ທ່ານ ບຸນທອງ ຈິດມະນີ ເນັ້ນ 7 ບັນຫາຕໍ່ວຽກງານກວດກາກະຊວງວິທະຍາສາດ ແລະ ເຕັກໂນໂລຊີ


...

...

21.05.2019 11:20     

   ກອງປະຊຸມສະຫຼຸບວຽກງານກວດກາປະຈໍາປີ 2018 ແລະ ວາງທິດທາງແຜນການປີ 2019 ຂອງກະຊວງວິທະ ຍາສາດ ແລະ ເຕັກໂນໂລ ຊີ ໄດ້ຈັດຂຶ້ນໃນວັນທີ 16 ພຶດ ສະພາຜ່ານມາ ທີ່ນະຄອນ ຫຼວງວຽງຈັນ ພາຍໃຕ້ການ ເປັນປະທານຂອງທ່ານ ບໍ່ວຽງ ຄໍາ ວົງດາລາ ກໍາມະການສູນກາງພັກ ລັດຖະມົນຕີກະ ຊວງວິທະຍາສາດ ແລະ ເຕັກ ໂນໂລຊີ; ໂດຍການເປັນກຽດ ເຂົ້າຮ່ວມຂອງ ທ່ານ ບຸນທອງ ຈິດມະນີ ກຳມະການກົມ ການເມືອງສູນກາງພັກ ຄະນະເລຂາທິການສູນກາງພັກ ຮອງນາຍົກລັດຖະມົນຕີ ປະ ທານຄະນະກວດກາສູນກາງພັກ ປະທານອົງການກວດກາລັດຖະບານ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ມີບັນດາຮອງລັດຖະມົນ ຕີ, ຄະນະພັກ, ພະນັກງານຫຼັກແຫຼ່ງ ແລະ ພະນັກງານທີ່ເຮັດວຽກງານກວດກາທົ່ວກະຊວງເຂົ້າຮ່ວມ.
ທ່ານ ບໍ່ວຽງຄໍາ ວົງດາລາ ໄດ້ລາຍງານສະພາບການ ເຄື່ອນໄຫວວຽກງານກວດກາ ຂອງກະຊວງວິທະຍາສາດ ແລະ ເຕັກໂນໂລຊີ ໃນໄລຍະ 1 ປີຜ່ານມາ ໂດຍຫຍໍ້ໃຫ້ກອງປະຊຸມໄດ້ຮັບຊາບວ່າ: ວຽກງານກວດກາພັກ: ໄດ້ຕິດຕາມການເຄື່ອນໄຫວຂອງບັນດາໜ່ວຍພັກ, ການຈັດຕັ້ງປະຕິບັດລະບຽບຂອງພັກ ເປັນຕົ້ນ ການດໍາເນີນຊີວິດການເມືອງປະຈໍາເດືອນ, ການກໍ່ສ້າງ ແລະ ຂະຫຍາຍພັກ, ການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ. ວຽກງານກວດກາລັດ: ໄດ້ຕິດຕາມການເຄື່ອນໄຫວປະຕິບັດວຽກງານຕາມພາລະບົດບາດ ຂອງບັນດາກົມ, ຫ້ອງການ, ສະຖາບັນ ແລະ ພະແນກວິທະຍາສາດ-ເຕັກໂນໂລຊີ ແຂວງຕ່າງໆ; ຕິດຕາມ, ກວດກາໂຄງການລົງທຶນຂອງລັດ, ຂອງກະຊວງເປັນປົກກະຕິ. ວຽກງານຄົ້ນຄວ້າຄໍາຮ້ອງ-ຄໍາສະເໜີ: ໄດ້ຕິດຕັ້ງຕູ້ຮັບຄໍາຮ້ອງ-ຄໍາສະເໜີຢູ່ 2 ຈຸດ ແລະ ໄດ້ໃຫ້ພະນັກງານຕິດຕາມຄໍາຮ້ອງ-ຄໍາສະເໜີກົມກວດກາເປັນຜູ້ຮັບຜິດຊອບຄຸ້ມຄອງ. ດ້ານກົງຈັກການຈັດຕັ້ງວຽກງານກວດກາ: ໄດ້ປະຕິບັດຕາມກົດໝາຍວ່າດ້ວຍການກວດກາລັດ ແລະ ບົດແນະນໍາຂອງຄະນະກວດກາສູນກາງພັກ ໂດຍອີງໃສ່ຈຸດພິເສດຂອງກະຊວງ ໄດ້ປັບປຸງພາລະບົດບາດຂອງກົມກວດກາຄືນໃໝ່. ສໍາລັບວຽກງານກວດກາຢູ່ພະແນກວິທະຍາສາດ ແລະ ເຕັກໂນໂລຊີ ແຂວງ ແມ່ນໃຫ້ພະແນກຄົ້ນຄວ້າຕາມເງື່ອນໄຂຕົວຈິງ ບ່ອນໃດມີຄວາມເໝາະສົມກໍສາມາດຕັ້ງເປັນຂະແໜງກວດກາ, ໜ່ວຍງານກວດກາ ຫຼື ຜູ້ຮັບຜິດຊອບວຽກງານກວດກາ.
