ກະຊວງການຕ່າງປະເທດ ປາຖະກະຖາວັນສ້າງຕັ້ງ ພັກປະຊາຊົນ ປະຕິວັດລາວ ຄົບຮອບ 64 ປີ


...

26.03.2019 9:01     

   ກະຊວງການຕ່າງປະ ເທດໄດ້ຈັດພິທີມອບບັດສະມາຊິກພັກສົມບູນຊຸດທີ VIII ແລະ ປາຖະກະຖາວັນສ້າງຕັ້ງພັກປະຊາຊົນປະຕິວັດລາວຄົບຮອບ 64 ປີ (22/3/1955-22/3/2019) ໂດຍພາຍໃຕ້ການເປັນປະທານຂອງ ສະຫາຍ ສະເຫຼີມໄຊ ກົມມະສິດ ກຳມະການສູນກາງພັກ ເລຂາຄະນະບໍລິຫານງານພັກ ລັດຖະມົນຕີກະຊວງການຕ່າງປະເທດ, ມີບັນດາຄະນະພັກ, ຄະນະນຳ, ສະມາຊິກພັກ, ພະນັກງານ-ລັດຖະກອນອ້ອມຂ້າງກະຊວງເຂົ້າຮ່ວມ. ໃນພິທີ ສະຫາຍ ສະເຫຼີມ ໄຊ ກົມມະສິດ ໄດ້ໃຫ້ກຽດຂຶ້ນມອບບັດໃຫ້ສະມາຊິກພັກສົມບູນຈຳນວນ 49 ສະຫາຍ, ຍິງ 16 ສະຫາຍ, ຈາກນັ້ນສະຫາຍໄດ້ມີຄຳເຫັນໂອ້ລົມຕໍ່ສະມາຊິກພັກສົມບູນຜູ້ທີ່ໄດ້ຮັບບັດໃນຄັ້ງນີ້, ໂດຍສະຫາຍໄດ້ສະແດງຄວາມຍ້ອງຍໍຊົມ ເຊີຍມາຍັງບັນດາຮາກຖານໜ່ວຍພັກທີ່ໄດ້ເອົາໃຈໃສ່ກະຕຸກຊຸກຍູ້ກໍ່ສ້າງສະມາຊິກພັກພາຍໃນໜ່ວຍຂອງຕົນຈົນສາມາດປະຕິບັດໄດ້ຕາມມາດຖານ, ເງື່ອນໄຂຮັບບັດ ແລະ ລວມທັງການຄຸ້ມຄອງຮັກສາ ແລະ ນຳໃຊ້ບັດສະມາຊິກພັກຢ່າງຖືກຕ້ອງ. ໃນໂອກາດດຽວກັນນີ້ ສະຫາຍ ສະເຫຼີມໄຊ ກົມມະສິດ ຍັງໄດ້ປາຖະກະຖາມູນເຊື້ອການກຳເນີດ ແລະ ການເຕີບໃຫຍ່ຂະຫຍາຍຕົວຂອງພັກປະຊາຊົນປະຕິວັດລາວຕະຫຼອດໄລຍະເວລາ 64 ປີຜ່ານມາໂດຍສະຫາຍໄດ້ຍົກໃຫ້ເຫັນມູນເຊື້ອອັນປີຊາສາມາດສະຫຼາດສ່ອງໃສຂອງພັກທີ່ໄດ້ນຳພາກອງທັບ ແລະ ປະຊາຊົນລາວບັນດາເຜົ່າລຸກຂຶ້ນຕໍ່ສູ້ ແລະ ຍາດເອົາເອກະລາດ, ອຳນາດອະທິປະໄຕ ແລະ ຄວາມມີອິດສະຫຼະພາບມາສູ່ປະຊາຊົນລາວບັນດາເຜົ່າຊຶ່ງສະແດງໃຫ້ເຫັນວິວັດທະນາການແຫ່ງການເຕີບໃຫຍ່ ແລະ ຂະຫຍາຍຕົວ, ຜົນງານວິລະກຳອັນລໍ້າເລີດ, ທາດແທ້ມູນເຊື້ອປະຕິວັດອັນອົງອາດກ້າຫານສະຫງ່າງາມຂອງພັກຕະຫຼອດໄລຍະເວລາ 64 ປີຜ່ານມາເພື່ອແນໃສ່ສຶກສາອົບຮົມໃຫ້ສະມາຊິກພັກ-ພະນັກງານ ລັດຖະກອນໃຫ້ຮັບຮູ້ເຂົ້າໃຈຢ່າງເລິກເຊິ່ງພ້ອມກັນນັ້ນເອົາໃຈໃສ່ສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອທາດແທ້ອັນດີງາມຂອງພັກໄວ້ໃຫ້ໝັ້ນຄົງຕະຫຼອດໄປ. ເພື່ອເປັນແກນນຳພາທົ່ວປວງຊົນລາວບັນດາເຜົ່າປົກປັກຮັກສາ ແລະ ພັດທະນາປະເທດຊາດເຮັດໃຫ້ປະຊາຊົນຮັ່ງມີຜາສຸກ ປະເທດຊາດມັ່ງຄັ່ງເຂັ້ມແຂງ ສັງຄົມສາມັກຄີປອງດອງ ປະຊາທິປະໄຕ ຍຸຕິທຳ ແລະ ສີວິໄລ, ສຸດທ້າຍສະຫາຍກໍໄດ້ເນັ້ນໜັກໃຫ້ຄະນະພັກ, ຄະນະນຳ, ສະມາຊິກພັກ-ພະ ນັກງານ ລັດຖະກອນກະຊວງການຕ່າງປະເທດຈົ່ງພ້ອມກັນເອົາໃຈໃສ່ສຶກສາຄົ້ນຄວ້າ, ເຊື່ອມຊຶມ ແລະ ກຳແໜ້ນແນວທາງນະໂຍບາຍປ່ຽນແປງໃໝ່ຂອງພັກ, ຕັ້ງໜ້າຝຶກຝົນຫຼໍ່ຫຼອມຕົນເອງທາງດ້ານແນວຄິດ-ທິດສະດີ ແລະ ວິຊາສະເພາະປະກອບສ່ວນຢ່າງຕັ້ງໜ້າໃນຂະບວນການຈັດຕັ້ງຜັນຂະຫຍາຍເນື້ອໃນຈິດໃຈມະຕິກອງປະຊຸມໃຫຍ່ຄັ້ງທີ X ຂອງພັກ ແລະ ມະຕິກອງປະຊຸມໃຫຍ່ຄັ້ງທີ III ຂອງອົງຄະນະພັກກະຊວງການຕ່າງປະເທດເຂົ້າໃນໜ້າທີ່ການເມືອງໃນວຽກງານທີ່ຕົນຮັບຜິດຊອບດ້ວຍຈິດໃຈບຸກທະລຸຢ່າງຕັ້ງໜ້າ.(ຂ່າວ-ພາບ : ສຸກສາຄອນ)