ເປີດກອງປະຊຸມປ້ອງກັນ ແລະ ຄວບຄຸມໄພພິບັດແຫ່ງຊາດ


...

25.03.2019 8:54     

   ກອງປະຊຸມຄະນະກຳ ມະການປ້ອງກັນ ແລະ ຄວບຄຸມໄພພິບັດແຫ່ງຊາດ (ຄພຊ) ໄດ້ຈັດຂຶ້ນໃນວັນທີ 22 ມີນາຜ່ານມາ ທີ່ເຮືອນຮັບແຂກກະຊວງແຮງງານ ແລະ ສະຫວັດດີການສັງຄົມ (ຮສສ) ໂດຍເປັນກຽດເຂົ້າຮ່ວມ ແລະ ກ່າວເປີດຂອງທ່ານ ຄຳແພງ ໄຊສົມແພງ ລັດຖະມົນຕີກະຊວງ ຮສສ ທັງເປັນປະທານ ຄພຊ, ມີຮອງລັດຖະມົນຕີ, ພາກສ່ວນກ່ຽວຂ້ອງ ແລະ ແຂກຖືກເຊີນເຂົ້າຮ່ວມ. ທ່ານລັດຖະມົນຕີກະຊວງ ຮສສ ໄດ້ກ່າວເປີດກອງປະຊຸມບາງຕອນວ່າ: ພວກເຮົາໄດ້ຮັບຮູ້ນຳກັນຢ່າງພາວະວິໃສແລ້ວວ່າ ຄວາມຮ້າຍແຮງຂອງໄພພິບັດ ທາງທຳມະຊາດ ແລະ ຈາກນ້ຳມືຂອງມະນຸດ ແມ່ນຍັງສືບຕໍ່ເພີ່ມຂຶ້ນ ແລະ ຖີ່ເຂົ້າທຸກໆປີ ຊຶ່ງອາດເນື່ອງມາຈາກສາເຫດການປ່ຽນແປງຂອງດິນຟ້າອາກາດ, ການເພີ່ມຂອງປະຊາກອນ, ການເສື່ອມໂຊມຂອງສະພາບແວດລ້ອມ ແລະ ບັນຫາໂລກຮ້ອນຂຶ້ນ, ຈາກເຫດການດັ່ງກ່າວນີ້ ເຮັດໃຫ້ບັນດາປະເທດໃນໂລກຕ້ອງປະເຊີນກັບບັນຫາໄພພິບັດທຳມະຊາດຕ່າງໆເປັນຕົ້ນ: ນ້ຳຖ້ວມ,ແຜ່ນດິນໄຫວ, ພູເຂົາໄຟລະເບີດ, ລົມພາຍຸ ແລະ ອື່ນໆ, ສົ່ງຜົນກະທົບໂດຍກົງຕໍ່ຊິວິດ ແລະ ຊັບສິນ ທັງຂອງລັດ ແລະ ຂອງປະຊາຊົນ, ເປັນການຖ່ວງດຶງຕໍ່ການພັດທະນາປະເທດຊາດ ແລະ ເຮັດໃຫ້ປະຊາຊົນທຸກຍາກເພີ່ມຂຶ້ນ. ດັ່ງບັນດາທ່ານຮັບຮູ້ນຳກັນແລ້ວວ່າ ໃນປີ 2018 ຢູ່ໃນພາກພື້ນອາຊຽນໄດ້ມີເຫດການໄພພິບັດເກີດຂຶ້ນຈຳນວນ 389 ກວ່າຄັ້ງ, ສົ່ງຜົນກະທົບໂດຍກົງຕໍ່ປະຊາຊົນຈຳນວນ 26 ລ້ານຄົນ, ເສຍຊີວິດ 2.363 ຄົນ, ສູນຫາຍ 947 ຄົນ, ບໍ່ມີທີ່ຢູ່ອາໄສ 1,6 ລ້ານກວ່າຄົນ ແລະ ທີ່ຢູ່ອາໄສເປ່ເພ່ມີຈຳນວນຫຼວງຫຼາຍ. ສຳລັບ ສປປ ລາວ ພວກເຮົາ ໃນປີ 2018 ທີ່ຜ່ານມາ ໄດ້ມີຫຼາຍເຫດການໄພພິບັດເກີດຂຶ້ນເປັນຕົ້ນນ້ຳຖ້ວມ, ລົມພາຍຸ, ໄຟໄໝ້, ສັດຕູພືດທຳລາຍຜົນລະປູກ ແລະ ອື່ນໆ. ສະເພາະແຕ່ໄພພິບັດນ້ຳຖ້ວມ ໃນເດືອນກໍລະກົດ ຫາ ເດືອນພະຈິກ ໄດ້ເກີດຢູ່ທຸກໆແຂວງໃນທົ່ວປະເທດ ຊຶ່ງສົ່ງຜົນກະທົບໂດຍກົງຕໍ່ປະຊາຊົນຈຳນວນ 133.382 ຄອບຄົວ, ມີ 649.493 ຄົນ,ຍິງ 258.120 ຄົນ, ເສຍຊີວິດ ແລະ ສູນຫາຍ 90 ຄົນ, ເຮືອນຖືກກະທົບ ແລະເສຍໝົດຫຼັງມີ 1.800 ກວ່າຫຼັງ, ສ້າງຄວາມເສຍຫາຍຕໍ່ພື້ນຖານໂຄງລ່າງດ້ານກະສິກຳ, ການຄົມມະນາຄົມຂົນສົ່ງ, ໂຮງຮຽນ, ສຸກສາລາ, ລະບົບນ້ຳປະປາ, ໄຟຟ້າ ແລະ ອື່ນໆ, ລວມມູນຄ່າເສຍຫາຍທັງໝົດຫຼາຍກວ່າ 3.167,46 ຕື້ກີບ ແລະ ມີຄວາມຕ້ອງການງົບປະມານເຂົ້າໃນການຟື້ນຟູຫຼັງໄພພິບັດປະມານ 4.423 ຕື້ກີບ. ໃນກອງປະຊຸມ ບັນດາທ່ານຜູ້ແທນທີ່ເຂົ້າຮ່ວມໄດ້ພ້ອມກັນປະກອບຄຳຄິດຄຳເຫັນ, ນຳສະເໜີ ແລະ ແລກປ່ຽນບົດຮຽນ, ປະສົບການໃນວຽກງານກຽມຄວາມພ້ອມຕອບໂຕ້ສຸກເສີນ,ການປ້ອງກັນ,ການຫຼຸດຜ່ອນຄວາມສ່ຽງ ແລະ ການຈັດຕັ້ງປະຕິບັດການຟື້ນຟູຫຼັງໄພພິບັດ ໃສ່ຮ່າງບົດລາຍງານການຈັດຕັ້ງປະຕິບັດວຽກງານປ້ອງກັນ ແລະ ຄວບຄຸມໄພພິບັດໄລຍະປີ 2018 ແລະ ທິດທາງແຜນການປີ 2019. (ຂ່າວ: ບຸນທົງ)