ສະຫຼອງ 20 ປີ ສະຖາບັນຄົ້ນຄວ້າເສດຖະກິດ ອຸດສາຫະກຳ ແລະ ການຄ້າ


...

22.05.2019 9:25     

   ສະຖາບັນຄົ້ນຄວ້າເສດ ຖະກິດອຸດສາຫະກຳ ແລະ ການຄ້າ, ກະຊວງອຸດສາຫະກຳ ແລະ ການຄ້າໄດ້ຈັດພິທີສະ ເຫຼີມສະຫຼອງວັນສ້າງຕັ້ງສະຖາບັນຄົບຮອບ 20 ປີ (24 ມີນາ 1999-24 ມີນາ 2019) ຂຶ້ນໃນວັນທີ 21 ພຶດສະພາ, ໂດຍການເປັນປະທານຂອງທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ, ພ້ອມດ້ວຍບັນດາຫົວໜ້າສະຖາບັນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ. ໃນພິທີທ່ານ ລາວຮົວ ເຈີຈີງ ຫົວໜ້າສະຖາບັນຄົ້ນຄວ້າເສດຖະກິດອຸດສາຫະກຳ ແລະ ການຄ້າໄດ້ກ່າວບາງຕອນສຳຄັນໃຫ້ຮູ້ວ່າ: ໃນໄລຍະ 20 ປີທີ່ຜ່ານມາສະຖາບັນຄົ້ນຄວ້າເສດຖະກິດອຸດສາຫະກຳ ແລະ ການຄ້າໄດ້ເຄື່ອນໄຫວຕາມພາລະບົດບາດ ແລະ ຕາມການມອບໝາຍຈາກຂັ້ນເທິງໂດຍສະເພາະແມ່ນການຮ່າງແຜນຍຸດທະສາດການພັດທະນາອຸດສາຫະກຳປຸງແຕ່ງ ແລະ ການຄ້າໄລຍະ 2011-2020 ແລະ ຮ່ວມຮ່າງຍຸດທະສາດການພັດທະນາອຸດສາຫະກຳກັບສະຖາບັນຄົ້ນຄວ້າເສດ ຖະກິດອາຊຽນ ແລະ ອາຊີຕາເວັນອອກທີ່ປະເທດຍີ່ປຸ່ນ, ພ້ອມດຽວກັນນີ້ກໍ່ຍັງໄດ້ຮ່ວມມືກັບສະຖາບັນຄົ້ນຄວ້າທັງພາຍໃນ ແລະ ຕ່າງປະເທດຄື : ໄທ, ກຳປູເຈຍ, ຫວຽດນາມ, ຈີນ, ພ້ອມທັງຂຽນບົດຄົ້ນຄວ້າເປັນພາສາລາວ ແລະ ພາສາອັງກິດເພື່ອສະໜອງໃຫ້ແກ່ບັນດາກົມ ແລະ ສະຖາບັນຕ່າງໆຈຳນວນ 53 ຫົວຂໍ້ (ບົດຄົ້ນຄວ້າເປັນພາສາອັງກິດຈຳນວນ 9 ຫົວຂໍ້), ນອກຈາກນີ້ຍັງສາມາດພັດທະນາຫຼັກສູດສຳລັບຝຶກອົບຮົມໄດ້ 6 ຫຼັກສູດ. ສຳລັບທິດທາງແຜນການໃນຕໍ່ໜ້າທາງສະຖາບັນໄດ້ສ້າງແຜນວຽກບຸລິມະສິດປະຈຳປີໃນການຄົ້ນຄວ້າ-ວິໄຈທີ່ຕິດພັນກັບແຜນການຄົ້ນຄວ້າຂອງແຕ່ລະກົມ ແລະ ຄຳສັ່ງຊີ້ນໍາໂດຍກົງຈາກຄະນະນຳກະຊວງ, ສ້າງຄວາມສາມາດໃນການຄົ້ນຄວ້າຂອງພະນັກງານໜຸ່ມໃຫ້ຫຼາຍຂຶ້ນໂດຍການຮຽນຮູ້ຜ່ານປະສົບການຄົ້ນຄວ້າດ້ວຍຕົນເອງ ແລະ ຈາກການເຂົ້າຮ່ວມຄົ້ນຄວ້າກັບສະຖາບັນພາຍນອກ, ສົ່ງເສີມການຍົກລະດັບຄວາມຮູ້ວິຊາການຂອງພະນັກງານແຕ່ລະຂັ້ນທັງພາຍໃນ ແລະ ຕ່າງປະເທດ, ຈັດລະບົບຂໍ້ມູນຂ່າວສານໃຫ້ເປັນສູນຂໍ້ມູນຮັບໃຊ້ວຽກງານຄົ້ນຄວ້າ, ສຶກສາ, ຝຶກອົບຮົມ ແລະ ເຜີຍແຜ່ຜົນການຄົ້ນຄວ້າຕ່າງໆ, ພັດທະນາຫຼັກສູດຊັ້ນສູງທຸລະກິດການຄ້າໃຫ້ທຽບເທົ່າມາດຕະຖານຂອງອາຊຽນ ແລະ ສາກົນ, ປັບປຸງໂຄງລ່າງພື້ນຖານ ແລະ ສິ່ງອຳນວຍຄວາມສະດວກເພື່ອຍົກສູງປະສິດທິພາບຂອງການຮຽນ-ການສອນໃຫ້ສູງຂຶ້ນ. (ຂ່າວ : ສຸກສາຄອນ, ພາບ: ສຸກສະຫວັນ)