ສື່ມວນຊົນລາວ ເຂົ້າຮ່ວມສຳມະນາສາກົນ ວ່າດ້ວຍບົດບາດສື່ມວນຊົນຕໍ່ການພັດທະນາ ການທ່ອງທ່ຽວ


...

23.05.2019 9:40     

   ກອງປະຊຸມສຳມະນາສາກົນວ່າດ້ວຍບົດບາດຂອງສື່ມວນຊົນຕໍ່ວຽກງານພັດທະນາການທ່ອງທ່ຽວ ໄດ້ຈັດຂຶ້ນໃນວັນທີ 22 ພຶດສະພາ ຜ່ານມາ ຢູ່ນະຄອນຮ່າລອງ ແຂວງກວາງນິງ ສສ ຫວຽດນາມ ໂດຍການປະສານສົມທົບລະຫວ່າງກະຊວງ ຖະແຫຼງຂ່າວ ແລະ ການສື່ສານຫວຽດນາມ, ຄະນະກຳມະການປົກຄອງແຂວງກວາງນິງ ສສ ຫວຽດນາມ ແລະ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ສປປລາວ, ເພື່ອຍູ້ແຮງວຽກງານຖະແຫຼງຂ່າວ, ໂຄສະນາກ່ຽວກັບວຽກງານທ່ອງທ່ຽວ ລະຫວ່າງ ສອງປະເທດຫວຽດນາມ - ລາວ ໂດຍການເຂົ້າຮ່ວມຂອງທ່ານ ຮ່ວາງ ຫວິງ ບ້າວ ຮອງລັດຖະມົນຕີກະຊວງຖະແຫຼງຂ່າວ ແລະ ການສື່ສານຫວຽດນາມ, ທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວລາວ, ມີຜູ້ຕາງໜ້າອົງການອຸຍແນັສໂກ ປະຈຳຫວຽດນາມ ພ້ອມດ້ວຍຄະນະຜູ້ແທນຈາກຝ່າຍລາວ ແລະ ຫວຽດນາມ. ໃນໂອກາດນີ້, ທ່ານ ສະຫວັນຄອນ ຣາຊມຸນຕຣີ ກໍໄດ້ມີຄໍາເຫັນຕໍ່ກອງປະຊຸມສຳມະນາວ່າ: ກອງປະຊຸມສຳມະນາຄັ້ງນີ້, ເປັນຂໍ້ລິເລີ່ມທີ່ໜ້າຊົມເຊີຍ, ສ້າງໂອກາດໃຫ້ສື່ມວນຊົນທັງສອງປະເທດພວກເຮົາ ໄດ້ແລກປ່ຽນຄຳເຫັນ ແລະ ບົດຮຽນທີ່ດີຮ່ວມກັນໃນການພັດທະນາ ແລະ ສົ່ງເສີມການທ່ອງທ່ຽວທີ່ຍືນຍົງ ດ້ວຍການໂຄສະນາປົກປັກຮັກສາ ແລະ ເສີມຂະຫຍາຍຄຸນຄ່າຂອງມໍລະດົກ ກໍຄືເອກະລັກທີ່ພວກເຮົາມີທາງດ້ານປະຫວັດສາດ, ທຳມະຊາດ ແລະ ວັດທະນະທຳ. ທ່ານເນັ້ນຕື່ມວ່າ: ສື່ມວນ ຊົນນັບວ່າມີບົດບາດສຳຄັນຫຼາຍໃນການສ້າງຄວາມຮັບຮູ້ ແລະ ເຂົ້າໃຈກ່ຽວກັບສະພາບການທຸກດ້ານທັງພາຍໃນ ແລະ ຕ່າງປະເທດ ເປັນຕົ້ນດ້ານການທ່ອງທ່ຽວ ທັງຕອບໂຕ້ຂ່າວສານທີ່ບໍ່ຖືກຕ້ອງ ແລະ ບິດເບືອນ. ດັ່ງນັ້ນ, ໃນປັດຈຸບັນ ການໂຄສະນາສົ່ງເສີມການທ່ອງທ່ຽວ ຈຶ່ງຮຽກຮ້ອງໃຫ້ສື່ມວນຊົນທັງສອງປະເທດຂອງພວກເຮົາ ໄດ້ເພີ່ມທະວີໃຫ້ກວ້າງຂວາງ, ທົ່ວເຖິງ ແລະ ວ່ອງໄວ ດ້ວຍການຮ່ວມມືແລກປ່ຽນຂໍ້ມູນຂ່າວສານຊຶ່ງກັນ ແລະ ກັນ. ໃນຜ່ານມາ, ສື່ມວນຊົນ ສອງປະເທດລາວ-ຫວຽດນາມ ໄດ້ມີການພົວພັນ, ການແລກ ປ່ຽນ ແລະ ການຊ່ວຍເຫຼືອກັນຢ່າງໃກ້ຊິດທາງດ້ານອຸປະ ກອນ, ເຕັກໂນໂລຊີ ແລະ ການພັດທະນາບຸກຄະລາກອນ ແລະ ຮັບໃຊ້ການໂຄສະນາໃຫ້ປະເທດຂອງກັນ ແລະ ກັນ, ບົນຈິດໃຈຂອງສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ລັດ ແລະ ປະຊາຊົນ ເວົ້າລວມ, ກໍຄືບົນພື້ນຖານຂໍ້ຕົກລົງວ່າດ້ວຍການພົວພັນຮ່ວມມືສະບັບຕ່າງໆ ທີ່ໄດ້ທົບທວນ ແລະ ເຊັນກັນໃນແຕ່ລະປີ ລະຫວ່າງ ສອງກະຊວງ. ພ້ອມດຽວກັນນັ້ນ, ກໍເປັນການປະກອບສ່ວນເຂົ້າໃນການພັດທະນາ ແລະ ສົ່ງເສີມການທ່ອງທ່ຽວ ຂອງສອງປະເທດໃຫ້ຂະຫຍາຍຕົວ ແລະ ເຂັ້ມແຂງ, ຊຸກຍູ້ໃຫ້ນັກທ່ອງທ່ຽວທັງສອງປະເທດມາທ່ອງທ່ຽວປະເທດຂອງກັນ ແລະ ກັນ, ເປີດກວ້າງຕະຫຼາດ ແລະ ແຂ່ງຂັນດຶງເອົານັກທ່ອງທ່ຽວ ຈາກບັນດາປະເທດໃນພາກພື້ນ ແລະ ທົ່ວໂລກມາທ່ອງທ່ຽວຄວາມສວຍງາມ, ຄວາມເປັນເອກະລັກ ກໍຄືມໍລະດົກທາງດ້ານປະຫວັດສາດ, ທຳມະຊາດ ແລະ ວັດທະນະທຳ ທັງວິຖີຊີວິດຂອງປະຊາຊົນບັນດາເຜົ່າໃຫ້ຫຼາຍຂື້ນ. ຕາມຂໍ້ມູນຈາກອົງການທ່ອງທ່ຽວໂລກ, ນັບແຕ່ປີ 2012 ເປັນຕົ້ນມາມີນັກທ່ອງທ່ຽວ ເດີນທາງທົ່ວໂລກເພີ່ມຂຶ້ນ ຈາກ 1 ຕື້ ເຖິງ 1, 4 ຕື້ເທື່ອຄົນໃນປີ 2018 ເພີ່ມຂຶ້ນ 6% ທຽບໃສ່ 2017. ສຳລັບຂົງເຂດພາກພື້ນປາຊີຟິກນີ້, ມີຈໍານວນ 343 ລ້ານເທື່ອຄົນ ເພີ່ມຂຶ້ນ 6% ເຊັ່ນດຽວກັນ. ສ່ວນນັກທ່ອງທ່ຽວຫວຽດນາມ ໄປທ່ຽວລາວມີເຖິງ 870. 000 ເທື່ອຄົນ, ເປັນອັນດັບສອງ ຮອງຈາກນັກທ່ອງທ່ຽວໄທ, ນັກທ່ອງທ່ຽວລາວໄປທ່ຽວຫວຽດນາມ ທາງພາກພື້ນດິນຜ່ານ 8 ດ່ານທີ່ມີຊາຍແດນຕິດກັບຫວຽດນາມ ມີຈຳນວນ 100.900 ເທື່ອຄົນ. ໂຕເລກນີ້ຊີ້ໃຫ້ເຫັນວ່າ: ຈຳນວນນັກທ່ອງທ່ຽວຄາດວ່າຈະເພີ່ມຂຶ້ນ ເພາະການທ່ອງທ່ຽວກາຍເປັນອຸດສາຫະກຳໃຫຍ່ ທີ່ສ້າງໃຫ້ເສດຖະກິດເຕີບໂຕ ແລະ ໝັ້ນຄົງ. ໃນນັ້ນ ສໍາຄັນແມ່ນການສ້າງໃຫ້ມີວຽກເຮັດ ແລະ ລາຍຮັບ ຫຼື ການສົ່ງອອກກັບທີ່ຫຼາຍຂຶ້ນ. (ຂ່າວ-ພາບ: ສີວັນ ຫອມໄຊຍະເດດ)