ອົງການກວດສອບແຫ່ງລັດ ປາຖະກະຖາ2 ວັນປະຫວັດສາດ


...

22.05.2019 9:29     

   ອົງການກວດສອບແຫ່ງລັດ ໄດ້ຈັດພິທີປາຖະກະຖາເລົ່າມູນເຊື້ອວັນຜ່າວົງປິດລ້ອມຂອງກອງພັນທີ 2 ວິລະຊົນທີ່ທົ່ງໄຫຫີນ ຊຽງຂວາງ ຄົບຮອບ 60 ປີ ແລະ ລະນຶກວັນວິລະກຳໂຕນຄຸກຢ່າງມະຫັດສະຈັນ ຂອງບັນດາຜູ້ນຳພັກ ແລະ ແນວລາວຮັກຊາດ ຄົບຮອບ 59 ປີ. ພິທີດັ່ງກ່າວ ໄດ້ຈັດຂຶ້ນໃນວັນທີ 21 ພຶດສະພານີ້ ທີ່ອົງການກວດສອບແຫ່ງລັດ ໃຫ້ກຽດເປັນປະທານ ແລະ ປາຖະກະຖາໂດຍ ທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ, ມີຮອງປະທານອົງການກວດສອບແຫ່ງລັດ, ມີພະນັກງານກ່ຽວຂ້ອງເຂົ້າຮ່ວມ. ທ່ານ ແສງນວນ ໄຊຍະລາດ ໄດ້ຍົກໃຫ້ເຫັນປະຫວັດຄວາມເປັນມາ ຂອງ 2 ວິລະກຳຄື: ວັນທີ 22 ກໍລະກົດ 1958 ຜຸຍ ຊະນະນິກອນ ໄດ້ໂຄ່ນລົ້ມລັດຖະບານປະສົມແຫ່ງຊາດ 2 ຝ່າຍ, ໄດ້ອອກກົດໝາຍຕ້ານກອມມູນິດ, ລຶບລ້າງສັນຍາເຊີແນວ ປີ 1954 ແລະ ສັນຍາວຽງຈັນ ປີ 1957 ດຳເນີນການປາບປາມຂະບວນການປະຕິວັດທົ່ວປະເທດ ແລະ ອອກຄຳສັ່ງໃຫ້ກຳລັງທະຫານປິດລ້ອມປົດອາວຸດກອງພັນທີ 1 ແລະ ທີ 2 ໃນຕົ້ນເດືອນພຶດສະພາ 1959. ວັນທີ 15 - 17 ພຶດສະພາ 1959 ພວກເຂົາໄດ້ສັ່ງກຳລັງຫຼວງ 4 ກອງພັນເຂົ້າມາປິດລ້ອມຄ້າຍກອງພັນທີ 2, ສັ່ງໃຫ້ທະຫານ ວັງປາວ ສະກັດລັດທາງອ້ອມຮອບທົ່ງໄຫຫີນ ເພື່ອບໍ່ໃຫ້ກອງພັນທີ 2 ເລັດລອດອອກໄປໄດ້. ຕໍ່ໜ້າສະພາບສັບສົນຂ້ຽວຂາດ ໃນຄ່ຳຄືນວັນທີ 18 ພຶດສະພາ 1959 ຄະນະພັກ - ຄະນະບັນຊາກອງພັນທີ 2 ພາຍໃຕ້ການຊີ້ນຳຂອງສູນກາງພັກ ໄດ້ໃຊ້ກົນອຸບາຍຫຼອກສັດຕູ ແລະ ແຕ່ລະກົມກອງ ພ້ອມຄອບຄົວພະນັກງານ, ນັກຮົບທັງໝົດ ໄດ້ນຳໃຊ້ຄວາມມືດຖອນທັບໄປທາງທິດຕາເວັນຕົກສ່ຽງໃຕ້ມຸ້ງໜ້າຫາເຂດບ້ານໂຕນ, ນາແຖງ, ໜອງຕິ້ວ ແລ້ວເຂົ້າປ່າໄປຕາມເສັ້ນທາງຫາບ້ານມາຍຢ່າງປິດລັບ. ຕົກມາຮອດເວລາ 7 ໂມງເຊົ້າຂອງວັນທີ 19 ພຶດສະພາ ປີ 1959 ສັດຕູບຸກເຂົ້າປົດອາວຸດກອງພັນທີ 2 ແຕ່ພວກເຂົາຕົກສະເຫງີ້ ເພາະຢູ່ໃນຄ້າຍມີແຕ່ຄວາມມິດງຽບ ແລະ ວ່າງເປົ່າ, ພວກສັດຕູເຈັບແຄ້ນແໜ້ນໃຈ ແລະ ໄດ້ຮີບຮ້ອນໃຫ້ທຸກກຳລັງໄລ່ຕາມຫວັງດັບສູນກອງພັນທີ 2 ພວກເຂົາໄດ້ລະດົມເອົາ 6 ກອງພັນທີ່ຂຶ້ນກັບທະຫານພາກ 2, ເຮືອບິນຊ່ວຍໜູນອ້ອມຮອບທົ່ງໄຫຫີນເພື່ອໄລ່ຕາມ ແຕ່ບໍ່ສາມາດຕາມໄດ້ທັນ. ໃນການເຄື່ອນທັບ 10 ກວ່າວັນ, ກອງພັນທີ 2 ໄດ້ສູ້ຮົບກັບສັດຕູທັງນ້ອຍ ແລະ ໃຫຍ່ 10 ຄັ້ງ ສຸດທ້າຍກອງພັນທີ 2 ພ້ອມກັບ 91 ຄອບຄົວໄດ້ຜ່າວົງປິດລ້ອມທີ່ໜາແໜ້ນຂອງສັດຕູໄປສູ່ເຂດທີ່ໝັ້ນຂອງການປະຕິວັດ ດ້ວຍຄວາມປອດໄພ. ຫຼັງຈາກນັ້ນ, ພວກລັດຖະ ບານຫຸ່ນວຽງຈັນ ກໍ່ບໍ່ລົດລະຄວາມພະຍາຍາມຄວາມຊົ່ວຮ້າຍ ໃນການຫວັງທຳລາຍກອງກຳລັງປະຕິວັດ ແລະ ປະຊາຊົນລາວຜູ້ຮັກຊາດ, ໃນວັນທີ 18 ກໍລະກົດ 1959 ພວກສັດຕູໄດ້ຈັບກຸມຄຸມຂັງບັນດາຜູ້ນຳພັກ ແລະ ແນວລາວຮັກຊາດ 16 ທ່ານ ທີ່ປະຈຳຮ່ວມລັດຖະບານປະສົມ ເຂົ້າຢູ່ທີ່ຄຸກໂພນເຄັງ ແຕ່ຍ້ອນການຊີ້ນຳ ທີ່ສະຫຼາດສ່ອງໃສຂອງສູນກາງພັກ ນຳໂດຍປະທານ ໄກສອນ ພົມວິຫານ ແລະ ຄວາມເກັ່ງກ້າສາມາດຂອງຜູ້ນຳທັງ 16 ທ່ານ ຮອດເວລາ 00 ໂມງ ຂອງວັນທີ 24 ພຶດສະພາ 1960 ຫຼັງຈາກຖືກກັກຂັງ ເກືອບ 300 ວັນ ຜູ້ນຳທັງໝົດກໍສາມາດໂຕນອອກຈາກຄຸກ ແລະ ກັບໄປສູ່ເຂດທີ່ໝັ້ນຢ່າງປອດໄພ ພ້ອມກັບຄະນະຊີ້ນຳສູນກາງພັກສືບຕໍ່ນຳພາພາລະກິດປະຕິວັດຈົນໄດ້ຮັບໄຊຊະນະ. ທ່ານ ແສງນວນ ໄຊຍະລາດ ຍັງໄດ້ຍົກໃຫ້ເຫັນມູນເຊື້ອການຕໍ່ສູ້ຢ່າງພິລະອາດຫານຂອງກອງທັບ ແລະ ປະຊາຊົນລາວ, ມູນເຊື້ອຄວາມເປັນແບບຢ່າງອັນດີງາມ ຊຶ່ງວິລະກຳຜ່າວົງປິດລ້ອມຂອງກອງພັນທີ 2 ທີ່ທົ່ງໄຫຫີນ ຊຽງຂວາງ ແລະ ການໂຕນຄຸກແບບລວມໝູ່ຂອງບັນດາຜູ້ນຳພັກ ແລະ ແນວລາວຮັກຊາດ ຢ່າງມະຫັດສະຈັນ ມີຄວາມສ່ຽງສູງທີ່ສຸດບໍ່ມີຜູ້ໃດຄິດວ່າຈະເປັນໄປໄດ້, ທັງສອງວິລະກຳດັ່ງກ່າວ ເປັນ 2 ວັນປະຫວັດສາດຂອງລາວທີ່ຖືກຈາລຶກໄວ້ໃຫ້ຄົນຮຸ່ນຫຼັງໄດ້ສຶກສາຮຽນຮູ້ຕະຫຼອດໄປ. (ຂ່າວ + ພາບ: ສຸກສະຫວັນ)