກອງປະຊຸມລັດຖະບານ ສະໄໝສາມັນ ປະຈຳເດືອນມີນາ


...

22.03.2019 8:02     

   ທ່ານ ຈະເລີນ ເຢຍປາວເຮີ ລັດຖະມົນຕີປະຈໍາສໍານັກງານນາຍົກລັດຖະມົນຕີ ໂຄສົກລັດຖະບານ ໄດ້ຖະແຫຼງຂ່າວຜົນກອງປະຊຸມລັດຖະບານສະໄໝສາມັນ ປະຈໍາເດືອນມີນາ, ໃນວັນທີ 21 ມີນານີ້ ພາຍຫຼັງກອງປະຊຸມ ໄດ້ດໍາເນີນມາຕັ້ງແຕ່ວັນທີ 20 ມີນາ ທີ່ສໍານັກງານນາຍົກລັດຖະມົນຕີ,     ພາຍໃຕ້ການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ, ມີບັນດາທ່ານຮອງນາຍົກລັດຖະມົນຕີ ແລະ ສະມາຊິກລັດຖະບານ ພ້ອມດ້ວຍແຂກຖືກເຊີນເຂົ້າຮ່ວມຢ່າງພ້ອມພຽງ.
ກອງປະຊຸມຄັ້ງນີ້ ໄດ້ພ້ອມກັນສຸມໃສ່ປຶກສາຫາລື, ປະກອບຄໍາຄິດຄໍາເຫັນ ແລະ ພິຈາລະນາຮັບຮອງເອົາ 7 ເອກະສານສໍາຄັນຄື:
1. ບົດລາຍງານຄວາມຄືບໜ້າ ກ່ຽວກັບການຈັດຕັ້ງປະຕິບັດ ການຮ່ວມມືຂໍ້ລິເລີ່ມ ໜຶ່ງແລວ, ໜຶ່ງເສັ້ນທາງ ໃນປີ 2018 ແລະ ທິດທາງຮ່ວມມື ປີ 2019.
2. ຮ່າງດໍາລັດ ວ່າດ້ວຍການຄຸ້ມຄອງ ແລະ ນໍາໃຊ້ການຊ່ວຍເຫຼືອທາງການເພື່ອການພັດທະນາ.
3. ຮ່າງດຳລັດ ວ່າດ້ວຍການເຂົ້າເຖິງຂໍ້ມູນຂ່າວສານສິນເຊື່ອ.
4. ຮ່າງກົດໝາຍ ວ່າດ້ວຍເອກະສານແຫ່ງຊາດ ສະບັບໃໝ່.
5. ຮ່າງກົດໝາຍ ວ່າດ້ວຍການຄຸ້ມຄອງສ່ວຍສາອາກອນ ສະບັບປັບປຸງ.
6. ຮ່າງກົດໝາຍ ວ່າດ້ວຍອາກອນລາຍໄດ້ ສະບັບສ້າງໃໝ່.
7. ຮ່າງກົດໝາຍ ວ່າດ້ວຍອາກອນຊົມໃຊ້ ສະບັບສ້າງໃໝ່.
    ກອງປະຊຸມລັດຖະບານ ໄດ້ຮັບຟັງການລາຍງານຫຍໍ້ກ່ຽວກັບສະພາບພົ້ນເດັ່ນຈາກຂະແໜງການທີ່ກ່ຽວຂ້ອງ ເປັນຕົ້ນການປ່ຽນແປງຂອງສະພາບດິນຟ້າອາກາດ ໂດຍສະເພາະການເພີ່ມຂຶ້ນຂອງມົນລະພິດທາງອາກາດ ຊຶ່ງເກີິນມາດຕະຖານກໍານົດ ເປັນຕົ້ນຄ່າຄວາມເຂັ້ມຂຸ້ນຂອງຝຸ່ນລະ ອອງ PM 2.5 ມີຄ່າສູງກວ່າມາດຕະຖານສິ່ງແວດລ້ອມແຫ່ງຊາດກໍານົດ ຄື 50 ມິລີກຣາມຕໍ່ແມັດກ້ອນ. ສາຍເຫດຕົ້ນຕໍຍ້ອນມີໄຟໄໝ້ປ່າ ຢູ່ຂອບເຂດນະຄອນຫຼວງວຽງຈັນ, ມົນລະພິດຂ້າມຊາຍແດນ. ນອກນັ້ນ, ຍັງມີການຈູດເຟືອງ, ຈູດຂີ້ເຫຍື້ອຊະຊາຍ ໃນຂອບເຂດທົ່ວປະເທດ; ການແຜ່ລະບາດຂອງພະຍາດອະຫິວາໝູອາຟຣິກກາ; ປະກົດການ ຫຍໍ້ທໍ້ໃນສັງຄົມ ເປັນຕົ້ນບັນ ຫາຢາເສບຕິດ ແລະ ອື່ນໆ; ສະພາບພົ້ນເດັ່ນຂອງພາກພື້ນ ແລະ ສາກົນ.
