ຄຕພ ຫວນຄືນມູນເຊື້ອຂອງພັກ ຄົບຮອບ 64 ປີ


...

22.03.2019 7:59     

   ຄະນະພົວພັນຕ່າງປະ ເທດສູນກາງພັກ (ຄຕພ) ໄດ້ຈັດພິທີປາຖະກະຖາ ເພື່ອຫວນຄືນມູນເຊື້ອວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 64 ປີ ແລະ ວັນຄຽດແຄ້ນຂອງປະຊາຊົນລາວ-ວັນນັກຮົບເສຍອົງຄະ ແລະ ເສຍສະຫຼະຊີວິດ ເພື່ອປະເທດຊາດ 21 ມີນາ.
ພິທີດັ່ງກ່າວ ໄດ້ຈັດຂຶ້ນໃນວັນທີ 21 ມີນານີ້ ທີ່ ຄຕພ ໃຫ້ກຽດປາຖະກະຖາໂດຍ ສະຫາຍ ນາງ ສູນທອນ ໄຊຍະຈັກ, ກໍາມະການສູນກາງພັກ, ເລຂາຄະນະພັກ, ຫົວໜ້າຄະນະພົວພັນຕ່າງປະເທດ ສູນກາງພັກ, ມີບັນດາສະຫາຍໃນຄະນະພັກ, ຕະຫຼອດຮອດພະນັກງານວິຊາການເຂົ້າຮ່ວມຮັບຟັງ.
    ການປາຖະກະຖາໃນ ຄັ້ງນີ້ ສະຫາຍ ຫົວໜ້າຄະ ນະພົວພັນຕ່າງປະເທດ ສູນກາງພັກ, ໄດ້ຍົກໃຫ້ເຫັນປະ ຫວັດສາດ ແຫ່ງການກຳເນີດເຕີບໃຫຍ່ຂະຫຍາຍຕົວຂອງພັກ ປະຊາຊົນລາວ ໃນເມື່ອກ່ອນ, ກໍຄືພັກປະຊາຊົນປະຕິວັດລາວ ໃນປັດຈຸບັນ ແລະ ບັນດາຜົນງານອັນໃຫຍ່ຫຼວງ ໃນການຊີ້ນຳ, ນຳພາ, ທີ່ສະຫຼາດສ່ອງໃສຂອງພັກ ໃນຂະບວນການຕໍ່ສູ້ເພື່ອຍາດເອົາເອກະລາດແຫ່ງຊາດໃນເມື່ອກ່ອນ ຈົນສາມາດຍາດເອົາໄຊຊະນະຢ່າງສົມບູນ ໃນປີ 1975.
    ຕະຫຼອດ 40 ກວ່າປີ ຜ່ານມາ ພັກໄດ້ນຳພາປວງຊົນລາວທັງຊາດປົກປັກຮັກ ສາ ແລະ ສ້າງສາປະເທດຊາດ ເຮັດໃຫ້ປະເທດຊາດ ມີສະຖຽນລະພາບທາງການ ເມືອງ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ, ຊີ ວິດການເປັນຢູ່ຂອງປະຊາຊົນ ໄດ້ຮັບການປັບປຸງດີຂຶ້ນເທື່ອລະກ້າວ, ບົດບາດຂອງພັກ, ລັດ ສປປ ລາວ ໄດ້ຮັບການເຊີດຊູນັບມື້ສູງຂຶ້ນ ໃນເວທີພາກພື້ນ ແລະ ສາກົນ.
    ຈາກນັ້ນ ສະຫາຍ ຫົວໜ້າຄະນະພົວພັນຕ່າງປະເທດສູນກາງພັກ, ໄດ້ຫວນຄືນເຫດ ການປະຫວັດສາດ ແຫ່ງການຕໍ່ສູ້ຢ່າງພິລະອາດຫານ ຂອງນັກຮົບປະຕິວັດ ແລະ ປະຊາຊົນລາວ ໃນບັ້ນຮົບປ້ອງກັນຕົວເມືອງ ທ່າແຂກ ຈາກພວກລ່າ ເມືອງຂຶ້ນຝຣັ່ງຜູ້ຮຸກຮານ ໃນ ວັນທີ 21 ມີນາ 1946 ຊຶ່ງໄດ້ກາຍເປັນກະແສຟອງປຸກລະ ດົມນ້ຳໃຈຮັກຊາດ, ຄຽດແຄ້ນສັດຕູ ຂອງປະຊາຊົນລາວບັນດາເຜົ່າ ພ້ອມກັນລຸກຮື້ຂຶ້ນຢ່າງເປັນຂະບວນ ຕໍ່ສູ້ຕ້ານການຮຸກຮານ ຂອງພວກລ່າເມືອງຂຶ້ນແບບເກົ່າ.
    ການປາຖະກະຖາໃນຄັ້ງນີ້ ໄດ້ເຮັດໃຫ້ສະມາຊິກພັກ, ພະນັກງານ ຄະນະພົວພັນຕ່າງປະເທດ ສູນກາງພັກ, ເຂົ້າໃຈໄດ້ເລິກເຊິ່ງຕື່ມກ່ຽວກັບ ວິລະກຳອັນລ້ຳເລີດ, ທາດແທ້ ແລະ ອຸດົມການຂອງພັກ ປປ ລາວ ຕະຫຼອດໄລຍະ 60 ກວ່າປີຜ່ານມາ ແລະ ເຫັນໄດ້ການປະກອບສ່ວນ ຂອງນັກຮົບປະຕິວັດ ແລະ ປະຊາຊົນລາວ ໃນການຕໍ່ສູ້ຢ່າງພິລະອາດຫານຕ້ານພວກຮຸກຮານຕ່າງຊາດ ເພື່ອຍາດເອົາເອກະລາດແຫ່ງຊາດມາໃຫ້ປະຊາຊົນລາວເຮົາ.
(ພາບ-ຂ່າວ: ບຸນຕອມ)