ຫ້ອງວ່າການປະທານປະເທດ ເປີດກອງປະຊຸມ ຄົບຄະນະພັກເປີດກວ້າງ ຄັ້ງທີ 7 ສະໄໝທີ I


...

22.05.2019 9:25     

   ຄະນະພັກຫ້ອງວ່າການປະທານປະເທດ ໄດ້ຈັດກອງປະຊຸມຄົບຄະນະພັກເປີດກວ້າງຄັ້ງທີ 7 ສະໄໝທີ I ຂຶ້ນໃນວັນທີ 21 ພຶດສະພານີ້ ທີ່ຫ້ອງປະຊຸມຂອງຫ້ອງວ່າການປະທານປະເທດ, ພາຍໃຕ້ການເປັນປະທານຂອງ ສະຫາຍ ຄໍາເມິງ ພົງທະດີ ກໍາມະການສູນກາງພັກ ເລຂາຄະນະພັກ ລັດຖະມົນຕີ ຫົວໜ້າຫ້ອງວ່າການປະທານປະເທດ, ມີບັນດາຫົວໜ້າກົມ-ຮອງກົມ, ຕະຫຼອດຮອດສະມາຊິກພັກ ແລະ ພາກສ່ວນກ່ຽວຂ້ອງເຂົ້າຮ່ວມ. ສະຫາຍ ເພັດສະໝອນ ພັນທະວົງ ຮອງລັດຖະມົນຕີ ຮອງຫົວໜ້າຫ້ອງວ່າການປະທານປະເທດ ໄດ້ຂຶ້ນຜ່ານບົດສະຫຼຸບຕີລາຄາ ການນໍາພາຂອງຄະນະພັກ, ຊຶ່ງໄດ້ຍົກໃຫ້ເຫັນສະພາບລວມ, ການເຄື່ອນໄຫວຊີ້ນໍາ-ນໍາພາຂອງຄະນະພັກ ນັບແຕ່ກອງປະຊຸມເປີດກວ້າງຄັ້ງທີ 6 ສະໄໝທີ I , ດ້ານດີ, ຂໍ້ຂາດຕົກບົກຜ່ອງ ແລະ ບົດຮຽນທີ່ຖອດຖອນໄດ້ເປັນຕົ້ນແມ່ນ ຄະນະພັກໄດ້ເປັນເຈົ້າການນໍາພາ ແລະ ສຶກສາອົບຮົມທາງດ້ານການເມືອງ-ແນວຄິດ ໃຫ້ສະມາຊິກພັກ, ພະນັກງານ-ລັດຖະກອນ ໃນຂອບເຂດຄວາມຮັບຜິດຊອບຂອງຕົນ ໂດຍການຈັດຕັ້ງເຜີຍແຜ່ບັນດາເອກະສານຕ່າງໆ ແນໃສ່ເພື່ອເຮັດໃຫ້ສະມາຊິກພັກ, ພະນັກງານ-ລັດຖະກອນ ເຊື່ອມຊຶມ ແລະ ເຂົ້າໃຈຕໍ່ແນວທາງນະໂຍບາຍຂອງພັກ-ລັດວາງອອກ ໃນນັ້ນ ໄດ້ຈັດຕັ້ງເຜີຍແຜ່ເຊື່ອມຊຶມມະຕິ 7 ສະໄໝທີ X ຂອງພັກ, ມະຕິ, ຄໍາສັ່ງ, ແນວທາງນະໂຍບາຍຂອງພັກ, ກົດໝາຍຂອງລັດ ແລະ ປາຖະກະຖາເອກະສານ ເລົ່າມູນເຊື້ອວັນສໍາຄັນຕ່າງໆຂອງພັກ-ຂອງຊາດ; ໄດ້ຊຸກຍູ້ບັນດາອົງການຈັດຕັ້ງມະຫາຊົນເຄື່ອນໄຫວ ຕາມພາລະບົດບາດຂອງຕົນ ໂດຍຮ່ວມຊີວິດການເມືອງ ຕາມລະບຽບ ແລະ ສ້າງຂະ ບວນການດ້ານຕ່າງໆ ເພື່ອຕ້ອນຮັບວັນສໍາຄັນຕ່າງໆຂອງພັກ, ຂອງຊາດ ແລະ ອົງການຈັດຕັ້ງຕ່າງໆ; ໂດຍສະເພາະ ການນໍາພາທາງດ້ານການເມືອງ-ແນວຄິດ, ມີຄວາມເປັນແບບຢ່າງໃນການດໍາລົງຊີວິດ, ສຶກສາອົບຮົມລູກຫຼານພາຍໃນຄອບຄົວ, ປະກອບສ່ວນພັນທະດ້ານຕ່າງໆ; ໄດ້ຈັດພິທີປະກາດການຍົກຖານະຄະນະພັກຮາກຖານເປັນອົງຄະນະພັກຫ້ອງວ່າການປະທານປະເທດ. ນອກນັ້ນ, ຍັງໄດ້ເອົາໃຈໃສ່ວຽກງານບໍລິຫານ-ຄຸ້ມຄອງ, ວຽກງານຄົ້ນຄວ້າສັງລວມ, ວຽກງານພົວພັນຕ່າງປະເທດ, ວຽກງານກົດໝາຍ, ວຽກງານຈັດຕັ້ງ, ກວດກາ-ໂຄສະນາ ແລະ ວຽກງານອື່ນໆ. (ຂ່າວ: ແສງຈັນ)