   ຕໍ່ບັນຫາດັ່ງກ່າວ, ກອງປະຊຸມ ໄດ້ພ້ອມກັນຄົ້ນຄວ້າ ແລະ ມີຄວາມເປັນເອກະພາບສູງ ເພື່ອກໍານົດມາດຕະການແກ້ໄຂ ເປັນຕົ້ນໃຫ້ເອົາໃຈໃສ່ໃນການແຈ້ງເຕືອນ, ອອກຂ່າວຢ່າງເປັນປົກກະຕິ ເພື່ອໃຫ້ປະຊາຊົນຮັບຮູ້, ມີສະຕິລະວັງຕົວ ແລະ ຮູ້ຈັກວິທີປ້ອງກັນຕົວເອງຈາກການປ່ຽນແປງຂອງສະພາບດິນຟ້າອາກາດ ໂດຍສະເພາະ ນັກຮຽນ-ນັກສຶກສາ ແລະ ຜູ້ສູງອາຍຸ; ກ່ຽວກັບການແຜ່ລະບາດຂອງພະຍາດອະຫິວາໝູອາຟຣິກກາຢູ່ບັນດາປະເທດໃກ້ຄຽງ ເຖິງວ່າຈະບໍ່ມີກໍລະນີເກີດຂຶ້ນຢູ່ ສປປ ລາວ ກໍຕາມ, ແຕ່ຕ້ອງມີມາດຕະການປ້ອງກັນໂດຍໄວ ແລະ ເຂັ້ມງວດຕາມດ່ານຕ່າງໆ ພ້ອມທັງ ກວດກາໃນຕະຫຼາດ ຖ້າພົບເຫັນແມ່ນໃຫ້ມີມາດຕະການແກ້ໄຂຢ່າງເດັດຂາດ. ນອກນັ້ນ ໃຫ້ກວດກາຄືນການນໍາເຂົ້າສິນຄ້າປະເພດ ໝາກໄມ້ ພືດ, ສັດ ແລະ ອື່ນໆ ທີ່ເຈືອປົນສານເຄມີ. ພ້ອມດຽວກັນນັ້ນ, ໃຫ້ບັນດາກະຊວງ ແລະ ອົງການປົກຄອງທ້ອງຖິ່ນ ເພີ່ມທະວີຄວາມເອົາໃຈໃສ່ ແລະ ມີສ່ວນຮ່ວມຢ່າງເປັນເຈົ້າການໃນການແກ້ໄຂບັນຫາປະກົດການຫຍໍ້ທໍ້ຕ່າງໆໃນສັງຄົມ, ເພີ່ມທະວີການສຶກສາອົບຮົມພະນັກງານ, ເຈົ້າໜ້າທີ່ລັດ ແລະ ປະຊາຊົນ ໃຫ້ຍົກສູງສະຕິເຄົາລົບ ແລະ ປະຕິບັດກົດໝາຍ, ເດັດດ່ຽວແກ້ໄຂປະກົດການລະເມີດກົດໝາຍ ແລະ ລະບຽບການຕ່າງໆໃຫ້ທັນເວລາ ແລະ ມີປະສິດທິຜົນ.
   ຕໍ່ກັບບົດລາຍງານກ່ຽວກັບຄວາມຄືບໜ້າການຈັດຕັ້ງປະຕິບັດ ການຮ່ວມມືຂໍ້ລິເລີ່ມ ໜຶ່ງແລວ, ໜຶ່ງເສັ້ນທາງ ໃນປີ 2018 ແລະ ທິດທາງຮ່ວມມື ປີ 2019. ກອງປະຊຸມ ໄດ້ຕີລາຄາວ່າ: ນະໂນບາຍ ໜຶ່ງແລວ, ໜຶ່ງເສັ້ນທາງ ແມ່ນມີຄວາມໝາຍ ແລະ ຄວາມສໍາຄັນຕໍ່ການພັດທະນາເສດຖະກິດ-ສັງຄົມ ຂອງ ສປປ ລາວ.
   ສະນັ້ນ, ກອງປະຊຸມ ໄດ້ພິຈາລະນາຮັບ ຮອງດ້ານຫຼັກການຕໍ່ບົດລາຍງານດັ່ງກ່າວ ແລະ ຊີ້ນໍາໃຫ້ພາກສ່ວນທີ່ກ່ຽວຂ້ອງນໍາໄປປັບ ປຸງຕາມການປະກອບຄໍາເຫັນຂອງສະມາຊິກລັດຖະບານ. ບັນດາກະຊວງ ແລະ ອົງການທີ່ກ່ຽວຂ້ອງ ຕ້ອງເອົາໃຈໃສ່ຄົ້ນຄວ້າຍາດແຍ່ງເອົາໂອກາດ, ການຊ່ວຍເຫຼືອ, ການລົງທຶນ ແລະ ການສະໜັບສະໜູນ ທີ່ຕິດພັນກັບການຈັດຕັ້ງປະຕິບັດຂໍ້ລິເລີ່ມດັ່ງກ່າວ; ເອົາໃຈໃສ່ໄຈ້ແຍກບັນດາໂຄງການຊ່ວຍເຫຼືອຕ່າງໆໃຫ້ລະອຽດ, ຈະແຈ້ງ ໂຄງການໃດເປັນໂຄງການຊ່ວຍເຫຼືອ, ໂຄງການໃດເປັນໂຄງການກູ້ຢືມ ແລະ ການລົງທຶນ ທີ່ພວກເຮົາສາມາດຍາດແຍ່ງໄດ້ ເພື່ອສະເໜີໃຫ້ລັດຖະບານພິຈາລະນາ, ຕົກລົງ; ສຳລັບກົນໄກປະສານງານແມ່ນມອບໃຫ້ກະຊວງແຜນການ ແລະ ການລົງທຶນ ເປັນໃຈກາງປະສານງານກັບຂະແໜງການຕ່າງໆທີ່ກ່ຽວ ຂ້ອງ ເພື່ອເຮັດວຽກງານດັ່ງກ່າວນີ້ ໃຫ້ມີປະສິດທິຜົນ, ມອບໃຫ້ກະຊວງການຕ່າງປະເທດເຂົ້າຮ່ວມ ແລະ ຮັບຜິດຊອບວຽກງານການເມືອງ ແລະ ນະ ໂຍບາຍ, ມອບໃຫ້ຄະນະກໍາມະການຮ່ວມມື ລາວ-ຈີນ ເປັນຜູ້ປະສານງານ ແລະ ຕິດຕາມຊຸກຍູ້ການຈັດຕັ້ງປະຕິບັດ ບັນດາໂຄງ ການຮ່ວມມືສອງຝ່າຍ ໃຫ້ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນ.
