ໄຊຍະບູລີ ປະກາດແຕ່ງຕັ້ງ ວ່າການປະທານສານ ປະຊາຊົນ


...

28.05.2019 9:33     

   ແຂວງໄຊຍະບູລີ ໄດ້ຈັດພິທີ ປະກາດແຕ່ງຕັ້ງ ວ່າການ ປະທານສານປະຊາຊົນແຂວງຂຶ້ນໃນວັນທີ 24 ພຶດສະພາ ຜ່ານມາ ທີ່ສະໂມສອນຫ້ອງວ່າການແຂວງໄຊຍະບູລີ ໂດຍການເຂົ້າຮ່ວມຂອງທ່ານ ຄຳພັນ ສິດທິດຳພາ ກຳມະການສູນກາງພັກ ປະທານສານປະຊາຊົນສູງສຸດ, ມີທ່ານ ຍັນຍົງ ສີປະເສີດ ຮອງເລຂາພັກແຂວງ, ຮອງເຈົ້າແຂວງໄຊຍະບູລີ, ມີພາກສ່ວນກ່ຽວຂ້ອງ ແລະ ແຂກຖືກເຊີນເຂົ້າຮ່ວມ. ໃນພິທີ ທ່ານ ກັ້ງ ເຕັມສົມບັດ ຫົວໜ້າກົມຈັດຕັ້ງສານປະຊາຊົນສູງສຸດ ໄດ້ຂຶ້ນຜ່ານ ຂໍ້ຕົກລົງຂອງປະທານສານປະ ຊາຊົນສູງສຸດ ສະບັບເລກທີ 274/ສປສສ, ລົງວັນທີ 10 ພຶດ ສະພາ 2019, ສະບັບເລກທີ632/ສປສສ, ລົງວັນທີ 19 ພະຈິກ 2018 ວ່າດ້ວຍການອະນຸມັດໃຫ້ພະນັກງານ-ລັດ ຖະກອນພັກການຮັບອຸດໜູນ ບຳນານ, ປະທານສານປະຊາ ຊົນສູງສຸດ ຕົກລົງເຫັນດີອະນຸມັດໃຫ້ທ່ານ ບຸນທຽມ ສີເມືອງ ພັກການຮັບອຸດໜູນບຳນານແຕ່ວັນທີ 1 ມັງກອນ 2019 ເປັນຕົ້ນໄປ, ເຫັນດີອະນຸມັດໃຫ້ ທ່ານ ຄຳພາດ ນ້ອຍຜາ ພັກການຮັບອຸດໜູນບຳນານ ແຕ່ວັນທີ 1 ກໍລະກົດ 2019 ເປັນຕົ້ນໄປ, ຜ່ານຂໍ້ຕົກລົງຂອງປະທານສານປະຊາຊົນສູງສຸດ ສະບັບເລກທີ 256/ສປສສ, ລົງວັນທີ 7 ພຶດສະພາ 2019 ວ່າດ້ວຍ ການແຕ່ງຕັ້ງຜູ້ວ່າການ ປະທານສານປະຊາຊົນແຂວງໄຊຍະບູລີ, ປະທານສານປະຊາຊົນສູງສຸດ ຕົກລົງເຫັນດີແຕ່ງຕັ້ງທ່ານ ຄຳສິງ ສີບົວພັນ ຮອງປະທານສານປະຊາຊົນແຂວງ ເປັນຜູ້ວ່າການປະທານສານປະຊາຊົນແຂວງໄຊຍະບູລີ, ຂໍ້ຕົກລົງເລກທີ 54/ສປສສ ລົງວັນທີ 13 ກຸມພາ 2019 ວ່າດ້ວຍການແຕ່ງຕັ້ງຜູ້ວ່າການ ປະທານສານ ປະຊາຊົນເຂດ 3 ແຂວງ ໄຊຍະບູລີ, ປະທານສານປະຊາຊົນສູງສຸດ ຕົກລົງເຫັນດີແຕ່ງຕັ້ງ ທ່ານ ສົມໄວ ຈັນທະຜາລີ ຮອງເລຂາໜ່ວຍພັກ ຮອງປະທານສານປະຊາຊົນ ເຂດ 3 ເປັນຜູ້ວ່າການປະທານສານ ປະຊາຊົນເຂດ 3 ແຂວງ ໄຊຍະບູລີ, ຜ່ານມະຕິຂອງຄະນະປະຈຳສະພາແຫ່ງຊາດ, ສະບັບເລກທີ 30/ຄປຈ, ລົງວັນທີ 7 ກຸມພາ 2019 ວ່າດ້ວຍການແຕ່ງຕັ້ງຮອງປະທານສານປະຊາຊົນ ເຂດ 3 ແຂວງ ໄຊຍະບູລີ, ຄະນະປະຈຳສະພາແຫ່ງຊາດ ຕົກລົງແຕ່ງຕັ້ງ ທ່ານ ສາຄອນ ຈັນທະລາດ ຜູ້ພິພາກສາ ຫົວໜ້າຄະນະສານແພ່ງ ສານປະຊາຊົນເຂດ 3 ເປັນ ຮອງປະທານສານປະຊາຊົນ ເຂດ 3 ແຂວງ ໄຊຍະບູລີ. ໂອກາດດັ່ງກ່າວ, ທ່ານ ປະທານສານປະຊາຊົນສູງສຸດ ໄດ້ໃຫ້ກຽດໂອ້ລົມຕໍ່ຜູ້ທີ່ຖືກແຕ່ງຕັ້ງຄັ້ງນີ້ຈົ່ງເອົາໃຈໃສ່ຄົ້ນຄວ້າຮາໍ່ຮຽນ, ກຳແໜ້ນແນວ ທາງນະໂຍບາຍຂອງພັກ, ລະ ບຽບກົດໝາຍຂອງລັດ, ປະດິດຄິດສ້າງ, ສະດຸ້ງໄວຕໍ່ໜ້າທີ່ວຽກງານ, ມີແບບແຜນວິທີນຳພາ, ຕັ້ງໜ້າປະຕິບັດໜ້າທີ່ວຽກງານວິຊາສະເພາະໃຫ້ເປັນທຳ, ເພີ່ມທະວີຄວາມສາມັກຄີພາຍໃນ-ພາຍນອກໃຫ້ເປັນປຶກແຜ່ນ ແລະ ເອົາໃຈໃສ່ປັບປຸງກົງຈັກການຈັດຕັ້ງໃຫ້ສອດຄ່ອງກັບໜ້າວຽກຕົວຈິງ. (ຂ່າວ: ຫ້ອງວ່າການແຂວງ ໄຊຍະບູລີ)