ຄຕພ ປາຖະກະຖາວັນສຳຄັນຂອງຊາດ ແລະ ສາກົນ


...

23.05.2019 9:14     

   ຄະນະພົວພັນຕ່າງປະ ເທດສູນກາງພັກ (ຄຕພ) ໄດ້ປາຖະກະຖາກ່ຽວກັບວັນສຳ ຄັນຂອງຊາດ ແລະ ສາກົນຄື: ວິລະກຳຜ່າວົງປິດລ້ອມຂອງກອງພັນທີ 2 ວິລະຊົນ ຄົບຮອບ 60 ປີ, ວິລະກຳໂຕນຄຸກຢ່າງມະຫັດສະຈັນຂອງບັນດາຜູ້ນຳຂອງພັກ ແລະ ແນວລາວຮັກຊາດ ຄົບຮອບ 59 ປີ, ວັນໄຊ ຊະນະບັ້ນຮົບດຽນບຽນຟູ ຄົບ ຮອບ 69 ປີ, ວັນໄຊຊະນະຂອງສະຫະພາບໂຊວຽດ ໃນສົງຄາມໂລກ ຄັ້ງທີ 2 ຄົບຮອບ 74 ປີ; ວັນເກີດປະທານ ໂຮ່ຈິມິນ ຄົບຮອບ 129 ປີ, ວັນເກີດທ່ານ ກາກ ມາກ ຄົບຮອບ 201 ປີ ແລະ ວັນກຳມະກອນສາກົນ ຄົບຮອບ 133 ປີ. ພິທີດັ່ງກ່າວໄດ້ຈັດຂຶ້ນໃນວັນທີ 22 ພຶດສະພານີ້ ທີ່ ຄຕພ ໃຫ້ກຽດປາຖະກະຖາ ໂດຍສະຫາຍ ນາງ ສູນທອນ ໄຊຍະຈັກ ກຳມະການສູນກາງ ພັກ ເລຂາຄະນະພັກ ຫົວໜ້າຄະນະພົວພັນຕ່າງປະເທດສູນກາງພັກ, ມີບັນດາສະຫາຍໃນຄະນະພັກ, ຄະນະກົມ ແລະ ພາກສ່ວນກ່ຽວຂ້ອງເຂົ້າຮ່ວມ. ໃນການປາຖະກະຖາ ໃນຄັ້ງນີ້ ສະຫາຍ ນາງ ສູນທອນ ໄຊຍະຈັກ ໄດ້ເລົ່າຄືນໂດຍຫຍໍ້ກ່ຽວກັບປະຫວັດມູນເຊື້ອ ວິລະກຳອັນລຳ້ເລີດຂອງກອງທັບປະຊາຊົນ ປະຕິວັດລາວ ພາຍໃຕ້ການນຳພາອັນຖືກຕ້ອງ ແລະ ສະຫຼາດສ່ອງໃສ່ຂອງພັກ ໃນການຕໍ່ສູ້ກູ້ຊາດ ຕ້ານກັບພວກລ່າເມືອງຂຶ້ນແບບເກົ່າ ແລະ ແບບໃໝ່ຢ່າງທໍລະຫົດອົດທົນ ຄຽງບ່າຄຽງໄຫຼ່ກັບປະຊາຊົນລາວບັນດາເຜົ່າ ເພື່ອຍາດເອົາໄຊຊະນະມາສູ່ປະຊາຊົນລາວບັນດາເຜົ່ານອກນີ້ຍັງໄດ້ຍົກໃຫ້ເຫັນຄວາມໝາຍຄວາມສຳຄັນຄວາມເປັນມາຂອງມູນເຊື້ອຮ່ວມສຳພັນສູ້ຮົບ ລະຫວ່າງລາວ-ຫວຽດນາມ ທີ່ໄດ້ຮ່ວມຂຸມຄອງອັນດຽວກັນ, ປະສານສົມທົບ ແລະ ອຸດໜູນຊຶ່ງກັນ ແລະ ກັນ ຕ້ານກັບສັດຕູໂຕດຽວກັນ ຈົນສາມາດບັງຄັບໃຫ້ຝຣັ່ງ ຈຳຕ້ອງເຊັນສັນຍາເຊີແນວກ່ຽວກັບອິນດູຈີນ ໃນປີ 1954, ຮັບຮູ້ຄວາມເປັນເອກະລາດແຫ່ງຊາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງ 3 ຊາດ ລາວ-ຫວຽດນາມ ແລະ ກຳປູເຈຍ. ຈາກນັ້ນ ສະຫາຍ ນາງ ສູນທອນ ໄຊຍະຈັກ ຍັງຍົກໃຫ້ເຫັນເຖິງຊີວິດ ແລະ ການເຄື່ອນໄຫວປະຕິວັດຂອງປະທານ ໂຮ່ຈິມິນ ແລະ ທ່ານ ກາກມາກ, ການປະກອບສ່ວນອັນສຳຄັນຂອງພວກເພິ່ນ ໃນຂະບວນການຕໍ່ສູ້ຂອງຊົນຊັ້ນກຳມະກອນ ເພື່ອຍາດເອົາເອກະລາດອຳນາດມາໃຫ້ແກ່ຊາວຜູ້ອອກແຮງງານ ໃນປະເທດຕ່າງໆຂອງໂລກ; ສະຫາຍ ຫົວໜ້າ ຄຕພ ຍັງໄດ້ ຍົກໃຫ້ເຫັນເຖິງຄວາມໝາຍສຳ ຄັນຂອງວັນໄຊຊະນະສະຫະ ພາບໂຊວຽດ ໃນມະຫາສົງຄາມປ້ອງກັນປີຕຸພູມ ແລະ ຄວາມໝາຍຂອງໄຊຊະນະດັ່ງກ່າວ ສຳລັບປະຊາຊົນທີ່ຮັກຫອມສັນຕິພາບໃນໂລກ. ສະຫາຍ ຫົວໜ້າ ຄຕພ ໄດ້ຍົກໃຫ້ເຫັນຄວາມສຳຄັນຂອງວັນກຳມະກອນສາກົນ ວັນທີ 1 ພຶດສະພາ ປີ 1886 ຊຶ່ງເປັນຂີດໝາຍ ແຫ່ງ ໄຊຊະນະ ຂອງຊົນຊັ້ນກຳມະກອນ ໃນຂະບວນການຕໍ່ສູ້ ເພື່ອປົກປັກຮັກສາສິດ ແລະ ຜົນປະໂຫຍດອັນຊອບທຳຂອງຕົນ. ຜ່ານການຮັບຟັງປາຖະ ກະຖາໃນຄັ້ງນີ້ ເຮັດໃຫ້ພະ ນັກງານທົ່ວຄະນະພົວພັນຕ່າງ ປະເທດສູນກາງພັກ ເຫັນໄດ້ ແລະ ເຂົ້າໃຈເຖິງມູນເຊື້ອອັນພິລະອາດຫານຂອງກອງ ທັບ ແລະ ປະຊາຊົນລາວໃນການຕໍ່ສູ້ ເພື່ອເອກະລາດແຫ່ງຊາດ, ບັນດາເຫດການທີ່ສຳຄັນຕ່າງໆຂອງສາກົນ, ຮັບຮູ້ໄດ້ຜົນງານ ການເຄື່ອນໄຫວປະຕິວັດຂອງບັນດາຜູ້ນຳທີ່ມີຊື່ສຽງຂອງໂລກ. (ຂ່າວ: ຄຕພ-ພາບ: ບຸນຕອມ)