    ກອງປະຊຸມ ໄດ້ພິຈາລະ ນາ ແລະ ເຫັນດີຮັບຮອງເອົາຮ່າງດໍາລັດ ວ່າດ້ວຍການຄຸ້ມຄອງ ແລະ ນໍາໃຊ້ການຊ່ວຍເຫຼືອທາງການ ເພື່ອການພັດທະນາ ສະບັບປັບປຸງ ແລະ ຮ່າງດໍາລັດວ່າດ້ວຍການເຂົ້າເຖິງຂໍ້ມູນຂ່າວສານສິນເຊື່ອ. ກອງປະຊຸມ ໄດ້ຊີ້ນໍາໃຫ້ພາກສ່ວນທີ່ກ່ຽວຂ້ອງ ນໍາໄປປັບປຸງຕື່ມຕາມການປະກອບຄໍາເຫັນ ຂອງສະມາຊິກລັດຖະບານ ເປັນຕົ້ນ ໃຫ້ຮຽບຮຽງຄືນບາງມາດຕາທີ່ເຫັນວ່າຍັງບໍ່ທັນຊັດເຈນ, ຈະແຈ້ງ ແລະ ຄົບຖ້ວນ, ພາຍຫຼັງປັບປຸງແລ້ວ ໃຫ້ພາກສ່ວນທີ່ກ່ຽວຂ້ອງ ປະສານສົມທົບກັບ ລັດຖະມົນຕີປະຈໍາສໍານັກງານນາຍົກລັດຖະມົນຕີ ຮຽບຮຽງຄືນ ເພື່ອເຮັດໃຫ້ 2 ດໍາລັດດັ່ງກ່າວ ມີເນື້ອໃນຄົບຖ້ວນສົມບູນ ເມື່ອປະກາດໃຊ້ແລ້ວສາມາດປະຕິບັດໄດ້.
    ສໍາລັບຮ່າງກົດໝາຍ ວ່າດ້ວຍເອກະສານແຫ່ງຊາດ (ສ້າງໃໝ່), ຮ່າງກົດໝາຍວ່າດ້ວຍການຄຸ້ມຄອງສ່ວຍສາອາກອນ (ສະບັບປັບປຸງ); ຮ່າງກົດໝາຍວ່າດ້ວຍອາກອນລາຍໄດ້ (ສ້າງໃໝ່) ແລະ ຮ່າງກົດໝາຍວ່າດ້ວຍອາກອນຊົມໃຊ້ (ສ້າງໃໝ່). ກອງປະຊຸມ, ໄດ້ພິຈາລະນາ ແລະ ເຫັນດີດ້ານຫຼັກການຮັບຮອງເອົາ 4 ຮ່າງກົດໝາຍດັ່ງກ່າວ ພ້ອມທັງຊີ້ນໍາໃຫ້ພາກສ່ວນທີ່ກ່ຽວ ຂ້ອງນໍາໄປປັບປຸງຕາມການປະກອບຄໍາເຫັນຂອງສະມາຊິກລັດຖະບານ ເພື່ອເຮັດໃຫ້ບັນດາຮ່າງກົດໝາຍດັ່ງກ່າວ ມີເນື້ອໃນຄົບຖ້ວນ, ຈະແຈ້ງ ແລະ ຮັດ ກຸມ ໂດຍມອບໃຫ້ພາກສ່ວນກ່ຽວຂ້ອງປະສານສົມທົບກັບ ລັດຖະມົນຕີປະຈໍາສໍານັກງານນາຍົກລັດຖະມົນຕີ, ກະຊວງຍຸຕິທໍາຮຽບຮຽງຄືນ ກ່ອນນໍາສະເໜີຕໍ່ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ 8 ພິລາລະນາຮັບຮອງຕາມລະບຽບການ.
