ກອງປະຊຸມສະໄໝສາມັນເທ່ືອທີ 7 ຂອງສະພາແຫ່ງຊາດ ຊຸດທີ VIII ປິດລົງດ້ວຍຜົນສຳເລັດ


...

...

26.06.2019 11:08     

   ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ VIII ໄດ້ປິດລົງດ້ວຍຜົນ ສຳເລັດອັນຈົບງາມ ໃນຕອນແລງຂອງວັນທີ 25 ມິຖຸນານີ້, ພາຍຫຼັງດຳເນີນມາເປັນເວລາ 15 ວັນ ໂດຍການເປັນປະທານຂອງທ່ານ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ ປະທານສະພາແຫ່ງຊາດ. ໂດຍໃຫ້ກຽດເຂົ້າຮ່ວມຂອງທ່ານ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິ ຫານງານສູນກາງພັກ ປະທານປະເທດ, ທ່ານ ທອງລຸນ ສີສຸລິດ ກຳມະການກົມການເມືອງສູນກາງພັກ ນາຍົກລັດຖະມົນຕີ, ມີບັນດາການນຳ, ອະດີດການນຳພັກ-ລັດ, ສະມາຊິກສະພາແຫ່ງຊາດທຸກເຂດເລືອກຕັ້ງ ແລະ ແຂກຖືກເຊີນເຂົ້າຮ່ວມຢ່າງ ພ້ອມພຽງ. ກ່ອນການປິດກອງປະຊຸມ ບັນດາ ສສຊ ໄດ້ເປັນເອກະພາບຮັບຮອງຮ່າງມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງບົດລາຍງານຂອງລັດຖະບານກ່ຽວກັບການພັດທະນາຊັບພະຍາກອນ ມະນຸດຕິດພັນກັບແຜນພັດ ທະນາເສດຖະກິດ-ສັງຄົມ ໃນແຕ່ລະໄລຍະໃຫ້ໄປຕາມຂະ ແໜງການບຸລິມະສິດ ເປັນຕົ້ນ ແມ່ນວິຊາການສະເພາະດ້ານ ໃນສາຂາວິຊາກະສິກໍາ, ຄູ ແລະ ພະຍາບານ ເພື່ອສາມາດຕອບສະໜອງໃຫ້ແກ່ການພັດທະ ນາປະເທດຊາດ ແລະ ແກ້ໄຂຄວາມທຸກຍາກຂອງປະຊາ ຊົນ ໃນຕໍ່ໜ້າ. ທ່ານນາງ ປານີ ຢາທໍ່ຕູ້ ກ່າວສູນທອນພົດປິດກອງປະ ຊຸມວ່າ: ຕະຫຼອດວາລະດຳ ເນີນກອງປະຊຸມໄດ້ຄົ້ນຄວ້າພິຈາລະນາ ແລະ ຮັບຮອງຫຼາຍ ບັນຫາສຳຄັນ ເປັນຕົ້ນ ບາງ ມາດຕະການເພີ່ມເຕີມມອບໃຫ້ລັດຖະບານສືບຕໍ່ຊີ້ນຳ-ນຳພາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ການດັດແກ້ແຜນງົບປະມານແຫ່ງລັດ 6 ເດືອນທ້າຍປີ 2019; ຮັບຮອງການຄຸ້ມຄອງ, ການອອກໃບຕາດິນຊ້ຳຊ້ອນ ໃນໄລຍະຜ່ານມາ ລວມທັງມາດຕະການແກ້ໄຂໃນຕໍ່ໜ້າ; ຮັບຮອງເອົາບົດລາຍງານຂອງລັດຖະບານຊີ້ແຈງຕໍ່ຄຳຊັກຖາມກ່ຽວກັບການຟື້ນຟູປ່າ ແລະ ການປູກໄມ້; ນັບທັງ ວຽກງານການພັດທະນາຊັບ ພະຍາກອນມະນຸດ ຕາມຂະ ແໜງການບຸລິມະສິດ ໃນສາຂາວິຊາກະສິກຳ, ຄູ ແລະ ພະຍາ ບານ. ພ້ອມນີ້ ໄດ້ມີມະຕິຮັບ ຮອງວຽກງານສຳຄັນຂອງລັດ ຖະບານ ໃນການຊີ້ນຳບັນດາຂະແໜງການ, ອົງການປົກຄອງທ້ອງຖິ່ນແຕ່ລະຂັ້ນ, ທັງປຸກລະ ດົມປະຊາຊົນບັນດາເຜົ່າສູ້ຊົນຜ່ານຜ່າຂໍ້ຫຍຸ້ງຍາກທາງດ້ານເສດຖະກິດ-ການເງິນ, ສືບຕໍ່ຈັດຕັ້ງປະຕິບັດນະໂຍບາຍ, ມາດຕະການທາງດ້ານເສດຖະກິດ-ສັງຄົມໃຫ້ມີປະສິດທິຜົນ ເພື່ອແກ້ໄຂຂອດອຸດຕັນໃນການຄຸ້ມ ຄອງ ແລະ ບໍລິຫານລັດໃນຂະ ແໜງການຕ່າງໆໃຫ້ມີຄວາມໂລ່ງລ່ຽນຕາມກົດໝາຍກຳນົດໄວ້, ຈັດຕັ້ງປະຕິບັດແຜນດັດແກ້ ງົບປະມານແຫ່ງລັດ 6 ເດືອນທ້າຍປີ 2019 ໃຫ້ບັນລຸຕາມຄາດໝາຍ. ກອງປະຊຸມໄດ້ເລືອກຕັ້ງ ເອົາທ່ານ ຄຳພາ ແສງດາລາ ເປັນປະທານສານປະຊາຊົນສູງສຸດ ຕາມການສະເໜີຂອງທ່ານປະທານປະເທດ ແລະ ຮັບຮອງເອົາການແຕ່ງຕັ້ງທ່ານ ວີດົງ ໄຊຍະສອນ ເປັນລັດຖະມົນຕີປະຈຳສຳນັກງານນາຍົກລັດຖະມົນຕີ ຕາມການສະເໜີຂອງທ່ານນາ ຍົກລັດຖະມົນຕີ ເພື່ອສ້າງຄວາມເຂັ້ມແຂງໃຫ້ແກ່ອົງການຕຸລາການ ແລະ ຄະນະລັດຖະ ບານ ໃນການປະຕິບັດໜ້າທີ່ການເມືອງ. ກອງປະຊຸມໄດ້ພິ ຈາລະນາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດຄຳຕັດສິນຂອງສານ ທີ່ໃຊ້ໄດ້ຢ່າງເດັດຂາດ; ພິຈາ ລະນາ, ຮັບຮອງເອົາບົດລາຍງານຂອງຫົວໜ້າອົງການໄອຍະການປະຊາຊົນສູງສຸດກ່ຽວກັບ ການຕິດຕາມກວດກາ ການປະຕິບັດກົດໝາຍຂອງອົງການສືບສວນ-ສອບສວນ; ພິຈາລະນາ ແລະ ຮັບຮອງ ການສ້າງ ແລະ ປັບປຸງຮ່າງກົດໝາຍ ຈໍານວນ 10 ສະບັບ ໃນຂົງເຂດເສດຖະກິດ ແລະ ຂົງເຂດວັດທະນະທໍາ-ສັງຄົມ ຊຶ່ງການຮັບຮອງເອົາກົດໝາຍດັ່ງກ່າວ ຈະເປັນນິຕິກຳພື້ນຖານສຳຄັນ ເພື່ອເປັນບ່ອນອີງໃຫ້ແກ່ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ, ແກ້ໄຂບັນຫາປະກົດການຫຍໍ້ທໍ້ ທີ່ສົ່ງຜົນກະທົບຕໍ່ການຜະລິດ, ການດຳ ເນີນທຸລະກິດ ກໍຄືການດຳລົງຊີວິດຂອງປະຊາຊົນ. (ຂ່າວ-ພາບ: ບຸນຕອມ-ທອງດຳ)