ກະຊວງ ຖວທ ປາຖະກະຖາວັນສ້າງຕັ້ງພັກ


...

25.03.2019 8:53     

   ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ຈັດພິທີປາຖະກະຖາວັນສ້າງຕັ້ງພັກ ຄົບຮອບ 64ປີ (22 ມີນາ 1955-22 ມີນາ 2019) ຂຶ້ນໃນວັນທີ 22 ມີນາຜ່ານມາ ທີ່ຫໍວັດທະນະທໍາແຫ່ງຊາດ ໂດຍໃຫ້ກຽດປາຖະກະຖາ ແລະ ເປັນປະທານຂອງສະ ຫາຍ ບໍ່ແສງຄໍາ ວົງດາລາ ກຳມະການສູນກາງພັກ ເລຂາຄະນະພັກລັດຖະມົນຕີກະຊວງ ຖວທ, ມີບັນດາສະຫາຍ ຮອງລັດຖະມົນຕີ, ຫົວໜ້າຫ້ອງການ,ຫົວໜ້າກົມ,ຮອງກົມ,ພະນັກງານຫຼັກແຫຼ່ງ ພ້ອມດ້ວຍສະມາຊິກພັກເຂົ້າຮ່ວມຮັບຟັງຢ່າງພ້ອມພຽງ. ຈຸດປະສົງຂອງການ ປາຖະກະຖາຄັ້ງນີ້ ເພື່ອເປັນການຈາລຶກຄຸນງາມຄວາມດີ, ຄວາມອົງອາດກ້າຫານອັນສະຫຼາດສ່ອງໃສ, ມູນເຊື້ອທີ່ສະຫງ່າອົງອາດຂອງພັກ, ຜົນສໍາເລັດແຫ່ງການຊີ້ນໍາ-ນໍາພາຂອງພັກ, ການເສີມຂະຫຍາຍມູນເຊື້ອຂອງພັກປະຊາຊົນປະຕິວັດລາວໃນພາລະກິດປົກປັກຮັກສາ ແລະ ສ້າງສາປະເທດຊາດ; ຊຶ່ງທ່ານ ບໍ່ແສງຄໍາ ວົງດາລາ ໄດ້ຍົກໃຫ້ຮູ້ໂດຍຫຍໍ້ວ່າ: ຊາດລາວເປັນຊາດໜຶ່ງ ທີ່ມີປະຫວັດສາດຄວາມເປັນມາອັນຍາວນານ, ມີມູນເຊື້ອການຕໍ່ສູ້ຕີເອົາຊະນະກັບຈັກກະພັດຕ່າງດ້າວຜູ້ຮຸກຮານ,ມີມູນເຊື້ອໃນການປົກປັກຮັກສາ ແລະ ສ້າງສາພັດທະນາປະເທດຊາດ. ປີ 1955 ຕໍ່ໜ້າຄວາມຮຽກຮ້ອງຕ້ອງການໃໝ່ຂອງການປະຕິວັດ ໂດຍປະຕິບັດຕາມມະຕິຂອງກອງປະຊຸມໃຫຍ່ ຄັ້ງທີ 2 ຂອງພັກກອມມູນິດອິນດູຈີນ, ບັນດານັກກອມມູນິດລາວ ພາຍຫຼັງທີ່ໄດ້ກະກຽມມາໄດ້ໄລຍະໜຶ່ງ ກໍໄດ້ເປີດກອງປະຊຸມໃຫຍ່ຜູ້ແທນທົ່ວປະເທດ ສ້າງຕັ້ງພັກປະຕິວັດຂອງຕົນຂຶ້ນ ໃນວັນທີ 22 ມີນາ 1955. ນັບແຕ່ປີ 1975 ເປັນຕົ້ນມາ ສປປ ລາວ ໄດ້ກ້າວເຂົ້າສູ່ໄລຍະໃໝ່ຂອງການປະຕິວັດ, ພັກປະຊາຊົນ ປະຕິວັດລາວ ໄດ້ກາຍເປັນພັກກໍາອໍານາດ ຊຶ່ງມີລັດປະຊາທິປະໄຕເປັນເຄື່ອງມືອັນແຫຼມຄົມ ເພື່ອຄຸ້ມຄອງສັງ ຄົມ ແລະ ວຽກງານອື່ນໆ. ໃນພິທີ ນອກຈາກຮັບຟັງປາຖະກະຖາວັນສ້າງຕັ້ງພັກແລ້ວ, ຍັງໄດ້ຈັດໃຫ້ມີການມອບ-ຮັບ ໃບຢັ້ງຢືນ ໜ່ວຍພັກປອດໃສ, ແຂັ້ມແຂງ, ໜັກແໜ້ນ ປະຈໍາປີ 2018 ໃຫ້ 14 ໜ່ວຍພັກອ້ອມຂ້າງກະຊວງ ແລະ ມອບບັດໃຫ້ສະມາຊິກພັກສົມບູນຈໍານວນ 24 ສະຫາຍ. (ຂ່າວ-ພາບ: ແສງຈັນ)