ສຳລັບການຈັດຕັ້ງປະຕິ ບັດວຽກງານຈຸດສຸມເດືອນມີນາ ແລະ ເດືອນເມສາ ປີ 2019, ກອງປະຊຸມ ໄດ້ສະຫຼຸບຕີລາຄາ ແລະ ກຳນົດດັ່ງນີ້:
1. ໄດ້ປະຕິບັດວຽກຈຸດສຸມ ທີ່ໄດ້ກໍານົດອອກຢູ່ໃນ ມະຕິຂອງກອງປະຊຸມລັດຖະ ບານປະຈໍາເດືອນກຸມພາ 2019 ເປັນຕົ້ນແມ່ນ ແກ້ໄຂບັນດາປະກົດການຫຍໍ້ທໍ້ຂອງສັງຄົມ ໂດຍສະເພາະບັນຫາທີ່ສື່ສັງຄົມອອນລາຍໃຫ້ຄວາມສົນໃຈຫຼາຍເຊັ່ນ: ອຸບັດເຫດຕາມທ້ອງຖະໜົນ, ຢາເສບຕິດ ແລະ ການປະພຶດທີ່ບໍ່ເໝາະສົມຂອງພະນັກງານ ຫຼື ເຈົ້າໜ້າທີ່ລັດ; ຊຸກຍູ້ການເກັບລາຍຮັບ ແລະ ປະຕິບັດລາຍຈ່າຍງົບປະມານ; ສືບຕໍ່ແກ້ໄຂສິ່ງອຸດຕັນ ແລະ ທ່ວງດຶງຄວາມສະດວກໃນການດໍາເນີນທຸລະກິດ ໂດຍສະເພາະແມ່ນ 10 ຕົວຊີ້ວັດ ຄວາມສະດວກໃນການດໍາເນີນທຸລະກິດ; ເລັ່ງຟື້ນຟູເຂດທີ່ຖືກຜົນກະທົບຈາກໄພພິບັດຢູ່ເມືອງສະໜາມໄຊ, ຂະແໜງການກ່ຽວຂ້ອງໄດ້ເປັນເຈົ້າການໃນການປ້ອງກັນແກ້ໄຂພະຍາດລະດູການ (ໄຂ້ຍຸງລາຍ, ໄຂ້ໝາກແດງ), ການແກ້ໄຂໄຟໄໝ້ລາມປ່າ ແລະ ມີຄຳສັ່ງຫ້າມນຳເຂົ້າຊົ່ວຄາວ ຊີ້ນໝູ ຫຼື ໝູ ຈາກປະເທດໃກ້ຄຽງ ທີ່ເກີດມີພະຍາດອະຫິວາໝູ.
2. ບັນດາຂະແໜງການ, ອົງການອ້ອມຂ້າງສູນກາງ ແລະ ອົງການປົກຄອງທ້ອງຖິ່ນ ຂັ້ນຕ່າງໆ ໄດ້ເອົາໃຈໃສ່ຊຸກຍູ້ການສ້າງຂະບວນການຮັບຕ້ອນວັນສຳຄັນຂອງພັກ-ຂອງຊາດ ເປັນຕົ້ນແມ່ນວັນແມ່ຍິງສາກົນ, ວັນເສຍອົງຄະ ແລະ ເສຍສະຫຼະແຫ່ງຊາດ, ວັນສ້າງຕັ້ງພັກ. ປັບປຸງບັນດາຮ່າງກົດໝາຍ 10 ສະບັບ ທີ່ຈະນໍາໄປຜ່ານກອງປະຊຸມສະພາສະໄໝສາມັນ ເທື່ອທີ 7 ຂອງສະພາແຫ່ງຊາດ ແລະ ສືບຕໍ່ສ້າງນິຕິກໍາລຸ່ມກົດໝາຍຫຼາຍສະບັບ; ປັບປຸງຄຸນນະພາບການເຄື່ອນໄຫວຂອງກົງຈັກການຈັດຕັ້ງ ແລະ ການບັນຈຸລັດຖະກອນໃໝ່; ແກ້ໄຂຜົນຂອງການກວດກາການຂຸດຄົ້ນ, ທ້ອນໂຮມ ແລະ ເຄື່ອນຍ້າຍໄມ້, ການລັກລອບຕັດໄມ້, ແກ້ໄຂຄໍາສະເໜີຂອງປະຊາຊົນ ຜ່ານສາຍດ່ວນ 1516 ທັງໝົດ 17 ກໍລະນີ ແລະ ບັນຫາອື່ນໆ;
3. ໄດ້ພິຈາລະນາຫຼາຍບັນຫາທີ່ສໍາຄັນ ເປັນຕົ້ນແມ່ນ: ບັນຫາກ່ຽວພັນກັບການຈັດງານມະຫະກໍາກິລາແຫ່ງຊາດ ຄັ້ງທີ XI ປີ 2019 ທີ່ແຂວງຊຽງຂວາງ, ຮ່າງນະໂຍບາຍລາຄາໄຟຟ້າ ຕິດພັນກັບຍຸດທະສາດພັດທະນາພະລັງງານໄຟຟ້າ ແລະ ການພິຈາລະນາໂຄງການລົງ ທຶນ ຜ່ານກົນໄກກອງປະຊຸມນາຍົກ-ຮອງນາຍົກລັດຖະມົນຕີ ແລະ ກອງປະຊຸມຂອງຄະນະກໍາມະການສົ່ງເສີມ ແລະ ຄຸ້ມຄອງການລົງທຶນ ຂັ້ນສູນກາງ ລວມທັງໝົດຫຼາຍກວ່າ 11 ວຽກງານ ແລະ ໂຄງການ. ພ້ອມກັນນີ້, ກໍໄດ້ພິຈາລະນາ ແລະ ອອກນິຕິກໍາລຸ່ມກົດໝາຍຂອງລັດຖະບານ ຊຶ່ງລວມມີດໍາລັດ, ຂໍ້ຕົກລົງ ແລະ ແຈ້ງການລວມທັງໝົດ 251 ສະບັບ.