ໃນໂອກາດໂອ້ລົມຕໍ່ກອງປະຊຸມສະຫຼຸບວຽກງານກວດກາປະຈໍາປີ 2018 ແລະ ວາງທິດທາງແຜນການປີ 2019 ຂອງກະຊວງວິທະຍາສາດ ແລະ ເຕັກໂນໂລຊີ ທ່ານ ບຸນທອງ ຈິດມະນີ ໄດ້ເນັ້ນໜັກ 7 ບັນຫາດັ່ງນີ້: 1). ບັນຫາພື້ນຖານແມ່ນພ້ອມກັນສືບຕໍ່ຄົ້ນຄວ້າ, ເຊື່ອມຊຶມ-ກຳແໜ້ນ ແລະ ຈັດຕັ້ງປະຕິບັດເນື້ອໃນມະຕິກອງປະຊຸມໃຫຍ່ຄັ້ງທີ X ຂອງພັກ, ບັນດາມະຕິ, ຂໍ້ກຳນົດ ແລະ ນິຕິກຳຕ່າງໆຂອງພັກ, ຂອງລັດກ່ຽວກັບວຽກງານກວດກາ; ເຊື່ອມຊຶມ ແລະ ຕັ້ງໜ້າຈັດຕັ້ງປະຕິບັດເນື້ອໃນກອງປະຊຸມວຽກງານກວດກາທົ່ວປະເທດ ປະຈຳປີ 2018 ແລະ ມະຕິຂອງຄະນະພັກຂັ້ນຂອງຕົນ ໃຫ້ເຂົ້າສູ່ພາກປະຕິບັດຕົວຈິງ ຢ່າງມີປະສິດທິຜົນ. 2). ວຽກງານກວດກາພັກ, ໃຫ້ເອົາໃຈໃສ່ຕິດຕາມ-ກວດກາການຈັດຕັ້ງປະຕິບັດບັນດາຄາດໝາຍມະຕິກອງປະຊຸມໃຫຍ່ຄັ້ງທີ X ຂອງພັກ ແລະ ມະຕິກອງປະຊຸມໃຫຍ່ອົງຄະນະພັກຂັ້ນຕົນວາງອອກ, ການປະຕິບັດມະຕິກົມການເມືອງສູນກາງພັກ ກ່ຽວກັບວຽກງານ 3 ສ້າງ, ບັນດາມະຕິ, ຄຳສັ່ງ, ຂໍ້ກຳນົດ, ກົດລະບຽບຂອງພັກ, ການປະຕິບັດໜ້າທີ່ ແລະ ແບບແຜນວິທີເຮັດວຽກຂອງຄະນະພັກ, ສະມາຊິກພັກ, ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ການຂະຫຍາຍພັກ, ການກະກຽມດຳເນີນກອງປະຊຸມໃຫຍ່ໜ່ວຍພັກ ເພື່ອກ້າວເຂົ້າສູ່ກອງປະຊຸມໃຫຍ່ອົງຄະນະພັກກະຊວງ ຄັ້ງທີ II ໃຫ້ເປັນປົກກະຕິ ແລະ ແທດເຖິງກວ່າເກົ່າ. 3). ວຽກງານກວດກາລັດ, ໃຫ້ສຸມໃສ່ຕິດຕາມ, ກວດກາການປະຕິບັດພາລະບົດບາດ, ໜ້າທີ່ຂອງແຕ່ລະພາກສ່ວນໃນຂະແໜງວິທະຍາສາດ ແລະ ເຕັກໂນໂລຊີ; ການປະຕິບັດມະຕິ, ຄຳສັ່ງ, ຂໍ້ກຳນົດ, ກົດໝາຍ ແລະ ລະບຽບການຕ່າງໆທີ່ລັດປະກາດໃຊ້; ການປະຕິບັດແຜນພັດທະນາເສດຖະກິດ-ສັງຄົມ 5 ປີຄັ້ງທີ 8 ກໍຄືແຜນພັດທະນາວິທະຍາສາດ ແລະ ເຕັກໂນໂລຊີ. 4). ວຽກງານສະກັດກັ້ນ ແລະ ຕ້ານການສໍ້ລາດບັງຫຼວງເປັນວຽກງານໜຶ່ງ ທີ່ພວກເຮົາຕ້ອງໄດ້ເອົາໃຈໃສ່ເພາະບັນຫານີ້ເປັນໄພຂົ່ມຂູ່ຕໍ່ສະຖຽນລະພາບຂອງການຈັດຕັ້ງ ແລະ ສະມາຊິກພັກ, ພະນັກງານ. ດ້ວຍເຫດນັ້ນທຸກການຈັດຕັ້ງຂອງພັກ, ຂອງລັດ, ການຈັດຕັ້ງສັງຄົມ ແລະ ສະມາຊິກພັກ, ພະນັກງານຕ້ອງກຳແໜ້ນ ແລະ ປະຕິບັດກົດໝາຍວ່າດ້ວຍການຕ້ານການສໍ້ລາດບັງຫຼວງ ແລະ ນິຕິກຳອື່ນໆທີ່ປະກາດໃຊ້ນັ້ນ ດ້ວຍຄວາມຮັບຜິດຊອບສູງ, ເປັນເຈົ້າການຕ້ານ ແລະ ສະກັດກັ້ນສິ່ງຫຍໍ້ທໍ້ຕ່າງໆຢ່າງເຂັ້ມງວດ 5). ກ່ຽວກັບການຄົ້ນຄວ້າແກ້ໄຂຄຳຮ້ອງ-ຄຳສະເໜີ ຂອງພະນັກງານ, ສະມາຊິກພັກ ແລະ ຂອງພົນລະເມືອງ ອັນນີ້ກໍເປັນວຽກໜຶ່ງ ທີ່ພວກເຮົາບໍ່ຄວນຖືເບົາ, ອັນສຳຄັນແມ່ນຕ້ອງສ້າງເງື່ອນໄຂໃຫ້ສະມາຊິກພັກ, ພະນັກງານ ແລະ ພົນລະເມືອງ ໄດ້ສົ່ງຄຳຮ້ອງ ແລະ ຄຳສະເໜີ ຂອງຕົນໄປເຖິງການຈັດຕັ້ງ ແລະ ບຸກຄົນທີ່ກ່ຽວຂ້ອງ; ສ້າງເງື່ອນໄຂໃຫ້ມະຫາຊົນເຂົ້າພົບ ແລະ ກະຈ່າງແຈ້ງບັນຫາຕ່າງໆ ທີ່ເຂົາເຈົ້າສົນໃຈ; ການຄົ້ນຄວ້າແກ້ໄຂຄຳຮ້ອງ-ຄຳສະເໜີ ຕ້ອງພາວະວິໄສ, ແທດຕົວຈິງ, ຮອບຄອບ ຊັດເຈນ ແລະ ແກ້ໄຂຖືກຕ້ອງຕາມຄວາມເປັນຈິງ. 6). ຕ້ອງເອົາໃຈໃສ່ປັບປຸງກົງຈັກການຈັດຕັ້ງ ແລະ ກໍ່ສ້າງພະນັກງານກວດກາແຕ່ລະຂັ້ນໃຫ້ຕອບສະໜອງກັບໜ້າທີ່ການເມືອງໃນໄລຍະໃໝ່ ໂດຍຈັດຕັ້ງເປັນພະແນກ, ໜ່ວຍງານ ຫຼື ຜູ້ຮັບ ຜິດຊອບວຽກງານກວດກາ ສັງກັດຢູ່ແຕ່ລະການຈັດຕັ້ງຕາມຄວາມເໝາະສົມ ແລະ ບຳລຸງສ້າງເຂົາ ເຈົ້າໃຫ້ຮັບປະກັນທາງດ້ານຈຳນວນ, ຄຸນນະພາບ ສາມາດເຮັດບົດບາດເປັນເສນາທິການໃຫ້ຄະນະພັກ, ຄະນະນຳຂອງກະຊວງ. ອີກອັນໜຶ່ງທີ່ສຳຄັນຜູ້ທີ່ເຮັດວຽກກວດກາ ຕ້ອງກຳແໜ້ນມະຕິ, ຄຳສັ່ງ, ລະບຽບກົດໝາຍ ເປັນຜູ້ທີ່ມີທັດສະນະຖືກຕ້ອງ, ເບິ່ງ ແລະ ພິຈາລະນາບັນຫາຕ່າງໆຢ່າງຮອບຄອບ, ພາວະວິໄສ, ແທດຕົວຈິງ, ກົງໄປກົງມາ ແລະ ທ່ຽງທຳ. 7). ເພີ່ມທະວີການນໍາພາຂອງຄະນະພັກ, ອົງການປົກຄອງທຸກຂັ້ນ ຕໍ່ວຽກງານກວດກາພັກ, ວຽກງານກວດກາລັດ, ສະກັດກັ້ນ ແລະ ຕ້ານການສໍ້ລາດບັງຫຼວງ ດ້ວຍຫຼາຍວິທີໂດຍຖືເອົາການຕິດຕາມ, ກວດກາເປັນປົກກະຕິແຕ່ຫົວທີ ເປັນວິທີການຕົ້ນຕໍຂອງການກວດກາ, ບັນຫາທີ່ເກີດຂຶ້ນຢູ່ບ່ອນໃດແມ່ນຄະນະພັກ ແລະ ອົງການປົກຄອງຢູ່ບ່ອນນັ້ນ ເປັນຜູ້ຮັບຜິດຊອບ; ເມື່ອກວດກາແລ້ວຕ້ອງແກ້ໄຂຜົນຂອງການກວດກາຢ່າງເດັດຂາດ-ເຂັ້ມງວດ ແລະ ທັນເວລາ. (ຂ່າວ: ແສງເພັດ ແຊ່ຈ່າວ)