ທ່ານ ລຽນ ທີແກ້ວ ເນັ້ນຫຼາຍບັນຫາຕໍ່ວຽກງານກວດກາ ກະສິກຳ ແລະ ປ່າໄມ້


...

25.03.2019 8:54     

   ກອງປະຊຸມສະຫຼຸບວຽກງານກວດກາຂອງຂະແໜງກະ ສິກຳ ແລະ ປ່າໄມ້ ທົ່ວປະເທດ ປະຈໍາປີ 2018 ໄດ້ປິດລົງໃນວັນທີ 22 ມີນາຜ່ານມາ ທີ່ສະຖາບັນຄົ້ນຄວ້າກະສິກຳ-ປ່າໄມ້ ແລະ ພັດທະນາຊົນນະບົດ ໂດຍການເປັນປະທານຂອງທ່ານ ລຽນ ທີແກ້ວ ກໍາມະການສູນກາງພັກ ເລຂາຄະນະພັກ ລັດຖະມົນຕີ ກະຊວງກະສິກໍາ ແລະ ປ່າໄມ້ (ກປ), ມີພາກສ່ວນກ່ຽວຂ້ອງ ເຂົ້າຮ່ວມ. ໃນໂອກາດປິດກອງປະ ຊຸມຄັ້ງນີ້ ທ່ານ ລຽນ ທີແກ້ວ ໄດ້ມີຄຳເຫັນບາງຕອນວ່າ: ຜົນງານທີ່ຂະແໜງກວດກາຍາດມາໄດ້ ເມື່ອທຽບໃສ່ຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ຍັງມີຂໍ້ຄົງຄ້າງຫຼາຍອັນທີ່ຕ້ອງໄດ້ແກ້ໄຂດັ່ງທີ່ໄດ້ສະແດງອອກໃນຮ່າງບົດສະຫຼຸບລາຍງານ 1 ປີຜ່ານມາຂອງວຽກງານກວດກາເຫັນວ່າລະອຽດ ແລະ ກົງໄປກົງມາແລ້ວ, ສຳລັບທິດທາງ, ໜ້າທີ່ຕົ້ນຕໍໃນຊຸມປີຕໍ່ໜ້າ ແມ່ນເຫັນດີເປັນເອກະພາບຕາມແນວທາງນະໂຍບາຍຂອງພັກ ບົນຈິດໃຈເພິ່ງຕົນເອງສ້າງຄວາມເຂັ້ມແຂງດ້ວຍຕົນເອງ ເຊີດຊູບົດບາດການນຳພາຂອງພັກ ຕາມຫຼັກການທີ່ວ່າ: ມີການກວດກາ ຈຶ່ງມີການນຳພາ, ເຫດເກີດຂຶ້ນບ່ອນໃດ ແມ່ນບ່ອນນັ້ນເປັນເຈົ້າການແກ້ໄຂ, ການກວດກາແມ່ນການສະກັດກັ້ນ ບໍ່ໃຫ້ເກີດມີປະກົດການຫຍໍ້ທໍ້, ກວດກາເພື່ອເສີມຂະຫຍາຍດ້ານດີ ແລະ ຈຳກັດດ້ານອ່ອນ ປັບປຸງແກ້ໄຂຂໍ້ຄົງຄ້າງ,ເພື່ອບັນລຸເປົ້າໝາຍ. ທ່ານ ລັດຖະມົນຕີ ກະຊວງກະສິກຳ ແລະ ປ່າໄມ້ ໄດ້ເນັ້ນບາງເນື້ອໃນສຳຄັນດັ່ງນີ້: 1. ຄະນະພັກ, ຄະນະນຳຕ້ອງເຊື່ອມຊຶມ, ກຳແໜ້ນມະຕິ, ຄໍາສັ່ງ, ລະບຽບ, ກົດໝາຍກ່ຽວກັບວຽກງານກວດກາ ແລະ ຜັນຂະຫຍາຍເປັນແຜນການ, ໂຄງການໃຫ້ສອດຄ່ອງກັບວຽກງານຂອງຕົນແລ້ວ ມອບໝາຍຄວາມຮັບຜິດຊອບ ແລະ ຊີ້ນຳຄະນະກວດກາ ໃຫ້ເຄື່ອນໄຫວຕາມພາລະບົດບາດ, ເປັນປົກກະຕິ, ຕໍ່ເນື່ອງ ແລະ ໃຫ້ມີປະສິດທິຜົນ. 2. ຄະນະພັກ, ຄະນະນຳຕ້ອງເຊີດຊູຄວາມຮັບຜິດຊອບຂອງຕົນ ຕໍ່ວຽກງານກວດກາ ໃຫ້ເອົາໃຈໃສ່ສ້າງທຸກເງື່ອນໄຂໃຫ້ຄະນະກວດກາຂອງຕົນໄດ້ເຄື່ອນໄຫວຕາມພາລະບົດບາດ ເອົາວຽກງານກວດກາປົກກະຕິເປັນພື້ນຖານ, ຖືສຳຄັນວຽກງານກວດກາຕາມຄຳສັ່ງ, ຄຳຮ້ອງ, ຄຳສະເໜີ ແລະ ເອົາໃຈໃສ່ແກ້ໄຂຜົນການກວດກາຢ່າງທັນການ, ຖືສໍາຄັນຜົນການກວດກາເປັນໄມ້ຫຼາວັດແທກເຖິງຄຸນທາດການເມືອງ ຂອງສະມາຊິກພັກ, ພະນັກງານແຕ່ລະສະຫາຍ, ເອົາຜົນການກວດກາເປັນພື້ນຖານໃນການຈັດວາງສັບຊ້ອນພະນັກງານ ເຂົ້າໃນຕຳແໜ່ງງານ. 3. ເອົາໃຈໃສ່ຄັດເລືອກ, ຈັດວາງສັບຊ້ອນຜູ້ທີ່ມີຄຸນທາດການເມືອງ, ຄຸນສົມບັດສິນທຳປະຕິວັດ, ຜູ້ທີ່ເປັນແບບຢ່າງມີຄວາມຈູບຈ້າວຫ້າວຫັນມາຮັບຜິດຊອບວຽກງານກວດກາ ຈຶ່ງຈະເຮັດໃຫ້ວຽກງານກວດ ກາຮັບປະກັນທາງຄຸນນະພາບ,ເອົາໃຈໃສ່ສຶກສາອົບຮົມ ການເມືອງແນວຄິດ, ຍົກລະດັບທາງດ້ານທິດສະດີການເມືອງ, ວິຊາສະເພາະວຽກງານກວດກາໃຫ້ແກ່ພະນັກງານກວດກາ. 4. ການກວດກາພັກ ແມ່ນໃຫ້ສຸມໃສ່ກວດກາການຈັດຕັ້ງປະຕິບັດແນວທາງນະໂຍບາຍຂອງພັກ, ການຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ, ມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງກະສິກຳ ແລະ ປ່າໄມ້, ມະຕິກອງປະຊຸມໃຫຍ່ຂັ້ນຕົນ, ກວດກາການຈັດຕັ້ງປະຕິບັດມະຕິ, ຄຳສັ່ງ, ກວດກາການປະຕິບັດກົດລະບຽບຂອງພັກ. 5. ວຽກງານກວດກາລັດ: ເລັ່ງ ກວດກາ 4 ແຜນງານຄື: ຄໍ້າປະກັນສະບຽງອາຫານ, ຜະລິດເປັນສິນຄ້າປົກປັກຮັກສາປ່າໄມ້ ແລະ ພັດທະນາຊົນນະບົດ ໃຫ້ເຫັນວ່າໃນແຕ່ລະແຜນງານໄດ້ປະຕິບັດໜ້າວຽກຫຍັງແດ່, ຢູ່ໃສ, ຜົນສໍາເລັດມີຫຍັງ, ຜົນປະໂຫຍດປະຊາຊົນໄດ້ຮັບມີຫຍັງແດ່, ດ້ານອ່ອນ, ຂໍ້ ຄົງຄ້າງ ເພື່ອຈະແກ້ໄຂມີຈັກຂໍ້, ກວດກາການຈັດຕັ້ງປະຕິບັດພາລະບົດບາດ, ກວດກາຄວາມຮັບຜິດຊອບຂອງແຕ່ລະບຸກຄົນໃນຄະນະນໍາ, ພະນັກງານທີ່ໄດ້ຮັບການມອບໝາຍເຮັດສໍາເລັດຈັກວຽກ, ວຽກໃດບໍ່ສໍາເລັດ ຈະແກ້ໄຂແນວໃດ? ກວດກາການຄຸ້ມຄອງນໍາໃຊ້ງົບປະມານຕ້ອງໄປຕາມແຜນທີ່ໄດ້ກໍານົດໄວ້, ສອດຄ່ອງກັບລະບຽບຂອງການເງິນ, ກວດກາໂຄງການລົງທຶນຂອງລັດເລີ່ມແຕ່ຫົວທີ, ກວດກາການຄຸ້ມຄອງນຳໃຊ້ງົບປະມານການລົງທຶນພາຍໃນ ແລະ ຕ່າງປະເທດ, ການຄຸ້ມຄອງນຳໃຊ້ຊັບສິນ ແລະ ພາຫະນະການປະຕິບັດນະ ໂຍບາຍ, ການປະຕິບັດວິໄນຕໍ່ພະນັກງານ-ລັດຖະກອນ. 6. ວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ ໃຫ້ເອົາໃຈໃສ່ເຜີຍແຜ່ກົດໝາຍ, ນິຕິກໍາຕ່າງໆທີ່ຕິດ ພັນກັບວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ ເພື່ອໃຫ້ພະນັກງານ-ລັດຖະ ກອນຮັບຮູ້, ເຂົ້າໃຈ ແລະ ເຫັນ ໄດ້ພຶດຕິກຳ, ຜົນຮ້າຍ, ໄພອັນ ຕະລາຍຈາກການສໍ້ລາດບັງຫຼວງ ເພື່ອມີການປ້ອງກັນບໍ່ໃຫ້ຕົກເຂົ້າໃນປະກົດການດັ່ງກ່າວ. 7. ວຽກງານຄົ້ນຄ້ວາແກ້ໄຂຄຳຮ້ອງ-ຄຳສະເໜີ: ໃຫ້ເອົາໃຈໃສ່ຄົ້ນຄ້ວາຄຳຮ້ອງ, ຄຳສະເໜີ ພົວພັນພາກສ່ວນໃດ? ແມ່ນມອບໃຫ້ຄະນະພັກ, ຄະນະນຳບ່ອນນັ້ນເປັນຜູ້ຄົ້ນຄ້ວາແກ້ໄຂ, ການແກ້ໄຂຕ້ອງດຳເນີນການເກັບກຳຂໍ້ມູນຫຼັກຖານໃຫ້ຮັດກຸມ ແລະ ດຳເນີນການແກ້ໄຂຕາມລະບຽບ, ກົດ ໝາຍ ການຮ້ອງຟ້ອງ, ຮ້ອງທຸກ, ຫາກຂໍ້ມູນຫຼັກຖານບໍ່ພຽງພໍ, ເປັນການກ່າວໂຄ່ນລົ້ມໂຈມຕີເປັນການໃສ່ຮ້າຍປ້າຍສີສ້າງຄວາມເສື່ອມເສຍຕໍ່ບົດບາດຂອງການຈັດຕັ້ງ ແລະ ບຸກຄົນໃຫ້ດຳເນີນມາດຕະການທາງກົດໝາຍ. (ຂ່າວ: ພູວຽງຄຳ, ພາບ: ສຸກສະຫວັນ)