4. ໄດ້ເຄື່ອນໄຫວວຽກງານພາຍໃນ ທີ່ສໍາຄັນ ເປັນຕົ້ນແມ່ນ ດຳເນີນກອງປະຊຸມສະຫຼຸບວຽກງານ ປະຈຳປີ 2018 ແລະ ທິດທາງ ປີ 2019 ຂອງຫຼາຍຂະແໜງການເຊັ່ນ: ຂະແໜງສາທາລະນະສຸກ, ຂະແໜງພາຍໃນ, ຂະແໜງຊັບພະຍາກອນທໍາມະຊາດ ແລະ ສິ່ງ ແວດລ້ອມ, ຂະແໜງກະສິກໍາ ແລະ ປ່າໄມ້ ແລະ ອື່ນໆ. ພ້ອມກັນນີ້ ກໍໄດ້ເຄື່ອນໄຫວວຽກງານຕ່າງປະເທດທີ່ສໍາຄັນຄື: ຕ້ອນຮັບການມາຢ້ຽມຢາມຢ່າງເປັນທາງການ ຂອງທ່ານ ຫວງຽນ ຟູ ຈ້ອງ ເລຂາທິການໃຫຍ່ພັກຄອມມູນິດຫວຽດນາມ, ປະທານປະເທດ ແຫ່ງ ສສ ຫວຽດ ນາມ ແລະ ເຄື່ອນໄຫວຢ້ຽມຢາມ ປະເທດຮົງກາລີ ແລະ ເຢຍລະມັນ ຢ່າງເປັນທາງການຂອງທ່ານ ນາຍົກລັດຖະມົນຕີ.
ສໍາລັບວຽກງານຈຸດສຸມ ໃນເດືອນເມສາ 2019, ກອງປະຊຸມໄດ້ເປັນເອກະພາບສູງ ສຸມໃສ່ຈັດຕັ້ງປະຕິບັດວຽກງານ ດັ່ງນີ້:
1. ຂົງເຂດປ້ອງກັນຊາດ-ປ້ອງກັນຄວາມສະຫງົບ: ສືບຕໍ່ເພີ່ມທະວີຄວາມເອົາໃຈໃສ່ຕໍ່ວຽກງານຮັກສາຄວາມສະຫງົບ, ຄວາມເປັນລະບຽບຮຽບຮ້ອຍໃນສັງຄົມ ໂດຍເອົາໃຈໃສ່ການແກ້ໄຂປະກົດການຫຍໍ້ທໍ້ຕ່າງໆທີ່ຍັງເກີດຂຶ້ນຢ່າງຕໍ່ເນື່ອງ ໃຫ້ຫຼຸດລົງເທືອລະກ້າວ, ຄົ້ນຄວ້າກໍານົດມາດຕະການທີ່ຊັດເຈນໃນການແກ້ໄຂບັນຫາຕ່າງໆ ເປັນຕົ້ນແມ່ນອຸບັດເຫດຕາມທ້ອງຖະໜົນ, ການຂີ້ລັກງັດແງະ, ປຸ້ນຈີ້ຊິ້ງຊັບ, ການຄ້າຂາຍ ແລະ ເສບຢາເສບຕິດ, ການມົ້ວສຸມຂີ່ລົດກວນເມືອງ, ອັກຄີໄພ, ການບິດເບືອນຄວາມຈິງຂອງສື່ອອນລາຍ ແລະ ອື່ນໆ. ຕ້ອງຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ຄວາມປອດໄພທາງດ້ານຊີວິດ ແລະ ຊັບສິນ ໃນໄລຍະບຸນປີໃໝ່ລາວ.
