ນັກທ່ອງທ່ຽວຈີນ ເຂົ້າມາທ່ຽວລາວ ເພີ່ມຂຶ້ນ 16%


...

06.06.2019 10:44     

   ໃນ 3 ເດືອນຕົ້ນປີ 2019 ມີນັກທ່ອງທ່ຽວຈີນເຂົ້າມາທ່ຽວລາວຈໍານວນ 259.205 ຄົນ, ເພີ່ມຂຶ້ນ 16% ເມື່ອທຽບກັບໄລຍະດຽວກັນຂອງປີຜ່ານມາ, ຄາດວ່າໝົດປີ ຈະສາມາດ ບັນລຸຄາດ ໝາຍທີ່ວາງໄວ້ ບໍ່ຕໍ່າກວ່າ 1 ລ້ານເທື່ອຄົນ. ໃນຂະນະທີ່ 4 ເດືອນຕົ້ນປີ 2019 ມີນັກທ່ອງທ່ຽວຈາກຫຼາຍປະເທດເຂົ້າມາລາວ ຫຼາຍກວ່າ 1.062.000 ເທື່ອຄົນ ເທົ່າກັບ 23% ຂອງແຜນການປີ, ຫຼຸດລົງຈາກໄລຍະດຽວກັນຂອງປີ 2018 ປະມານ 0,5%.
ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ລາຍງານຕໍ່ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ VIII ໃນວັນທີ 5 ມິຖຸນາໃຫ້ຮູ້ບາງຕອນວ່າ: ເພື່ອສົ່ງເສີມປີທ່ອງທ່ຽວ ລາວ-ຈີນ 2019 ແລະ ດຶງດູດບັນດານັກທ່ອງທ່ຽວ ໃນທົ່ວໂລກ ເຂົ້າມາລາວ ໃຫ້ບັນລຸຄາດໝາຍທີ່ວາງໄວ້, ລັດຖະບານ ໄດ້ສຸມໃສ່ການແກ້ໄຂ ຂອດອຸດຕັນຕ່າງໆ ເປັນຕົ້ນໄດ້ແຕ່ງຕັ້ງຄະນະແກ້ໄຂບັນຫາ ທີ່ສະມາຊິກສະພາແຫ່ງຊາດ ໄດ້ສະເໜີກ່ຽວກັບແຫຼ່ງທ່ອງທ່ຽວຢູ່ວັງວຽງ ແຂວງວຽງຈັນ. ພ້ອມກັນນີ້, ກໍໄດ້ສືບຕໍ່ສໍາຫຼວດ, ສ້າງ, ປັບປຸງ, ພັດທະນາແຫຼ່ງທ່ອງທ່ຽວຕ່າງໆ ແລະ ຂະຫຍາຍກິດຈະການດ້ານການທ່ອງທ່ຽວໃຫ້ຫຼາຍຂຶ້ນ, ເອົາໃຈໃສ່ໂຄສະນາເຜີຍແຜ່ ແລະ ປະສານສົມທົບກັບບັນດາອົງການທ່ອງທ່ຽວໃນພາກພື້ນ ແລະ ສາກົນ ຍາດແຍ່ງເອົາການສະໜັບສະໜູນ ແລກປ່ຽນບົດຮຽນ, ປະສົບການ ແລະ ການຮ່ວມມື ເພື່ອສ້າງການທ່ອງທ່ຽວຂອງລາວ ໃຫ້ເຊື່ອມໂຍງກັບສາກົນ.
ນອກຈາກນີ້, ລັດຖະບານ ໄດ້ອະນຸຍາດ ໃຫ້ເປີດເສັ້ນທາງ ການບິນໃໝ່ ຂອງ ສປປ ລາວ ໄປຕ່າງປະເທດ ແລະ ຕ່າງປະເທດເຂົ້າມາ ສປປ ລາວ ເຊັ່ນ: ໄທ, ສປ ຈີນ, ສສ ຫວຽດນາມ, ສ. ເກົາຫຼີ, ກໍາປູເຈຍ ແລະ ສິງກະໂປ, ຂະຫຍາຍ ສະໝາມບິນ ສາກົນວັດໄຕ ແລະ ຫຼວງພະບາງ ເພື່ອຮອງຮັບ ຈຳນວນນັກທ່ອງທ່ຽວ ທີ່ເພີ່ມຂຶ້ນ, ປັບປຸງດ່ານສາກົນ ແລະ ດ່ານທ້ອງຖິ່ນ 107 ດ່ານ.
ສ່ວນການສົ່ງເສີມປີທ່ອງທ່ຽວລາວ-ຈີນ 2019 ລັດຖະບານທັງສອງປະເທດໄດ້ຈັດ 8 ກິດຈະກໍາຢູ່ສອງປະເທດທີ່ຕິດພັນກັບກິດຈະກໍາຍ່ອຍຈໍານວນໜຶິ່ງ, ສໍາລັບຢູ່ ສປປ ລາວ ແມ່ນໄດ້ຈັດຕັ້ງປະຕິບັດ 4 ກິດຈະກໍາສໍາເລັດແລ້ວ ແລະ ສປ ຈີນກໍໄດ້ເປັນເຈົ້າພາບຈັດສຳເລັດແລ້ວ 4 ກິດຈະກຳເຊັ່ນດຽວກັນ.
(ຂ່າວ-ພາບ: ພູວຽງຄຳ)