ໄຊສົມບູນ ນຳໃຊ້ເຕັກນິກປູກເຂົ້ານາປີ ດ້ວຍເຄື່ອງຈັກຢອດເມັດ


...

24.05.2019 9:28     

   ພະແນກກະສິກຳ ແລະ ປ່າໄມ້ ແຂວງໄຊສົມບູນ ໄດ້ຈັດພິທີ ເປີດຂະບວນການຜະລິດລະດູຝົນ ປີ 2019 ປູກເຂົ້ານາປີ ໂດຍການນຳໃຊ້ເຕັກນິກການປູກ ດ້ວຍເຄື່ອງຈັກຢອດເມັດ ໃນວັນທີ 17 ພຶດສະພາ 2019 ທີ່ທົ່ງນາບ້ານອອມ ເມືອງພູວົງ ຊຶ່ງນຳພາ ແລະ ເປັນປະທານໃນພິທີໂດຍທ່ານ ລູຊີ ຢໍລໍ່ເຢຍລົງ ຮັກສາການຫົວໜ້າ ພະແນກກະສິກຳ ແລະ ປ່າໄມ້ ແຂວງ, ມີຜູ້ຕາງໜ້າການນຳເມືອງ ອານຸວົງ, ຫ້ອງການກະສິກຳ ແລະ ປ່າໄມ້ ເມືອງອານຸວົງ ພ້ອມດ້ວຍອຳນາດການປົກຄອງບ້ານອອມ ແລະ ທຸກພາກສ່ວນທີ່ກ່ຽວຂ້ອງເຂົ້າຮ່ວມ. ໂອກາດນີ້ ທ່ານ ລູຊີ ຢໍລໍ່ເຢຍລົງ ໄດ້ມີຄຳເຫັນຕໍ່ພິທີ ຊຶ່ງທ່ານໄດ້ຍົກໃຫ້ເຫັນເຖິງຄວາມໝາຍຄວາມສຳຄັນ ໃນການນຳໃຊ້ເຕັກນິກການປູກເຂົ້າດ້ວຍເຄື່ອງຈັກຢອດເມັດ ຊຶ່ງເປັນການປູກທີ່ທັນສະໄໝ, ປະຢັດເວລາ, ປະຢັດແຮງງານ ແລະ ໄດ້ຮັບຜົນຜະລິດດີ. ຈາກນັ້ນ, ໄດ້ມີການສາທິດປູກເຂົ້າໂດຍການນຳໃຊ້ເຄື່ອງຈັກຢອດເມັດຢູ່ໄຮ່ນາຕົວຈິງ ທັງນີ້ ກໍເພື່ອເປັນການຝຶກເຕັກນິກດ້ານວິຊາການໃຫ້ແກ່ປະຊາຊົນ ບ້ານອອມ ໄດ້ຮັບຮູ້ ແລະ ເຂົ້າໃຈ ກ່ຽວກັບທັກສະອັນຊຳນິຊຳນານຕໍ່ການນໍາໃຊ້ເຄື່ອງຈັກທີ່ທັນສະໄໝ ດັ່ງກ່າວ ເຂົ້າໃນການຜະລິດ. ການໝູນໃຊ້ການປູກເຂົ້າດ້ວຍເຄື່ອງຈັກຢອດເມັດ ເປັນວິທີການທີ່ທັນສະໄໝ, ວ່ອງໄວ, ຖືກຕ້ອງຕາມຫຼັກວິຊາການ, ປະຢັດເວລາ ແລະ ໄດ້ຮັບຜົນຜະລິດດີ ທັງຮັບປະກັນທາງດ້ານປະລິມານ ແລະ ຄຸນນະພາບ ພ້ອມນີ້ ຍັງເປັນການປຸກລະດົມໃຫ້ພໍ່ແມ່ປະຊາຊົນຊາວກະສິກອນ ບ້ານອອມ ກໍຄືໃນທົ່ວແຂວງໄຊສົມບູນ ສຸມໃສ່ການຜະລິດໃຫ້ເປັນຂະບວນການຟົດຟື້ນ, ກວ້າງຂວາງ ໂດຍຫັນຈາກການປູກເຂົ້າແບບປະຖົມປະຖານ, ອີງໃສ່ທຳມະຊາດເປັນຕົ້ນຕໍໃນເມື່ອກ່ອນ ແລ້ວກ້າວເຂົ້າສູ່ການຜະລິດ ຕາມຫຼັກວິທະຍາສາດ ແລະ ທັນສະໄໝ ເທື່ອລະກ້າວ. (ຂ່າວ: ຈິນລະວອນ ວໍລະສົມບູນ)