2. ຂົງເຂດເສດຖະກິດ: ສຸມໃສ່ກະຕຸກຊຸກຍູ້ການເກັບລາຍຮັບ ແລະ ປະຕິບັດລາຍຈ່າຍງົບປະມານໃນໄຕມາດທີ 2 ໃຫ້ໄດ້ຕາມແຜນທີ່ໄດ້ກໍານົດໄວ້ ໂດຍເຂັ້ມງວດ-ເຂັ້ມງານໃນການຈັດຕັ້ງປະຕິບັດບັນດາມາດຕະການທີ່ມີແລ້ວ; ສືບຕໍ່ຄຸ້ມຄອງອັດຕາແລກປ່ຽນໃຫ້ມີສະຖຽນລະພາບ ແລະ ເໜັງຕີງຢູ່ໃນຂອບທີ່ໄດ້ກໍານົດໄວ້; ປະສານສົມທົບ ແລະ ຈັດສັນທຶນໃສ່ໂຄງການລົງທຶນຂອງລັດປະຈໍາປີ 2019 ຂອງແຕ່ລະຂະແໜງການ ແລະ ທ້ອງຖິ່ນໃຫ້ສໍາເລັດໄວ ເພື່ອໃຫ້ສາມາດຈັດຕັ້ງປະຕິບັດໂຄງການໃນແຜນໃຫ້ທັນຕາມແຜນການ; ສືບຕໍ່ເອົາໃຈໃສ່ຈັດຕັ້ງປະຕິບັດ ມະຕິກອງປະຊຸມລັດຖະບານ ໃນເດືອນກຸມພາ ກ່ຽວກັບການແກ້ໄຂຂອດອຸດຕັນຄວາມສະດວກໃນການດໍາເນີນທຸລະກິດ ທີ່ຕິດພັນກັບ 10 ຕົວຊີ້ວັດໃຫ້ເປັນຮູບປະທໍາໄວຂຶ້ນ; ຊຸກຍູ້ການຈັດຕັ້ງປະຕິບັດນະໂຍບາຍ ແລະ ແຜນພັດທະນາ SME ລວມທັງການເປີດສູນບໍລິການວິສາຫະກິດຂະໜາດນ້ອຍ ແລະ ກາງ ໃຫ້ສໍາເລັດໄວ; ສືບຕໍ່ເອົາໃຈໃສ່ຊຸກຍູ້ການຜະລິດລະດູແລ້ງ ໂດຍສົ່ງພະນັກງານວິຊາການໄປຊ່ວຍປະຊາຊົນ ແລະ ຜູ້ປະກອບການທາງດ້ານເຕັກນິກ ແລະ ໃຫ້ຄໍາແນະນໍາ ທີ່ຈໍາເປັນເພື່ອຍູ້ການຜະລິດ ແລະ ການສົ່ງອອກໃຫ້ຫຼາຍຂຶ້ນ; ສືບຕໍ່ປັບປຸງຂອດຂັ້ນ ແລະ ອໍານວຍຄວາມສະດວກໃຫ້ແກ່ການດຶງດູດນັກທ່ອງທ່ຽວຕ່າງປະເທດ ໂດຍສະເພາະ ນັກທ່ອງທ່ຽວຈີນ ທີ່ຈະເຂົ້າມາທ່ອງທ່ຽວ ໃຫ້ໄດ້ຫຼາຍຂຶ້ນ ເພື່ອນໍາເມັດເງິນເຂົ້າມາກະຕຸ້ນເສດຖະກິດຂອງປະເທດ, ສືບຕໍ່ຕິດຕາມ, ຊຸກຍູ້ການຈັດຕັ້ງປະຕິບັດໂຄງການທາງລົດໄຟລາວ-ຈີນ ເປັນຕົ້ນແມ່ນການຊົດເຊີຍໃຫ້ປະຊາຊົນທີ່ຖືກຜົນກະທົບຈາກໂຄງການໃຫ້ໄວ ເພື່ອປ້ອງກັນບໍ່ໃຫ້ເກີດຫາງສຽງ ແລະ ສ້າງຜົນກະທົບຕໍ່ການຈັດຕັ້ງປະຕິບັດໂຄງການ.
3. ຂົງເຂດວັດທະນະທໍາ-ສັງຄົມ: ເອົາໃຈໃສ່ວຽກງານກວດກາຢ່າງເຂັ້ມງວດການນໍາເຂົ້າສິນຄ້າອຸປະໂພກ-ບໍລິໂພກ ທີ່ມີຄວາມສ່ຽງຕໍ່ສຸຂະພາບຂອງປະຊາຊົນ ເປັນຕົ້ນແມ່ນການນໍາເຂົ້າສັດ, ພືດຜັກ, ໝາກໄມ້, ຢາປົວພະຍາດ, ເຄື່ອງສໍາອາງ ແລະ ສິນຄ້າປະເພດອື່ນໆ ທີ່ມີຄວາມສ່ຽງ; ສືບຕໍ່ຈັດສັນແບ່ງປັນ ແລະ ແຈກຢາຍເຄື່ອງຊ່ວຍເຫຼືອທີ່ຈໍາເປັນໃຫ້ແກ່ປະຊາຊົນທີ່ໄດ້ຮັບຜົນກະທົບຕໍ່ໄພພິບັດຢູ່ເມືອງສະໜາມໄຊ, ແຂວງອັດຕະປື ຕາມແຈ້ງການເລກທີ 302/ຫສນຍ, ລົງວັນທີ 20 ກຸມພາ 2019 ທີ່ລັດຖະບານໄດ້ຊີ້ນໍາ, ສືບຕໍ່ຕິດຕາມຢ່າງໃກ້ຊິດກ່ຽວກັບການລະບາດພະຍາດຕ່າງໆ ເປັນຕົ້ນໄຂ້ຍຸງ, ໄຂ້ຫວັດ, ພະຍາດຈາກສັດ ແລະ ອື່ນໆ ທີ່ອາດເກີດໃນໄລຍະລະດູຮ້ອນ ແລະ ໄລຍະການປ່ຽນແປງດິນຟ້າອາກາດ.
4. ຂົງເຂດສິ່ງແວດລ້ອມ: ໃຫ້ຕິດຕາມ, ກວດກາ ແລະ ເກືອດຫ້າມການຖາງປ່າ ແລະ ຈູດສິ່ງເສດເຫຼືອ ເພື່ອປ້ອງກັນໄຟໄໝປ່າ ແລະ ສ້າງມົນລະພິດທາງອາກາດ ຄືເດືອນຜ່ານມາ, ໃຫ້ຕິດຕາມເຝົ້າລະວັງສະ ພາບການປ່ຽນແປງດິນຟ້າອາ ກາດຢ່າງເປັນປົກກະຕິ ແລະ ມີການແຈ້ງເຕືອນ ແລະ ແນະນໍາປະຊາຊົນເຖິງຄວາມສ່ຽງ, ວິທີປ້ອງກັນ ແລະ ການແກ້ໄຂຢ່າງຈະແຈ້ງ ແລະ ທັນການ.
5.ຂົງເຂດປົກຄອງ ແລະ ຍຸຕິທໍາ: ສືບຕໍ່ປັບປຸງບັນດາກົດໝາຍ ທີ່ໄດ້ຮັບຮອງໃນກອງ ປະຊຸມລັດຖະບານ ເທື່ອນີ້ ຈໍານວນ 5 ສະບັບ ທີ່ຈະນໍາໄປພິ ຈາລະນາໃນກອງປະຊຸມສະ ພາແຫ່ງຊາດ ເທື່ອທີ 7 ໃຫ້ຄົບຖ້ວນ, ຮັດກຸມ ແລະ ຖ່ວງທັນຕາມກໍານົດເວລາ, ພ້ອມທັງສືບຕໍ່ສ້າງນິຕິກໍາລຸ່ມກົດໝາຍທີ່ເລັ່ງດ່ວນໃນຂົງເຂດຕ່າງໆໃຫ້ສໍາເລັດຕາມແຜນການ; ສືບຕໍ່ປັບປຸງກົນໄກປະສານງານ ແລະ ປະສານສົມທົບລະຫວ່າງຂະແໜງຍຸຕິທຳ, ສານ, ໄອຍະການ ແລະ ປ້ອງກັນຄວາມສະຫງົບ ເພື່ອສ້າງສະພາບແວດລ້ອມ, ຄວາມເຊື່ອໝັ້ນ ແລະ ຄວາມສັດທາຂອງປະຊາຊົນ ໃນການດຳເນີນຂະບວນການຍຸຕິທຳຕາມທິດ ສ້າງລັດທີ່ປົກຄອງດ້ວຍກົດ ໝາຍ, ຊອກຫາວິທີການ,ມາດ ຕະການຈັດຕັ້ງປະຕິບັດຄຳຕັດ ສິນຂອງສານ ທີ່ມີຜົນສັກສິດທາງດ້ານກົດໝາຍ ໃຫ້ເຂັ້ມງວດ, ມີປະສິດທິຜົນ; ສືບຕໍ່ປະສານສົມທົບ ແລະ ແກ້ໄຂຄໍາສະເໜີຂອງປະຊາຊົນຜ່ານສາຍດ່ວນຂອງລັດຖະບານ, ຂະແໜງຕ່າງໆ ແລະ ສື່ສັງຄົມອອນລາຍ ໃຫ້ວ່ອງໄວ ແລະ ແທດຕົວຈິງ; ສືບຕໍ່ຕິດຕາມສະພາບການລັກລອບຕັດໄມ້ ແລະ ຂຸດຄົ້ນຊັບພະຍາກອນທໍາມະຊາດ ທີ່ຜິດກົດໝາຍຢ່າງເຂັ້ມງວດ ໃຫ້ກວດກາແກ້ໄຂການສ່ອງແສງລາຍງານຈາກປະຊາຊົນກ່ຽວກັບການກະທໍາຜິດດັ່ງກ່າວດ້ວຍຄວາມເອົາໃຈໃສ່ ແລະ ວ່ອງໄວ, ກໍ ລະນີພົບເຫັນການກະທໍາຜິດ ກໍໃຫ້ປະຕິບັດມາດຕະການຢ່າງເຂັ້ມງວດຕາມກົດໝາຍ; ເພີ່ມຄວາມຮັບຜິດຊອບຂອງຄະນະນຳຂອງຂະແໜງການ ແລະ ອົງການປົກຄອງທ້ອງຖິ່ນໃນການແກ້ໄຂບັນຫາພົ້ນເດັ່ນຕ່າງໆ ທີ່ເກີດຂຶ້ນໃນເດືອນຜ່ານມາ ເປັນຕົ້ນແມ່ນການນຳເຂົ້າຊີ້ນໝູ ທີ່ເປັນພະຍາດ ຢູ່ຕາມດ່ານຊາຍແດນ, ການປະພຶດທີ່ບໍ່ເໝາະສົມຂອງເຈົ້າໜ້າທີ່, ພະນັກງານລັດ ແລະ ອື່ນໆ; ຄົ້ນຄວ້າ ແລະ ແຈ້ງການແນະນໍາກ່ຽວກັບການສະ ເຫຼີມສະຫຼອງປີໃໝ່ລາວ ບົນພື້ນຖານປະຢັດມັດທະຍັດ ຈໍາກັດໄດ້ການສວຍໂອກາດຂຶ້ນລາຄາສິນຄ້າ, ນໍາເຂົ້າສິນຄ້າບໍ່ຖືກລະບຽບການ, ບັນດາຜົນກະທົບຕໍ່ກຸ່ມຜູ້ຜະລິດ ແລະ ຄ້າຂາຍໝູຢູ່ພາຍໃນ ເພາະເກີດມີປະກົດການແຕກຕື່ນຢ້ານກົວ ຍ້ອນບັນຫາພະຍາດອະຫິວາໝູ ຢູ່ປະເທດໃກ້ຄຽງ ແລະ ສາມາດຮັກສາສົ່ງເສີມວັດທະນະທໍາ ແລະ ຮີດຄອງປະເພນີ ອັນດີງາມຂອງຊາດ.
6. ຂົງເຂດການຕ່າງປະ ເທດ: ສືບຕໍ່ຕິດຕາມຢ່າງໃກ້ຊິດສະພາບການພາກພື້ນ ແລະ ສາກົນ ໂດຍມີການວິເຄາະວິໄຈເລິກເຊິ່ງກ່ຽວກັບຄວາມສ່ຽງ ແລະ ທ່າອ່ຽງຜົນກະທົບທາງດ້ານການເມືອງ, ເສດຖະກິດ ແລະ ສັງຄົມ ທີ່ອາດມີຕໍ່ປະເທດເຮົາ, ທັງຄົ້ນຄວ້າກໍານົດທັດສະນະ ແລະ ນໍາໃຊ້ໂອກາດ ເພື່ອຍາດແຍ່ງເອົາການສະໜັບສະໜູນ, ຮ່ວມມື ແລະ ການຊ່ວຍເຫຼືອຈາກເພື່ອນມິດສາກົນ; ສືບຕໍ່ກະກຽມໃຫ້ແກ່ການເຄື່ອນໄຫວວຽກງານຕ່າງປະເທດຂອງການນໍາພັກ-ລັດ ເປັນຕົ້ນແມ່ນການກະກຽມໃຫ້ແກ່ການໄປຢ້ຽມຢາມ ແລະ ເຂົ້າຮ່ວມກອງປະຊຸມ ໜຶ່ງແລວ ໜຶ່ງເສັ້ນທາງ ທີ່ ສປ ຈີນ ຂອງປະທານປະເທດ ແລະ ການເຂົ້າຮ່ວມກອງປະຊຸມເວທີປຶກສາຫາລືໂປອ່າວ ປະຈໍາປີ 2019 ທີ່ ສປ ຈີນຂອງນາຍົກລັດຖະມົນຕີ .
7. ເພື່ອຈັດຕັ້ງປະຕິບັດວຽກງານຈຸດສຸມ ຂ້າງເທິງນີ້ໃຫ້ມີປະສິດທິຜົນ, ຂໍມອບໃຫ້ຫ້ອງວ່າການສໍານັກງານນາຍົກລັດຖະມົນຕີ ຜັນຂະ ຫຍາຍມະຕິກອງປະຊຸມລັດຖະບານໃນຄັ້ງນີ້ ຢ່າງລະອຽດ ເພື່ອມອບຄວາມຮັບຜິດຊອບໃຫ້ຂະແໜງການກ່ຽວຂ້ອງ ແລະ ທ້ອງຖິ່ນຕ່າງໆ ໄປຈັດຕັ້ງປະຕິບັດໃຫ້ທັນເວລາ ແລະ ມີປະສິດທິຜົນສູງ.
    ໃນໂອກາດນີ້, ລັດຖະບານ ຮຽກຮ້ອງໃຫ້ພະນັກງານ, ສະມາຊິກພັກ, ລັດຖະກອນ, ທະຫານ, ຕໍາຫຼວດ, ນັກຮຽນ, ນັກສຶກສາ, ກໍາມະກອນ, ນັກທຸລະກິດທັງພາກລັດ ແລະ ເອກະຊົນ, ບັນດາຊັ້ນຄົນ ແລະ ປະຊາຊົນລາວບັນດາເຜົ່າ ຈົ່ງຍົກສູງນໍ້າໃຈເປັນເຈົ້າປະເທດຊາດ, ຕັ້ງໜ້າປະຕິບັດສິດ ແລະ ພັນທະຂອງຕົນໃຫ້ຄົບຖ້ວນ ຕາມທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ, ເພີ່ມທະວີຄວາມສາມັກຄີເປັນປຶກແຜ່ນ ໃນທົ່ວວົງສາຄະ ນະຍາດແຫ່ງຊາດ, ຕັ້ງໜ້າປະຕິບັດໜ້າທີ່ປົກປັກຮັກສາ ແລະ ສ້າງສາພັດທະນາປະເທດຊາດ ຕາມແນວທາງປ່ຽນແປງໃໝ່ຮອບດ້ານ ທີ່ມີຫຼັກການຂອງພັກເຮົາ, ຍົກສູງສະຕິລະວັງຕົວ, ເດັດດ່ຽວສະກັດກັ້ນ ແລະ ຕ້ານກົນອຸບາຍແບ່ງແຍກ, ການໃສ່ຮ້າຍປ້າຍສີຂອງພວກຄົນທີ່ບໍ່ຫວັງດີ ຢູ່ພາຍໃນ ແລະ ຕ່າງປະເທດ.